حب من نار

43

الايام تدوز و كرش الباتول غادا و تتكبر ... شهرها دخل و الخلعة دخلات معاها ... الدار عامرة و شي داخل شي خارج ... العلاقة بين زينة و كلثوم رجعات كيف قبل و هاهما بجوج غادين جايين تيوجدو للحفيدة الاولى ليهم فالعائلة ..

علاقة عمر و خواتاتو غادا و تتكبر و تتعمق و تتربط بخيط قاصح صعيب شي واحد يقطعو ...

حياة نور تبدلات و لات الضحكة عندها مسار فوجهها و وقتها عمر مع الباتول ... كل نهار عندها تيتجمعو و يضحكو و يهضرو على حملهم غا الفرق فالباتول خايفة و نتوترة و نور غا تضحك و بغات امتا تشد ولدها بين ايديها..

كل نهار شادا ابيل فيديو مع قمر و توريها الجديد و شنو طرا اكيد بلا مايجبدو المسائل القدام ... كل واحد مخبي فقلبو احزانو و كل واحد ساكت و صابر على قبل الغير ...

حياة يحيى تبدلات كاملة ...الشركة رجعات طلعات اسمها من جديد و اسم الزايدي ولا تينافس كيف قبل و ماخلاش داك العام ديال المصائب يأتر عليهم ..

ولات حياتو فالخدمة ... النعاس فالوقت و الفطور فالوقت و العشا فالوقت... ممنوع السهرات ممنوع الخرجات لي ماعندهم حتا معنى ... عينيه استقرو فنقطة وحدة ولي هي وجه نور ... رجع ماينعسش الا مكانتش حدااه واخا الهضرة بيناتهم قليلا و اغلبية الاوقات تيهضرو بتصرفاتهم لاغير ... تيحاول يصلح من نفسو و يرجع يحل قلبو و يبغي الناس لي تيبغيوه و مايقلبش على الحب فقلب ماعندو بلاصة فيه ...

كيف كل صباح حلات عينيها تترمش بالتقالة .. حطات ايديها على كرشها تدوزها بلطف و تبتاسم بثبات ...كملات سبع شهور و تتجس بجنينها نهار على نهار تيكبر و يقولها ماما مابقا والو و نجي لهاد الدنيا ....

ناضت جالسة و مع هزات عينيها شافتو خارج من الدوش لابس حوايجو و تيمسح فشعرو بفوطة ...
هزا عينيه بانت ليه فايقة و هو يباتسو و قرب ليها .. جلس حداها و حط ايديه على كرشها: صباح الخير ... نعستي مزيان ..

حركات راسها بالايجاب: بخير.. مخدامش ليوم ..

يحيا: لا خديت اليوم نرتاح شويا .. نوضي نفطرو فشي بلاصة ..

بتاسمات بلطف وناضت وقفات .. عاونها حتا دخلات الحمام و رجع يبدل بحوايج الزنقة ...

راكبة حداه حالة الزاجة ... شعرها تيتطاير وراها طوال شوية على لي كان ... ... لابسة كسوة صيفية بحكم الجو بدا يسخن و فصل الربيع دخل  ...

وقف فالسطوب و ضار عندها شافها تتحرك ايديها على شعرها : فين سهيتي ..

.شافت فيه: حتا بلاصة ..

نزلات عينيها و عودات شافت فيه : الصراحة بغيت نقطع شعري ممولفاش بيه طويل تيقنطني ..

مد ايديه بابتسامة تيقيص فشعرها: بالعكس جاك زوين .. غا خليه طوييل ..

حركات راسها بالنفي: تيقنطني ولفت القصير ..

يحيا: اوا صافي نفطرو و نديك فين بغيتي قاديه ..

فرحات و شكراتو و رجعات تتشوف فالشرجم ساهية و ايديها ديما على كرشها...

جلسو فمقهى راقي وسط مركز كبير فيه صالات الرياضة و المسابح و المطاعم مشتتين كل وحدة فقنت ... جر ليها كرسي على طبلة جات وسط الناس وكل واحد فين جالس تيشوف قدامو و حاضي لي معاه ...
جلس حداها بثبات و جر ليها الموني: شنو تفطري ..

شداتو من عندو و بدات تقرا حتا ققرات شنو بغات و لباا ليها الطلب ... تحط داكشي لي بغات و بدات تتاكل بالتقالة تتمذق داكشي لي تتخشي ففمها و تبنن بيه ...

جالس حداها تينقب من طبسيل ليفخوي لي حدااه و ايديه و را كرسيها تيشوف فيها و مرة مرة يدور عينيه فلونتوراج لي حداهم ..

هزات راسها حاطة ايديها على كرشها و قالت: الحمد لله شبعت ..

هز مشوار مسح ليها فمها: بصحتك ...