حب من نار

79

كلامها جرحو بزااف و مظنش ايسمع منها هاد الهضرة من بعد ما صفات الخواطر و تصلحات الامور بيناتهم ...

خرج من الدوش و نشف راسو لبس عليه حوايج الدار... هز البيسي و دخل لبلاصة تسجيلات الكاميرا و بالظبط للكاميرا لي حاط فالمكتب ديالو ... جبد اللقطة فين وقع لي وقع و حبسها .. ناض هز البيسي و خرج من البيت ...

عند نور ... ناعسة على جنبها تتبكي و ايديها قدام عينيها تتشوف فيها و تزيد تألم ... شوفتو و هو تيداوي ليها ايديها بلا رحمة باقا بين عينيها ..حطات الايد لاخرا على حنكها سخون و حمر ... زادت فالبكاا ملي تفكرات راه صرفقها ...

سمعات الباب تحل و بقات كيف هي متحركاتش ... سكتات تتسناه يبان قدامها و لا يشد فيها و لا ع الاقل يشرح ليها و لكن مكان والو... سمعات الباب تسد تاني و هي تضور بالزربة لقات الخواا ...

ناضت توكضات تتشوف و هي تلمح بيسي محطوط حداها ..استغربات و ضوراتو عندها لقاتو شاعل .. قادات الشاشة معاها و هي تخرج عينيها من داكشي لي شافت .. دارت للفيديو بلاي طلقاتو و جلسات تتفرج و تتندم فراسها على فمها...

داز الوقت ... محني على الزااج تيجمع فيه عاقد غوباشتو معصب فوق القياس ... حس بخيال واقف عليه وهو يوقف ...

كانت نور واقفة ورااه تتعض فقنوفتها و عينيها تيبربو بالدموع .. ندمات على الهضرة لي قالت و لكن اي وحدة فبلاصتها اتدير نفس التصرف..

شافتو وقف هي تشد ليه فدراعو ... تنتر منها يحيا دغيا و نطق تيشوف فالارض: رجعي لبيتك الزاج هناا ..

خسرات ملامحها بغات تبكي و رجعات شدات ليه فكتفو و تكات براسها على ظهرو تتبكي: سمح لياا عفااك مقصدتش نقول هكااك . عفااك سمح لياا ..

تنهد ساد عينيه ... عصبيتو دغيا تلاشات ملي سمع صوتها الممزوج بتبرة البكاا .. ضار عندها و هز ليها راسها تيمسح فدموعها: قلنا بلااش من هاد الدمووع ...

هزات ايديها ضربات فمها و نطقات: فمي خايب.. سمح ليا عمرني باقا نقولك بحال هاد الهضرة.. ندمت والله ..

تنهد و جرها من ايديها جلس فوق الفوتوي و جلسها عليه تيمسح فدموعها: ششش صافي سكتي ..

نور: هاديك المسخة حسابي معاها من بعد .. والله متبقا فيها ..

يحيا: من اليوم مغادي تشوفيها لا نتي لا اناا ..

نور: كيفاش زعماا ..

يحيا: لغيت الشراكة و من غذا مابقات ليها بلاصة فشركتي ...

بتاسمات و نطقات : ياكما غادي تضرر شركتك

حرك راسو بلاا تيحيد ليها الشعر على جبهتها: هي لي غادي تضرر .. دخلت معاها شريك و فكيت ليها الازمة لي كانت عندها ولكن هي فيها الدودة تمشي تبردها فبلااصة خراا .. انا ماشي هادشي لي صدمني ..

نور: و شنو صدمك ..ياكما دارت شي حاجة اخراا ..

حرك راسو بلاا و ضربها على نيفها : نتي لي صدمتيني فيك .. لهاد الدرجة متيقاش فيا ا نور ..

هبطات عينيها حشمانة من تصرفها و الهضرة لي خرجات من فمها .. حسات بيه بقا فيه الحال .. عنقاتو كارزة عليه : والله حتا تنتيق فيك ولكن غرت عليك .. الغيرة عمااتني و محسيتش شنو خرجت من فمي .

ضور ايديه على ظهرها عنقها : اخر مرة نسمع بحاال ديك الهضرة ...

حركات راسها بااه و بقات فحظنو معنقااه ..

يحيا حس بيها اتنعس و هو ينوضها عليه و شاف جيهة الطبلة تيضحك: دابا ضيعتينا فالعشا غا هكاك يااك ...

هزات كتفها : و انا مالني .. اصلا تعطلتي بزااف اليوم و ممولفاش ليك تعطل..

يحيا: معرفتيش علاش تعطلت ..

حركات راسها بلاا ..

يحيا: كملت الخدماا لي كانت باش غذا انمشيو ..

نور: فين انمشيو .. ؟

يحيا: متوحشتيش داركم .. هما بعدا توحشووك ..

خرجات عينيها: واش عارفيني معااك ..

حرك راسو بااه : قلتها ليهم و تيتسنااوك ..

تنهدات و تكات على صدرو: امتا غادين .. ؟

يحيا: غدا