حب من نار

26

جلسات حداها حتا سالات المكالمة عاد شافت فيها: خالتي معامن تتهضري ..

قربات ليها زينة و سلمات عليها: جيتي ابنتي ..

حركات راسها بااه: يلاه دابا .. معامن كنتي تتهضري

تنهدات و قالت: مع بدر ... مبغاش يجي .. مقلق على يحيى بزااااف و مابغاش يشوف وجهو حتا وهو مغيب ..

نور: عفاك عطيني ندوي معااه نسولو غا على قمر .. تيليفونها ديما طافي ...

تنهدات زينة و قربات ليها : سمعي ابنتي اش انقولك ولكن ماتقولي لحد قلت ليك صافي ...

نور : خلعيتيني اش واقع ..

زينة: قمر حاملة ولكن حملها ماتابتش الاطباء قالو ليها خاصك تبقاي على ظهرك ع الاقل حتا يفوتو الشهورا الاولى

خرجات عينيها : و علاش ماقلتوهاش ليا .. واش ختي مانعرف عليها وااالو ... علاش متتجوبنيش .. مافهمت وااالو والله عفاك عيطي لبدر يعطيني ندوي معاها ..

زينة: الا عرفات قمر هادشي لي واقع معااك تقدر تعصب و تبغي تجي و تما حياتها و حياة البيبي ايكونو فخطر ..

تنهدات نور بحزن و رجعات اللور: دابا عاد فهمت .. قولو قمر مافخبارها والو .. و انا تنقول علاش ختي ماسولاتش فيااا ... اش اخر مخبين عليا اخالتي .. حتالين اتبقاو تخبيو عليا بحال انا درية صغيرة...

قربات ليها و شدات فإيديها: بلعكس ابنتي .. حنا غير خايفين عليكم و صافي.. مابغيتش ولادي يتعاداو و فنفس الوقت بدر مابغاش قمر تسيق الخبار حيت حقد على يحياا .. بغا يبقا بعيد باش مايديرش شي تصرف لي خايب ...

نور: هو لي ورا القضية حتا تسدات يااك ؟

حركات زينة راسها بااه: شكون من غيرو .. واخا كلشي مافاتش خووه ....

نور: قمر معارفانيش حاملة يااك .. ماقلتوش ليها على الحادثة

زينة: مافخبارها والو.. عمر قال بلي نتوما مسافرين

نور: و حتا انا قال ليا بلي هوما مسافرين..

زينة: عفااك ابنتي ماتقولي قلت ليك والو .. الله يرضي عليك

بتاسمات بحزن ووقفات: متخافيش اخالتي ... نخليك نطلع نرتااح

عطاتها بالظهر و مشات هزات مونطوها و طلعات مع الدروج.. فطريقها تلقات مع الحاج عيسى سلمات عليه و سول على حالها و ولدها .. خلاتو ومشات جيهة بيتها ..

جلسات فوق السرير تتنهد ... دغيا نزلو دموعها ملي تفكرات هضرة خالتها... حتا لهاد الدرجة ولات تتشكل تهديد على حياة ختها... حتا لهاد الدرجة غادي تخسر ليها نمط حياتها و تسلب منها سعادتها...

حطات ايديها على كرشها و رجعات اللور تكات على ظهرها تتبكي: سمحلي اولدي ماعرفتيش معنى السعادة معايا . سمحلي بزاف مقدرتش نفرح ونتا فكرشي .. عشتي معايا غير الايام الخايبة و الصعيبة ولكن تنواعدك غادي نعوضك على كرشي ..

دازو يومين ...

ناعسة على ظهرها عرقانة واخا الجو باارد ... مخشية وسط المانطة تتنفس بشوية... تحل عليها الباب و دخلات زينة لابسة بينواار تتجري . وقفات فزق راسها وحطات عليها ايديها تتحرك فيها: نور نور .. نور فيقي ... نووور

حلات عينيها مخلوعة .. توضحات الرؤية و شافت وجه خالتها عاد قدرات تنفس ... ناضت جلسات شادة من جناب كرشها فيها شوية الوجع : خالتي مالك...

زينة تدوي بالزربة: يحيااا يحيااا .. نوضي فااق ..

خرجات عينيها ووقفات بالزربة ناسية الوجع: شنوو ... يحيااا فاق .. شكون قالها ليك ... حلفي .. فاااق بصح ..

حركات زينة راسها بااه شادة فيها: عيطو ليا دابا من المستشفى ... لبسي باش نمشييو يالاه ..

حركات راسها بااه... شافت خالتها حتا خرجات و جلسات فوق السرير تتنفس بالجهد ... صافي دعوتها تقبلات وهو صافي فاق ... صافي رجع للحياة و رجت للواقع ولكن السؤال تيبقا واش رجع يحيى لي شافت اول مرة و لا باقي هو نفس الشخص اللي لابس شخصية الانتقاام ...

هزات عينيها فالمرايا تتسرط فريقها .. بانت ليها 11 ديال الصبااح .. ليوم تعطلات فالنعاس بزاااف ممولفاش ليها ...

نزلات براسها التحت تتشوف فكرشها .. حطات ايديها عليها تترعد خايفة... هاهو فاق و من بعد .. صافي غادي يرجع يمرمدها و ايرجع يهدم كرامتها لي ليها شهور تترمم فيها ...

وقفات تتنفس بالزربة قلبها تيضرب... تتحرك فراسها يمين و شمال تتطرد الافكار الخايبة.. هو اكيد تبدل .. مايمكنش يدوز عليه هادشي كامل و يبقا لابس قنااع الغذر ...