حب من نار

25

للحب ثمن باهض يمكن تخلصو من طيبوبتك و يمكن تخلصو من شر قلبك ...

واقفة قدام الزااج تتشوف فيه شوفة حنينة ... خمس اشهر وهي تدعي ربي يشافيه ... مقدراتش تقول ياربي شافيه ليا حيت عارفة بلي متتعني ليه والو و الا فاق اخر وجه غادي يبغي يشوفو هو وجهها .... سدات عينيها تتنهد حاطة ايديها على كرشها تتأمل غد اجمل ...

ضارت جيهة الباب و دخلات سداتو وراها ... توجهات لجيهتو حتا وقفات جنبو عينيها عليه نااعس جثة متتحركش ... نبضو مزيان و دقات قلبو منتاضمين .. مؤشراتو الحيوية مزيانة و كلشي فيه تينبض بالحياة الا انه غايب عليها بالمرة... الأطباء مالقاوش سبب لهاد الغيبوبة الطويلة ... لي فسرو ان المريض رافض الحياة و صافي ...

جلسات حداه بابتسامة حزينة على شفايفها ... هزات ايديها دوزاتها على وجههو بحب ونطقات: انا جيت ..

تنهدات وكملات كلامها: عرفتك ماتوحشتينيش ولكن انا توحشتك بزاااف .. ولدك ولا بنتك بغاك تعرف بوجودو ... مكرهتكش تنوض و ترجع معايا دابا للدار .. مكرهتش نرجع نشوف الفرحة فعين خالتي .. حتا هما توحشوك بزاااف ...

نزلات بوجهها حتا تقابل مع وجهو و طبعات قبلة فوق خدو : مسامحة ليك على كلشي درتيه فيا غير فيق ... عفاك فيق دغيا مابغيتش نولد ولدي ونتا ممعاياش .....

ناضت وقفات حيدات الخامية على الشراجم حتا دخل الضو و اشعة الشمس قليلة بزاااف ... تنهدات و رجعات وقفات حداه: الجو ليوم زوين واخا كاين شوية الثلج... قبل مانجي عندك كنت فالجردة لي حدا الدار ... كانو وليدات صغيورين تيلعبو فرحانين و معاهم واليديهم .. ( حطات ايديها على كرشها تضحك) خاصك تفيق باش ولدي ملي يبغي يلعب يلقا حدااه بااه ...

تنهدات وجلسات حداه: باقي عاقل على اول مرة شفتك .. كنتي جالس حشمان قدام بابا .. من اول مرة شفتك عرفتك اتكون شي حاجة مهمة فحياتي.. تمنيت كن بغيتيني انا و مابغيتيش ختي .. كان كلشي غادي يكون مختالف .. تمنيت كن فهمتي نظراتي من اول نهار ليك فدارنا .. كنا دابا غادي نكونو فرحانين

هزات ايديها تتمسح فدموعها و الابتسامة الحزينة باقا على وجهها ...

داز الوقت بزاااف وهي باقا معااه تتهضر بلا ما تمل ... كل مرة تتزورو فيها تتنطق بمسامحة ليك ... واخا فغيبوبة و الاطباء اكدو ليها انه ماتيسمع ما متاصل بالحياة الخارجية .. ولكن متأكدة غادي يكون تيحس ... تتحاول تزرع فيه جرعة امل تخليه مايرفضش الحيااة كتر من هاكا ...

ضربها و بغاتو .. خانها و بغاتو .. كسر كرامتها و هدم كبريائها و باقا تتبغيه ... حاولات بزااف تخرجو من قلبها على اساس انه مايستاهلش كيف تيقولو كاع الناس ولكن مقدراتش ...

داز الوقت...

وقفات قدام دار زوينة ... خرجات و سدات طوموبيلتها ... شدات فجناب المونطو و دخلات للداخل...

كيف حلات الباب تلاحت عليها مشة بيضة غزااالة و عينيها زرقييين ... تحنات شوية حتا هزاتها عندها تضحك : توحشتيني هااا توحشتيني ..

مصغرة صوتها تتلعب معاها و تبوس فيها .. عنقاتها و كملات طريقها حتا للداخل...دازت من الجردة حتا وصلات للباب الدخلاني لي كان مردود... حلاتو و دخلات تدور فعينيها.. حطات المشة فالارض و مشات جيهة صالة متوسطة ... لمحات خالتها تتهضر فالتيلي ... حطات مونطوها على جنب و مشات حداها ...