حب من نار

58

مشا لبس حوايجو و خلاها تتفطر ..لبس و تقاد و رش ريحتو و خرج عندها ..

مهدي: انا غاادي ..

نور: نقدر نمشي لمول لي حدانا بغيت ناخد شي حاجة.

مهدي: اك و ردي البال انا نعيط ليك ..

باس ليها راسها و خرج لخدمتوو ... كملات فطورها و ناضت هزاات مشها و مشات لبيتها لبسات حوايجها ...

حلات بلكار مسدود بالساروت... هزات خاتم كان محطوط تماا .. بقات تتشوف فيه و تتنهد و عقلها سافر بيها لبعيد ...

#فلاش_باك
خرجات من غرفة القاضي و دموعها فعينيها ... هزاتهم فخووها و عودات هبطاتهم .. تقدم عمر عندها عنقها خاشيها فيه تيمسح ليها على شعرها... هز عينيه بان ليه يحيا خارج ورااها حالتو لا تقل عن حالها ..

هبط نظرو باسى و جر ختو من كتفها غادي .. كيف وصل لبراا سمع صوت تيعيط ليه .. وقف بلا مايتلفت عرفو شكون..

وقف يحيا قدامهم تيشوف فنور حادرة راسها تتبكي و عمر معنقها تيشوف فيه.. تنهد باسى و نطق بصوت كلو حزن : رد ليها البال هي امانتي عندك حتا ترجع تضحك لينا الدنيا ..

مجاوبوش عمر .. شد فختو و مشا ركبها فطوموبيل حدااه منهاارة بالبكااا .. هي لي بغاات الطلااق و هي لي بغااات تحرر ولكن احساس الفرااااق صعيب بزااف على كلشي ...

داازو ايام قليلة على طلاقها من يحيااا .. طول الوقت جالسة فبيتها متتخرجش... الماكلة تتجي حتا لعندها و موت ابنها و فراق الشخص لي اذاها سبب ليها فجرح كبير خلا نفسيتها ضعيفة بزااف و قلبها تيتقطع لطراااف ... طول ايام الاسبوع لي جلساتو فبيتها عينيها مانشفوش من الدمووع .. رافضة تشوف كلشي .. مها و باها و ختها و مرت خوها حتاا من عمر تيدخل عندها مرة مرة تتمتل عليه انها نااعسة ...

وصل نهار لي نهارت فيه بشكل كلي .. خرجات من بيتها تتمسح فدموعها.. ايديها على كرشها و عقلها تيقوليها ولدك باقي تماا .. تمشات فالكولواار لي تيجمع غرفهم كاملين .. وقفات قدام غرفة خوها .. كان الباب منفس شويا .. طلات بشوية بغات تشوف اريج حتا سمعات الكلام لي صدمها ...

كانت الباتول جالسة فوق السرير و بنتها ناعسة قدامها و عمر فجنبها .. محني تيبوس فبنتو و الباتول تضحك : ههه فنة فنة ربي يحجبها ..

هز عمر راسو تيضحك: اميين ..

رجعات الباتول تتشوف فبنتها و قالت موجهة كلامها لعمر : عمر .. دابا كن كنا من عائلة وحدة كانت بنتي اتخرج مشوهة بحال ولد نوور يااك ..

هز فيها عمر عينيه بعفوية مانوا والو وقال: منعرف

الباتول: حمد لله بنتي بخير .. كن كانت مشوهة بحال امجد كنت نمووت .. بنتي فنة فنة ..

رجعات نور للور حاطة ايديها على قلبها تترعد ... محملاتهمش علاش يجبدو سيرة ولدها وهو تحت الترااب .. طاحو دموعها ووجها حمااار غادي تنفاجر .. بقات مدة متكية على الحيط تترعد و كلام الباتول تيتردد فوذنيها ...

مسحات دموعها و كملات طريقها حتا وقفات قدام بيت قمر لي كانت تتبقا معاهم ع اساس تبقا قريبة من ختها .. حلات الباب بشوية و دخلات .. شافتها ناعسة و ايديها فوق كرشها لي باينة بشوية ... شافت فيها نوور بحزن و رجعات خرجات .. مشات جيهة غرفة واليديها .. بغات تشوف مها و تبكي عليها و تواسيها و تهضر و تلقا لي يشفق على حالتها لانها عياات و ملااات ...

وقفات قدام باب واليديها.. فتحات الباب من بعد مادقات و مالقات حد ... مسحات دموعها تترعد و هبطات لتحت للصالة لاول مرة من بعد مادخلات لهاد الدار .. وصلات جيهة الصالة و حبساتها كلام مها لي تقب قلبها كيف الرصاص... وقفات مصدومة تتسمع ليهم

كانت كلثوم جالسة جنب الحاج.. حاطة ايديها على ركابيها و تتهضر مع الحاج مفقوصة : علااش تتطلق علااش .. هي اللولة و لا للخرة لي ميبغيهاش الراجل .. عجبك الحال دابا جالسة ليا هناا .. صافي الولد مات الله يرحمو علاش تطلق من الراجل .. يخونها و لا يضربها و لا يدير لي داار تيبقا راجل تجلس و تصبر .. احنا كلنا صبرنا و جلسنا فديور رجالنا .. هاهيا قمر تبارك الله مالها ماتنوض حتا هي تطلق و تدير السبة بموت الولد .. صافي مات الله يرحمو ..