حب من نار

2

جمعات حوايجها و دموعها فطرف عينيها ولكن مباغاش تبكي.. خاصها تفرح حيت هاد المرة غادي تدخل لديك الدار باسم زوجة الابن .. مغاديش تدخل حيت دار خالتها ولا غادي تدخل تحت تهديدو .. هاد المرة هو لي قاليها جي و هو لي قاليها بغيتك مرتي فالوراق و فالحقيقة ...

حطات الباليزات ستفاتهم حدا بعضياتهم و مشات تتجمع فأشيائها الخاصة فسكادو ديالها ..  دورات عينيها جيهة الباب ملي سمعاتو تحل .. شافت الباتول و هي تبتاسم: دخلي ..

دخلات الباتول بابتسامة مزينة وجهها ووقفات حداها: قاليا عمر غادي تمشي ..

نور: ااه ..

زادت خطوة القدام و عنقاتها : غادي نتوحشك.. اتخويو علينا الدار..

نور: حتا انا ولكن خاصني نمشي .. معندي ماندير..

تهزات عليها الباتول و نطقات بابتسامة خجولة: تتبغيه يااك ؟

خرجات نور عينيها و قلبات راسها بالزربة: اش تتقولي ..

الباتول : ههه راه باينة حتا من عمر عاق بيك هههه

نور: و تضحكي ..

الباتول: هههه سمحيليا .. انتوحشك والله ... تهلاي فراسك صافي ..

نور بابتسامة: متخافيش.. اجي غادي تبقاو هنا و لاترجعو لداركم ..

حطات ايديها على كرشها و نطقات بابتسامة: عمر تيخرج بزاف و متيبغيش يخليني بوحدي داكشي علاش انبقاو هنا حتا نولد ..

نور: الله يفكك على خير.... باينة هدا شي بوكوص بحال خويا ..

الباتول: عالله .. مهم منشغلكش انا التحت حتا تسالي ..

حركات نور راسها بااه و ودعاتها بابتسامة ... فرحانة ع الاقل خوها مرتاح فحياتو و حتا ختها متأكدة انها مرتاحة و تتأمل حتا هي يكون عندها نصيب فهاد الفرحة...

ماشي بزاف باش كانت واقفة فالسطوان.. لابسة سروال جينز و تيشورت و سكادو فظهرها .. شعرها مسرح اللور واصل حد عنقها .... معنقة مها و كلثوم تطبطب ليها فوق شعرها بحنية

كلثوم: كلكم مشيتو فنهار واحد ..

نور: انا غا حداك ا ماما .. بقاي تجي عندي ديما صافي ..

كلثوم: سيري لدارك ابنتي و كوني لالة مولاتي ... الله يسعدك ..

عنقاتها نور دموعها فطرف عينيها و مبغاش تبكي .. دورات راسها بان ليها باها و مشات عنقاتو حتا هو تيرضي عليها ...

سلمات على عمر و الباتول لي كلما تشوف وجهها تتحس بشوية الامل ..

زينة: يلاه ابنتي ..

شافت فيها بابتسامة و تبعاتها لبرا شادة فإيد مها .. وصلات جيهة الطوموبيل و طلعات اللور جنب خالتها و الشيفور تيطلع فالباليزات فالكوفر ...

توادعات مع مها للمرة الاخيرة و هزات عينيها تتشوف فدارهم.. ماشي بزاف باش سكنو فيها و رغم ذلك دوزات فيها بزاف ديال الاحداث لي عمرها تنساهم ... فهاد الدار حبكات خطة هي و ختها و طيحات فشباكها الانسان لي عمرو شاف فيها شوفة الحبيبة .. فهاد الدار بكات و كذبات و لاول مرة تبين الشخصية القوية و تحدات كلشي .. فهاد الدار تهددات و بكات على زهرها و كانت غادي تعنف من واحد عمرو حتا هز عليها صوتو ... فهاد الدار جا  رغبها و قالها عطيني فرصة و قلبها خفق بالفرحة وكانت اتوافق فالحين لولا ختها لي منعاتها .. 

تنهدات بابتسامة صغيرة و دارت دخلات حدا خالتها و تسد عليها الباب ... ضارت جيهة الشرجم بتاسمات لمها و باها لي واقفين و هزات ايديها دارت ليهم باي باي ... قبل ماتزيد بيهم طوموبيل لوجهة اخرا اتبدا فيها حياة اخرااا

دورات عينيها جيهة خالتها و نطقات: خالتي ..

زينة: نعام ابنتي ..

نور: علاش مجاش يحيى .. هو قاليا غادي يجي يديني ..

تنهدات زينة و تبسمات بشوية: غادي تعرفي كلشي ابنتي ..

عقدات حجبانها : شنو انعرف ..

بتاسمات ليها و قربات عنقاتها من كتفها: الوصية لي نوصيك ابنتي صبري .. بجوجكم بغيتو هاد الزواج اذن تحملو مسؤوليتكم .. صبري عليه و اكيد ربي غادي يفرحك ..

هزات فيها عينيها مفاهمة والو: خالتي .. خلعتيني .. علاش تتقولي هاكا و فين يحيى ..

زينة: احنا غادين عندو ..

دورات راسها بالزربة جيهة الشرجم بانت ليها الطريق ماشي ديال الدار ... رجعات شافت فخالتها قلبها تيضرب: خالتي عفاك خلعتيني .. فين غادين هادي ماشي طريق الدار..

زينة: احنا نوصلو ابنتي و تعرفي .. عمري تدخلت فقرارات ولادي .. من الاحسن هو يشرح ليك..

حدرات راسها قلبها تيضرب .. اش ايشرح ليها و اشمن قرار لي مغاديش تدخل فيه...

حطات ايديها فوق قلبها سادة عينيها.. تدعي ربي يخرج ليها هادشي بخير.. دقات قلبها كانو غراب على الدقات العادين.. كانو تحذير للتعاسة لي جاية فالطريق