حب من نار

61

جالسة وسط الطاكسي تترعد .. قلبها تيضرب حاسة بروحها غادي تخرج...باقي مامستعداش للقاء نهائيا .. مبغاتش تشوفو و مابغاتش قلبها يحس بهاد الاحساس ... بغات تنسااا و مابغاتوش يشوفها ...

مرة مرة تضورر تيبان ليها فطوموبيل تابعهم ولكن بعييد ... بلا ماتردد غوتات على مول الطاكسي باش يزيد فالسرعة و نعتات ليه زنقة داخلة يدخل منها ...

بقاو غادين هيا هاربة و يحيا ورااها عينيه على الطاكسي ... تيضرب فوق المقود باعلى جهدو و تيغوت ... نفسو عالي و صورتها و هي قدامو باقا بين عينيه .. مايمكنش يخليها تفلت بين ايديه من بعد هاد السنة و نصف لي داازت كلها عذااب ..

دابا يطرا لي يطرا غادي يشدها بين ايديه... مافكرش ف اش تدير هنا و علاش معرفهاش من قبل .. لي تيهمو انها تجي بين ايديه و يطفي العافية لي فقلبو من جيهتها ...

جالسة تترعد .. فاشلة و عينيها مرة فالطريق مرة فوراها تتشوف واش باقي تابعها ...

راوغ مول الطاكسي و دخل مع واحد الدخلة لي يحيا فاتها من كترة السرعة لي كان جاي بيها و ملقاش كيف يدير يرجع حيت الشارع عامر ...

تنفسات نور براحة و قالت لمول الطاكسي على العنوان .. ماشي بزااف باش كانت واقفة قدام ولاية الشرطة .. هبطات هازة مشها و ساشياتها تترعد ..

بلا ماتردد طلعات مع الدروج عينيها ضباب... قصدات باب جا فاول طابق و حلاتو بلا ماتدق ...

هز مهدي راسو بعفوية حتا شافها قدامو تتبكي و تترعد .. وقف مخلووع و مشا عندها بالزربة شد فيها..

نور غا شافتو و هي ترمي كلشي من ايديها و مشات عندو عنقاتو ...

عنقها مهدي تيمسح على شعرها ... معرفش مالها ولكن حالها معجبوش ..

بقات تتبكي فحظنو مرهقة .. احساس خايب تينهش فقلبها... بكات حتا عيات و تهزات عليه تتمسح فدموعها .

شدها مهدي من ايديها جلسها فكرسي و شربها الماا عاد جلس حداها : غا بشوية عليك و قولي مالك .. تلقا ليك شي واحد دار ليك شي واحد شي حاجة

حركات راسها بلاا تتمسح فدموعها.. هزات فيه عينيها و نطقات : كنتي عارف يااك ..

مهدي بعدم فهم: اش عارف ..

نور: كنتي عارف كاين هناا ..

نزل مهدي عينيه و عاود شاف فيها تيتنهد : شكون هو ..

ضربات نور فوق الطبلة بالجهالة مفقوصة و غوتات ليه فوجهو: كنتي عارف يحيا كاين هناا انا شفتو شفتو .. بلا متكذب علياا امهدي ..

تنهد مهدي مفقوص .. هادشي لي مكانش باغي .. ناض جلس على رجليه قدامها و شد ليها فإيديها: فين شفتيه ..

نثرات ايديها و وقفات تترعد و تتغوت و تتبكي كلشي مجموع عليها : علااش ماقلتي ليا والوو علااش .. علااش خبيتي عليااا.. علااش حطيتيني فهاد الموقف علااش..

ناض وقف تيشد فيها : تهدني انوور .. انا انقولك كلشي ..

رجعات اللور تتمسح فدموعها : كنت تنتيق فيك امهدي .. ياك قلنا عمرنا نخبيو على بعضياتنا ..

تنهد مفقوص و رد: رااه على مصلاحتك خبيت علييك .. كنتي مريضة ملي يالاه دخل لفرنسا .. مابغيت نقولك والو..

رجعات باللور تتمسح فدموعها : شنو مخبي عليا مزاال .. جاوب على داك الزمر ..

كان تيليفونو كل مرة تيصوني و مهدي تيقطع .. حتا غوتات ليه فوجهو يجاوب ... رجع قطع و حطو فوق المكتب و مشا وقف قدامها: انا انشرح ليك غا اجي جلسي ..

سمعاات التيليفون تاني صونا و هي تبعد منو و مشات هزاتو حتا خرجاات عينيها من السمية لي طالعة ليها .

مهدي دغيا خطف ليها التيليفون من ايديها و لاحو فوق المكتب..

رجعات اللور تترعد تتحرك راسها بلاا تتبكي:علااش تيعيط ليك عمر ..

ساط مفقوص و مشا بغا يشد فيها وهي تبعد منو تتبكي هازا ايديها قدامو بمعنى حبس: قلتي ليا مابقيتش تندوي معاه .. طلبتك قلتليك مابغيتش الماضي ديالي يتبعي .. تقت فيك امهدي و شوف باش جازيتني .. تقت فيك امهدي ..

يالاه ايجاوبها و هي تخرج من المكتب غادا تتجري ... سااط مفقوص معصب.. هادشي لي مابغاش تعرفو ... تبعها تيجري حتا وقفو عميد الشرطة تيهضر معااه...

خرجات نوور تتجري تتبكي .. حاسة بكلشي ضدهاا .. قلبها و عقلها حتا تيقتها خدلاتها ... وقفات وسط الشارع تتلفت يمين و شمال تتبكي .. سمعات ميو و هي تنزل راسها لقات قطها تبعها .. نزلات على ركابيها تتبكي هزاتو .. مع هزة راسها لقاتو واقف قدامها عرقااان تينهج ...