حب من نار

56

على رصيف الشارع تربعت . و على قمة الجبل وقفت
صرخت بأعلى صوتي يااربي . لقد تعبت من الحياة 💔

ف اباختومون كبيرة و زوينة.. تطل على الشارع الكبير المؤدي للمدينة .. اثاث جميل و فراش راقي . منزل مليئ بالضوء و الحياة عكس صاحبها .

فغرفة فيها جوج ديال الالات .. واقف شخص فوق طابي غولون تيجري بكل جهدو .. تيشوف فزااج قدامو تيطل على طبيعة خضرااء من الضفة الأخرى للمنزل . و فجنبو قطة بيضة جالسة تتشوف فيه

دازت نصف ساعة و هو على نفس المنظر... تيجري بحالا باغي يقطع النفس فراسو ... كتاف عرااض و ظهر مسطح .. عضلات بارزين و صدر مطراسي ..
وقف تينهج . هز قرعة الما من جنبو شربها كاملة و خرج من الغرفة عرقان ..

توجه نيشان للغرفة المجاورة و دخل نيشان للدوش.. طلق عليه ماا دافي .. واقف حاط ايديه على الحيط و منزل راسو ساد عينيه.... شوية بتاسم بلا مايحس وهو تيشوف صورتها قدامو... بقا مدة ساد عينيه تيتأمل صورتها و ملامحها ..

هز راسو و كمل تدوااش و خرج نشف راسو و لبس حوايجو ... لبس كلااس .. شوميز بيضة و سروال توب كحل مع سمطة باينة و ساعة فالايد مذهبة عاد فيست كحلة و بلا كرافاط ..

دار جيهة المرايا تيمشط فلحيتو و يقادها ... بقا للحظة تيشوف فانعكاسو .. هذا هو يحيى الزايدي الجديد ... شخص جديد مع حياة جديدة فبلاد جديدة ....

مخلاش راسو يسافر بيه لبعيد .. دغيا جمع عينيه على إنعكاس صورتو و هزها فالحيط.. تما معلقة صورة كبيرة لطليقتو و لا نقولو حبيبة قلبو ..

بالمختصر يحيا اكتر شخص سيئ الحظ فالحب.. كل ماتيعطي قلبو و يعطي احاسيسو تيتخاان... ولكن هاد المرة عكس الاولى ... واخاا طلقها فوقت مراضيش نهائيا انه يطلق الا ان صورتها بقات مرسخة فبالو ...

رغم طلاقو متنازلش و قلبو مبغاش يستسلم و يخسر الحب لي تعطا ليه و عذبو ... النهار لي ساق فيه خباار اختفائها كانت اكبر صدمة ليه .. مايمكنش الزمن يعيد نفسو و مايمكنش الحكاية نفسها تعااد ولكن هذا حكم القدر ...

مشات نور و خلااات فرااغ كبير فحيااة يحيا لي مخلاتوش فالوقت لي طلقو ... رغم طلاقهم كان تيقول نور ليحيا واخا تنطابق السما مع الارض ولكن باختفائها هدماات سطح الامل لي بقااا عايش عليه ..

عيا يقلب و عيا بالتخماام .. سافر لبلاد بعيدة و مرت سنة و نصف تيقلب على ظلها مالقاهش قدر يدير مستقبل زوين ليه فبلاد غريبة بمجرد انها كاينا فنفس البلاد .. من بعد ماعرف انها خذات طائرة لفرنسا من بعد ماطلع ليهم اسمها ... تبعها بلا تفكير و لكن ماقدرش يلقاها نهائيا ... قلب فجميع البلايص الا ان بعد المدن لي ساكنين فيهم بجوج خلاه يعرقل مسيرة بحثو ... عاش فنفس البلاد على امل يلقاها شي نهار... اسس شركتو و فنا حياتو فالخدمة و هو تيقلب فنفس الوقت ... ولكن الوقت تيدوز و الحياة تتمر و كلشي تبدل الا حبو و شغفو يلقاها باقي فبلاصتو .....

الزمن يعيد نفسو و كيف قلب و تعذب على قمر تعذب اكتر على نوور .. موت ولدو هرسو و اختفائها طيح ليه الكتاااف .. هادشي كامل خلا يحيا يربي شخصية جديدة اكتر قسوة ... يحيا لي تحرر من العائلة لي تشتتات .. دار شركتو بوحدو بمساعدة شخصية ماحتاج فيها حتا واااحد ... كابر و خشا راسو فالخدمة حتا كبر اسم شركتو و ولا عندها منافسين فالسوووق..

وقف فالمصعد وورك على الزر لي بغا .. يالاه ايتسد و هو يعاود يتحل و دخلات منو بنت زوينة بملامح جميلة .. شهبة و عينيها خضر .. دايرة ميكاب خفيف و شعرها بوكلي واصل حد كتافها ... بتاسمات ليحيا و ووقفات جنبو بلا ماتهضر .

واقف خاشي ايدو فجيبو ... طلع النفس حتا طلعات معااه ريحة خلاتو يسد عينيه و يسافر بيه الزمن لبعيد ...

" واقفين فمحل للعطور .. لابسة سالوبيط دجين و كرشها كبيرة .. وقف وراها و مد ليها قرعة على شكل قلب .. شداتها بابتسامة و شماتها . تلفتات عندو و ضحكات: زوينة ..

در عليها: بقااي ديريها .
بتاسمات ليه و رشات منها داك الساعة حتا طلعات معااها ريحتها و بتاسم ليها "

فاق من سهوتو على ايد فوق كتفو .. حول نظرو و شاف فالايد بتخنزيرة

حيدات البنت ايديها و قالت بضحكة تدوي بالفرنسية : بغيت غا نقولك المصعد تحل..

ضور وجهو بلاا مايجاوبها و خرج من العماارة ... مشا نيشان لطوموبيلتو... ركب و حط ايديه على المقود تيتنفس بالجهد ... ذكرياتها تيألمووه و تيمزقو ليه فؤادو للأطراف.... سد عينيه تيتنهد و نطق بينو و بين نفسو: واخا تهربي حياتك كاملة غادي ترجعي ..

ضرب على المقود معصب و ديمارا كسيرا بجهد غادي لوجهتو ...