حب من نار

31

نهاار جديد ...

واقفة فالكوزينة تتحيد الكيك من المول ... حطاتو فطبسيل و بدات تتزوق فيها بالشوكولا ... سالاتها و هزاتها فإيديها خارجة لجيهة الصالة فين محطوط الفطور...

شافتهم جالسين مجمعين .. نطقات بصباح الخير حطات داك الطبسيل و جلسات جنب خالتها ...

عينيه عليها ملي خرجات من الكوزينة ... كيفاش تتمشا و كرشها قدامها باينة بزااف مع لابسة كسوة ... باقي حد الساعة ممولفهاش بالكرش تتجيه غريبة ...

شافها كيفاش نطقات بصباح الخير و ابتسامة على وجهها .. مشافتش فيه و ووجها خالي من اي عتااب لتصرفو ديال البارح ... دور راسو ملي سمع باه دوا معاه

الحاج عيسى : خاصك تبدا العلاج في ساع باش نرجعو للمغرب ... الشركة واقفة

شاف فيه: انشاء الله ..

حدر راسو وهز كاس القهوة تيشرب منو ... هزات عينيها شافتو تيشرب القهوة .. تنهدات ووقفات عمرات كاس العصير و حطاتو قدامو بلا ماتنطق ...

شاف فيها مطلع حاجبو و زاد شرب من القهوة تيستفزها زعما ماشي سوقك ... دورات راسها تتنهد ورجعات شافت فيه تتعض فقنانفها فمها تياكلها و مباغاش دويه حيت الجواب عارفااه ...

شاف بالحاج و نطقات: عمي باراكا عليك من القهوة شرب العصير ...

شاف فيها عيسى مستغرب : تنشرب اتاي انا ابنتي ...

ضورات وجهها حمر فرشات راسها باهتمامها لي هو ماعاطيه حتا شي قيمة...

شافت فيها زينة و شافت فولدها لقاتو هو لي تيشرب القهوة عاد فهمات البلان: ولدي خود ليك شوية العصير مع الكيك

يحيا: متناكلش الكيك

زينة: من امتا بالسلامة ياك مولف تاكلو ..

بتاسم ليها بسخرية و نطق: تناكل غا ديالك الواليدة...

ساطت زينة بقلة حيلة و شافت قدامها تتكمل الفطور.... شربات نور كاس العصير و ناضت وقفات

نور: خالتي انمشي لمول و نجي ..

زينة: سيري ابنتي . رضي البال لراسك ...

بتاسمات ليها و خرجات من الصالة... هزات ليبوطها و مونطو من حدا الباب لبساتهم و تحنات تتلعب مع مشتهاا ...

ضورات راسها على صوتو ... تنهدات بشوية ووقفات عرفاتو غادي يتبعها ...

جالس قدامها فكرسيه عاقد حجبانو معصب: فين بالسلامة ..

نور: لمول .. خاصني نشري شي حاجة ضروري ..

ربع ايديه تيخنزر فيها: طلعي ماكاين خروج .. ماشي جالس فوق هاد الكرسي ديري لي عجبك ..

شافت فيه مخرجة عينيها: علاش شنو شفتيني درت .. انمشي نشري لي بغيت و نرجع دغيا ..

حرك كرسيه حتا وقف قدامها.. شدها من ايديها حتا نزلات عندو : هضرتي مانعودهاش .. طلعي انور بلا متعصبيني ...

نور : صافي غا طلق مني وعتيني..

هبط عينيه على شي حاجة تتخبش فيه من رجليه ... بانت ليه مشة بيضة ... طلق من نور و هز المشة بإيديه طوعها للجهة لاخراا ...

خرجات عينيها فيه... مشات دغيا لجيهتها هزاتها من الارض عنقاتها... شافت فيه بحزن تتعاتبو بنظراتها: حشومة عليك والله بقات ليك غا مشتي ...

زاد بكرسيه تاني حتا وقف قدامها: طلعي انور بلا ماتعصبيني ...

وقفات هازة مشتها عاقدة حجبانها و عينيها دامعين ... شافت فيه بتحدي و نطقات: غادي نمشي نشري لولدي حوايج الا نتا مباغيهش انا باغاه وغادي نخرج بغيتي ولا كرهتي ..

ضربات فيه و خرجات مع الباب هازا مشتها فإيديها تطبطب عليها ... وصلات لطوموبيلتها حلاتها و دخلات تتبكي ...

حتا لهاد الدرجة غادي يحرر فيها عيشتها ... كاسها مابقا ليه والو و غادي يفيض و لحد الساعة باقي متحملة ...

صونا ليها التيليفون شافت سميت خوها طالعة .. مسحات دموعها و تنفسات مزيان عاد جوباات

نور: خووياا ...

عمر: لباس عليك.. فينك؟

نور: خرجت نمشي لسوبر ماركت نتقدا شي حاجة ..

عمر: كلشي مزياان .. كيداير هداك ..

نور: مزيان .. كلشي بخير ..

عمر: ياكما دار ليك شي حاجة.. الا عرفتك كذبتي عليا مغاديش نسمح ليك انووور ...

نور: لا لا علاش انكذب .. مدار ليا والو بالعكس .. فرح بزااف ملي عرفني حاملة ..

عمر: دابا نشوفو .. مهم انا شي يومين و انجي انا و الواليدة صافي ...

نور: بلاش اخوياا .. دابا يحيا فاق مابقا والو و غادي نرجعو للمغرب .. بلا ماتعذب على جوج مراات ..

عمر: صافي حتا نشوف .. سيري فين غادا شوية و نعيط ليك ..

قطعات معااه و حطات تيليفون حداها .. ضحكات مع مشتها لي جالسة حداهاا ... هزات عينيها قدامها وهي تخرجهم مخلوعة ...

كان واقف قدام طوموبيلتها بكرسيه مربع ايديه عينيه حمرين ...

سرطات ريقها تتشوف فوجهو متيبشرش بالخير... خرجات من الطوموبيل و مشات جيهتو ... مدواتش معااه دفعاتو من كرسيه حتا لباب الطوموبيل .. حلاتو و عوناتو حتا ركب واخااا معافر مراضيش تعاونو...

سدات عليه الباب و دات الكروسة حطاتها فالكوفر... تنفساات مزياان تتبت راسها عاد مشات حلات الباب و ركبات ..

ضورات راسها جيهتو لقاتو هاز تيليفونها ..

شاف فيها و نطق مخنزر: حليه ..

شداتو من عندو و حلاتو و رداتو ليه ببساطة... ديمارات و كسيرات خلاتو تيبقشش ف تيليفونها...

بقشش حتا عيا مالقا والو و هو يحطو .. ضار تيشوف فيها تتسوق مركزة مع الطريق و نظاظر فعينيها ... مل من هاد الطيبة لي فيها طلعات ليه فراسو ... تتستقبل كاع تصرفاتو بالسكاات و تتغبر كاع من قدامو بالمرة...

بقا تيضور راسو مل من السكات .. باغي يجبدها باي طريقة .. هز ايديه حيد ليها النظاظر تيخنز: علاش دايرة هادو كاينا شي شمس ...

شافت فيه و حركات راسها بلاا ... رجعات شافت قدامها و كملات طريقها بالسكاات ...

غمض عينيه مفقوص و شاف حتا هو قدامو ...