حب من نار

9

داز نهار و جوج و ثلاتة ... نهار على نهار تتحس فيهم نور بروحها واحلة ليها فحلقها و علاين تخرج ... الروح لي باقا سايطة فيها وسط جسم هزيل قاتلو الجوع و العطش ...

فالنهار الاول كانت تتعدي بالما ديال الحمام تتشربو ولكن ملي ضعاف جسمها مبقاتش تتقدر تنوض حتا للحمام و تشرب... ثلاتة ايام بلا ما و بلا ماكلة .... ولات حالتها حالة .. تتغيب لساعات و تفيق تبكي على زهرها و تعاود تغيب ....

شفايفها ناشفين و مقشرين و عينيها منفوخين و تحتهم هالات سوداااء خباو جماال عيونهااا ... تتلعن فيحيى بالليل و النهار على ها المصير لي كتبو عليها و هي مدايرة لا بإيديها لا برجليها ... عمرها تخيلات غادي ينتاقم منها بهاد الطريقة... الوجه الطيب لحيى لي عاشت معاه مواقف كثيرة تمحا دغيا بهاد الفعلة لي داار ... حتة لامتا غادي يبقا حابسها فهاد البيت ..كن غير رماها من شي بلاصة و لا هاد الموت البطئ لي تتحس بيه ...

عمرها جربات الجوع و انها تبقا بوحدها لمدة طويلة ... ثلاتة ايام كانو كافين باش تحس فيهم بالموت تتلامس اطرافها و هي مترددة تاخد روحها ...

هزات راسها بالشوية و لسانها تيقلب على الريق بين سنانها ... هبطات رجليها بشوية باغا تمشي للحمام تشرب غا الما لي يومين مجاش ففمها ... الا اتبقا فهاد الحبس مدة طويلة ع الاقل تعتق روحها بالمااا ...

وقفات تترعد و رجليها مهازينهاش ...شعرها مشعكك و عينيها ناعسين مقدراش تحلهم ... تبثات راسها مزيان و خطات الخطوة الاولى قبل ماتشدها الدوخة و تجي طايحة فالارض مغمي عليها ...

داز الوقت ...

تحل باب السويت و دخل منو تيتماايل .. نفس الحوايج لي كان لابس هادي 3ايام باقين على لحمو .. عينيه ناعسين و حالتو حالة .. عينيه حمرين بكترة السكرة لي مفاقش منها هادي ايام ...

خطا للداخل تيدور عينيه هنا و هنا ... دوز ايامو كلها فنفس الديسكوتيك من قرعة لقرعة مع نفس البنت لي تعرف عليها اول مرة ...

دخل لبيت النعاس تيقلب بعينيه عليها .. خرجات من بالو لدرجة متفكرهاش كاع واش جات معااه ...

لمحها طايحة فالارض مغيبة .. شعرها مدلي على وجهها مغطي ليها ملامحها ... مدار حتا شي ردة فعل ...

تمشا حتا وقف حداها .. نزل بكامل جسمو.. هز ايديه حيد ليها الشعر لي مغطي وجهها ... قاص بصبعو جيهة عنقها حتا تحسس نبظها ضعيف ...

ناض وقف و عطاها بالظهر .. خلاها مليوحة و مشا جيهة الحمام بلا مايتسوق ليها ...

داز الوقت .. خرج من الدوش لاوي عليه فوطة و تيمسح بوحدة اخرا شعرو و وجهو ... دور عينيه شاف فيها باقي على نفس حالتها ... مشا جيهة باليزتو جبد حوايج جداد و لبسهم ....

ضار لجيهتها و مشا تحنا لمستواها ... دار ايد تحت من رجليها و ايد تحت راسها ... حطها نيشان فوق السرير ...

هز ايديه تيدوزها فوق وجهها يابس و ناشف ... حس الحياة معدوم فملامحها ... ردة فعلو اتجاهها مكيناش و ضميرو غايب على الوجود ... قبل ماتكون غدراتو نسا انها مجرد انسانة تستاهل الشفقة و الفعلة لي دار فيها لاتغتفر ...

عطاها بالظهر و مشا هز تيليفونو خربق فيه و حطو فوق وذنيه تيدوي ...