حب من نار

41

حل عينيه على شميسة خفيفة داخلة من الزااج ...

هبط عينيه لوجهها و هو يبتاسم ... حتا فنعاسها هادئة .. كيف خلاها باقا...

هز ايديه تيحرك صباعو فوق خدها عاجباه رطوبية وجهها ....

حلات عينيها على لمسات فوق خدها ... جات عينيها فعينيه .. مدرات حتا ردة فعل .. بقات تتشوف فيه و هو تيشوف فيها و صباعو تيتحركو بحنان خلاوها تبورش ...

بقاو مدة تيشوفو فبعضياتهم ... الفم ساكت و لكن العين تتنطق بالاف الكلمات فالثانية...

هبطات عينيها للحظة و نطقات: صباح الخير..

جمع ايديه لعندو و ضار على ظهرو: صباح النور ..

جلسات شادا فكرشها و ضورات عينيها فالساعة : نعست بزااف ..

حط ايديه ورا عنقو تيشوف فيها: من بعد.. نعسي حتا للظهر كااع ..

ضورات وجهها شافت فيه بنص عين ورجعات شافت قدامها... وقفات و مشات نيشان للحماام ...

ناض حتا هو تيطرطق فعنقو و خرج من البيت ..

دااز الوقت..

خرجات ببينوار .. دورات عينيها مالقاتوش ... جلسات قدام المرايا تتشوف فانعكاس صورتها .. هبطات عينيها للروايح لي محطوطين وهي تهز وحداا .. قرباتها لنيفها و سدات عينيها تتستنشق ...

تحل الباب و دخل منو فإيديه باليزاتها ... ضور عينيه شاف فيها... وقف حاط ايديه على خصرو مبتاسم نصف ابتسامة...

حلات عينيها.. يلاه اتحط ديك القرعة وهي تجي عينيها عليه من المرايا .. خرجات عينيها ولات حمراا ... حطاتها بالزربة و وقفات تتشوف فيه: يحسابلي خرجتي..

حرك حجبانو جيهة الباليزات زعما مشيت جبتهم .. رجع شاف فيها تيضحك و دخل للدوش خلا وجهها حمر ...

جلسات فوق السرير تضرب فحنكها على تصرفاتها ديما فارشة راسها ...

ناضت لبسات حوايجها دغيا و نشفات شعرها .. حطات لوازمها حدا روايحو فوق الكوافوز .. بغات تستف حوايجها ولكن فيها الموت ديال الجووع متقدرش تزيد كتر من هاكا ..

خرجات من البيت تتقاد فخاتم زواجها فإيديها.. هبطات التحت و توجهات للصالة ..

لقات زينة جالسة صبحات عليها و جلسات حداها

زينة: نعستي مزيان ابنتي ..

نور: حمد لله .. فين عمي ؟

زينة: مشا الصباح بكري للشركة .. الوضع مأزم شوياا و تيحاول يقاد داكشي علاش قد ..

حركات راسها بااه

زينة: سيرس ابنتي تفطري راه كلشي واجد فوق الطبلة...

نور: نعست بزااف يااك

زينة: ماشي مشكل ابنتي .. لي عجيك ديريه .. سيري ماتخليش حفيدي بالجوع..

بتاسمات ليها و مشات جيهة طبلة الفطور .. جلسات و هزات عينيها فالدروج تتسنا فيه يهبط ..

ماشي بزاف باش لمحاتو هابط تيسد فساعتو ..

مشا لجيهتها و حلس حداها .. بداو تيفطرو بلا هضرة ...نور فيها الجوع محساتش براسها حتاا سالات كاع الماكلة لي فوق الطبلة.. .

هزات راسها تتمسح ففمها تتنفس بصعوبة من كترة ماخشات الماكلة ...

شافت فيه لقاتو حاضيها تيشرب فكاسو ...

نور: بغيت نشوف ماما ..

يحيا: واخاا ... جيبي مونطوك انا نتسنااك ..

حركات راسها بلاا تتسرط فريقها: ايجي عمر يديني ..

حرك راسو بااه ووقف: خلي تيليفونك شاعل .. فالعشية انجي نجيبك ..

نور: واخاا ..

بقات تتشوف فيه حتا غبر على عينيها... عرفاتو غادي للشركة حيت الوضع ماشي هو هدااك و باه غادي يبغيه يكون معااه ..

خارج تيقاط فجاكيط فوق كتافو بايد و ايد لاخراا شاد بيها تيليفون... هز عينيه و جات فعينيه نيشان....

بقاا واقف شحال تيشوف فيه.. تيقول مع راسو الدنيا دوارة .. شوف كيف كانو و كيف ولااو ... فرمشة عين الصديق يمكن يولي عدو ...

تنهد و ركب طوموبيلتو و كسيرااا... عارف راسو غالط فبزاف ديال الناس و اولهم نوور ... تيحاول يصلح شويا بشويا ... نور هي الوحيدة لي معطاتوش بالظهر واخا هي اكتر انسانة اذى فهاد الدنياا ...

ايفهم راسو و يعرف اش باغي داك الساعة يمكن ليه يطلب السماحة من كل واحد اذى بتصرفاتو ...

هبط عمر عينيه معصب .. محاملش يشوف وجهو و كن ما ختو كن دار معاه تصرف اخر ... هز تيليفونو و صونا ليها

هزات تيليفونها و جوبات : الوو ..

عمر: انا براا هبطي و لبسي مزيان راه البرد ..

نور: واخاا...

هزات مونطوها لبساتو و هزات ساك حطات فيه تيليفونها و خرجات من البيت خلات البنت لي تتعاونهم تتقاد ليها فالحوايج فالبلاكار...