حب من نار

46

دخلات للبيت تتنهد ..كانت باغا تبات و تبقا تطل على اريج ساعا خصر ليها مخططها ...

دخل وراها تيحل فجاكيط .. لاحها جنب و شاف فيها : مالكي تتنهدي ..

جوباتو وهي تتشوف فالبلاكار: والو غا عيت .

جبدات حوايجها و مشات للدوش بدلات و غسلات .. خرجات لقاتو واقف فالبالكون تيكمي .. تنهدات ومشات تخشات فبلاصتها .. طلات على الساعة لقات ١ الليل .. يالاه بدات تديها الغمضة و هي تحس بايديه على خدها ..

حلات عينيها تتشوف فيه وهو ينطق: مقلقة ؟

حركات راسها بالنفي بلا ماتهضر..

يحيا: لا مقلقة حيت جبتك يااك .. كنتي باغا تباتي و انا خصرت ليك خاطرك ياك ..

هبطات عينيها بلا متجاوب و رجعات شافت فيه ملي بدا يهضر ..

يحيا تكا على ظهرو و ايديه ورا عمقو تيشوف فالسقف: مابقيتش تنقدر ننعس ونتي ممعاياش فالفراش ... واخا كلشي لي داز علينا ولكن ولفتك بزاف انور .. نتي دابا شي حاجة زوينة فحياتي و مابغيتش نسد عيني شي نهار و نتي ممعاياش فالفراش .. بغيت ننعس عليك و نفيق عليك ... وليت تندخل فالوقت و ناكل فالوقت و نجي للدار غا باش نشوفك و نحس براسي حتا انا عندي عائلة تتبغيني و مرة تتسناني ..

تلفت جيهتها متكي على ايديه و كمل تيهضر بعفوية: عرفتي شنو .. فواحد الوقت حسيت براسي وحيد واخا عندي عائلة ولكن كنت كنحس بالوحدة .. بصح ظلمتك بزاف انور ولكن يمكن داكشي لي دوزنا غير اختبار من ربي باش نحس بقيمتك .. نتي ربي رزقك الصبر لي واخا نقلب عليه حياتي كاملة مغاديش نلقاه و نصبر بحالك ... تنعتارف ضلمتك بزااف ولكن بطيبتك و حنيتك و اهتمامك خليتيني نبغيك .. انا تنبغيك انور .. تنبغيك و بغيت حياة جديدة معاك و مع ولدنا ..

خرجات عينيها فيه مصدومة.. يااه شحال خارجة تنبغيك زوينة من فمو ... حطات ايديها على قلبها تيضرب و عينيها دامعين ... هادا هو الاحساس لي كانت تتقلب عليه من شحال هادي .. هاد الاحساس هو احساس الحب و هاد المشاعر هما لي تيفيضو ملي تيسمعو كلمة تنبغيك....

شافت فيه بحنية و نطقات ببرائة تتعبر على احاسيسها بلا كذوب و لا نفاق: من اول نهار شفتك فالبلاد عندنا بغيتك .. بغيتك انا اللولة و لكن مكنتيش مكتاب ليا . ربي اختابرني بقلبي و باحساسي و بمشاعري .. اصعب اختبار فالكون هو هدا .. كنت تنضارب مع راسي باش ننساك .. عرفتي شنو انا زطمت على روحي و حرقتها غا باش نشوفك سعيد ...ملي تزوجنا قلت صافي ربي عوضني على صبري و عوض قلبي على الحرقة لي تحرق ولكن..

قاطعها قبل ماتكمل بقبلة على شفايفها لي تيترعدو ... حط ايديه على ايديها لي فوق صدرها تيقبلها قبلة عامرة احاسيس عمرها داقت بحالها ... نوض عليها الشهوة و فيق ليها شهورا العذاب و الاشتياق و الحب..

هز راسو عليها و نطق: نبداو من جديد .. تنواعدك عمرني ..

قاطعاتو حتا هي حاطة ايديها على فمو: متواعدنيش.. متنحملش الوعود ..

حرك راسو بااه و باس ليها صبعها لي فوق فمو .. بتاسمات ليه باستسلام تتشوف الشهوة فعينيه ... سدات عينيها مستسلمة ليه و خلاتو يطبع بصمتو على جسمها و هاد المرة بخاتم اسمها هي شخصيا نور ايت فارس ....

خارج من الدوش لابس و مقاد كيف ديما ولف يلبس فالدوش حيت عارفها تتحشم .. مشا دار ساعتو و سرح ايدو فوق شعرو حسنو و قادو بحال الحسنة ديال العسكر جات معاه و بينات الرجولة و الفحولة لي فيه .. دوز ايديه على لحيتو لي عمرات و زادت زيناتو و بينات الوقار على وجهو ... نزل عينيه على الوشمة لي تتبان من عنقو و تنهد مصر باش يمشي يحيد الوشام كامل من غير اسم ابنو طبعا ..

تلفت جيهتها بان ليه غارقة وسط السرير شادا فليزار بطراف صبعانها .. قرب ليها حتا لمح وجهها حمر خارج من بين كتافها و شعرها مخبل شوية وراها .. جلس جنبها و حط ايديه على خدها .. نزل باسها و ناض وقف خرج خلاها ناعسة ..