حب من نار

49

سبحان مبدل الاحوال لي يبيتها فشان و يصبحها فشان ...

الالم قوي و لكن الصبر حاضر و العقل حاضر ... قدرة ربي تصرفات فرضيع صغير بحجم قبضة يد .. المكتاب ما منو هروب و حكام ربي مطبق علينا فينما كنا فوق هاد الارض ..

ماشي ديما النهايات سعيدة و ماشي ديما الزمان تيكون فصفنا ...

الفيلا عامرة و كلشي جالس بوجه شاحب كأن عندهم عزو و ماشي ولادة و خاص يكون الفرح و النشاط...

واقف عمر فالباب تيمشي و يجي و يحط وذنيه على الباب و يرجع ينوض يتما نايضة فيه العافية ...
و اخيرا جا الفرج و تحل الباب .. خرجات منو طبيبة باقا شابة لابسة نظارة و طابلية بيضة ... تقدمات جيهة عمر و حطات ايد على كتفو باسى

دكتورة: هذا حكم الله رضاو بالمكتوب ... على مافهمت الام ماتصدماتش الشيء لي تيعني انها كانت على علم بكلشي .. القرابة لي بين الأزواج اثرات بنسبة قليلة على السبب الرئيسي هو انها دوزات فترة حملها الاولى و بالظبط فالاسابيع اللولة تتشرب فيها الخمر على قولتها هذا السبب الرئيسي لتشوه الرضيع ... صحتو ضعيفة و عندو حتا تشوه فالقدم ديالو ... حاولت معاها بزاف باش ناخدوه للمشفى ولكن رفضات بغات ولدها حداها .. نفسيتها غادي تكون مريضة بزاف و حتا الرضيع الا ممشاش للمشفى عن قريب مانظمنش ليك غادي يطول فالدنيا ... مبغيتش نأثر عليها و لا ناخد شي اجراء حيت ختك و نتا صديق عزيز عندي ...سمحليا بزاف اعمر تمنيت كن قدرت نجيب ليك خبار زوينة ..

حرك راسو باسى .. ودعاتو الطبيبة و مشات ... دفع الباب بإيديه شويا حتا تحل و بانت ليه ناعسة فوق السرير و هازة ولدها تدوي معاه و تضحك فرحانة بيه ... لوهلة قال مع راسو واش لهاد الدرجة يمكن الكبدة تحكم و لا غا حنا لي مكبرين الموضوع علة والو .. مال الولد الا كان مشوه من بعد.. مالو ماشي انسان ماشي رضيع و محتاح يشوف و يحس بفرح الناس لي ضايرين بيه ... ربي بغا يشوفو بديك الصورة ...

الداخل ناعسة نور و بين ايديها ولدها .. تتضحك معاه و تدوز ايديها على وجهو بحنان : ولدي حبيبي ... امجد الحبيب ديالي .. ماما تتبغيك بزااف نتا ولدي الكبيدة ديالي مغاديش نخليهم يأديوك . انا انحميك اولدي و اتاخد سميت الزايدي بزز من كلشي .. تنبغيك اولدي تنبغيك.
عنقاتو عندها تتبوس فيه و الرضيع تيتنفس بصعوبة و جسمو هزيل و حتا البزولة ماشدهاش ...

دخل عمر وقف حداها و دوا بشوية تيحاول يثبت راسو: ختي الزوينة ..

هزات فيه راسها تضحك: عمر.. شوف ولدي شوفو .. زوين يااك زوين ..

حرك راسو بااه باسى: عفاك عطيه ليا راه خاصو المستشفى.. راه حتا الماكلة ماكلاهاش عطيه ليا ..

شداتو عندها كارزاه عندها : عمركم تاخدوه.. نتوما ماراضينش بولدي باغين تاخدوه ليا ..

جلس حداها بوجه حزين و هز ايديه تيدوزهم على وجهها: عمرني درت ليك شي حاجة خايبة ها.. انا خووك لي ديما معااك .. عفاك اختي اريه ليا نديه للسبيطار رااه مريض..

ردت بقسوة مزيراه عندها: نتوما لي مرااض .. ولدي بخير امجد بخير.. يحيا مابغاهش و نتا مابغيتيهش و كلكم اتنبذو ليا ولدي و لكن عمرني نخليه ليكم ولدي هدا ولدي

تنهد و زاد قرب ليها.. يلاه ايهضر دخلاث كلثوم تتبكي شادة زيفها تتمسح بيه عينيها.. شافت بنتها و نطقات: نور ..

دورات نور وجهها بحقد و غوتات: بعدو مني .. متبقاوش تبكيو واش انا والدة و نتوما تبكيو .علاش مابكيتوش ملي ولدات الباتول.. علاش انا فرحت ليكم علاش ..علاش مافرحتوش لولدي علااش..

دور عمر راسو تيتنهد و ضار جيهة مو تتبكي: خرجي الواليدة..خرجي انهضر معاها ..

خرجات كلثوم تتأسف على حالة بنتها و بقا عمر تيسايس معاها : عفاك اختي الزوينة.. غير السبيطار غادي يصح و ياكل و يرجع ليك صافي

حركات راسها بالنفي معصبة و عينيها ناشفين من اي دموع ... وكل عمر امرو لله و ناض خرج خلاه فحضنها كارزة عليه..