حب من نار

86

بعد مرور سنتين ...

جالسة فبالكون تتشوف فغروب الشمس ... حاطة ايديها على كرشها منفوخة قدامها .. لابس كسوة فالاصفر بارد و طالقة شعرها ...

هبطات عينيها للتحت تتشوف فليلي و اكيرا تيلعبو حداها و فجنبهم جوج قطوط صغيورين لونهم رمادي فاتح ...

بتاسمات و وقفات بشوية عليها دخلاتهم للداخل كاملين و سدات البالكون و خلاتهم تيلعبو فالبيت الداخل ...

خرجات من بيتها و مشات نيشان للكوزينة .. جبدات من الثلاجة عصير فواكه كباتو فكاس و جلسات فوق الكرسي تتشرب فيه...

تحل الباب و دخل منو هاز بوكي ورد ابيض و ساشية فإيديه .. لمحها جالسة و مشا نيشان عندها ...

وقف وراها و مد بوكي الورد حطو ليها فوق كرشها . بتاسمات و شداتو من عندها: شكراا ..

باسها فخدها و وقف جا قدامها جر كرسي جلس قدامها: توحشتك ..

نور: تعطلتي اليوم ..

ضحك و هز الساشية مدها ليها : حيت بقيت تنقلب لمرااتي على كاس الطين و بالقطراان .. مجاها توحم على القطران غا فباريس . .

شدات من عندو الساشية و جبدات كاس قطران و كلة متوسطة تاع الطين عامرة قطران ...

خشات الكاس فنيفها تتشم : الله شحال كنت موحشة هاد الريحة..

يحيا: بصحتك احبيبة ..

وقف باسها فراسها و قال غادي جيهة البيت: انا نخرج ندير العشا بلا متعذبي ..

دخل للبيت بانو ليه القطوط تيلعبو و كل واحد فين مخشي .. هز ليلي لي تيحماق عليها باسها تيلعب معاها حتا تلاح ليه اكيرا على رجليه تيقمش فيه . لاح ليه يحيا ليلي فالارض و قال تيضحك: حتا نتا وليتي تغير مني باااز ..

مشا بدل حوايجو و غسل حالتو و خرج لقاها واقفة فالكوزينة تتقطع فالخيار ... مشا حداها و حيد ليها الموص من ايديها: قلت ليك انا انطيب ..

نور: عيقت عليك كل نهار تطيب ..

بتاسم و عنقها باسها فراسها: نتي غا رتاحي و ولدي ليا هاد الفناكش خلااص .. راني عيت صابر .

نور: ههههه مابقاا والوو ...

جلسها فوق الكرسي و وقف تيقاد فالسلطة و قلا الفريت و دار اطباق جانبية ..

حط العشا و تعشااو فجو ضاحك ... الحياة بين نور و يحيا ولات كلها سعادة ... حبهم زاد كبر و علاقتهم زادت تودطات .... اول ماتزوجو سافرو لتركيا دوزو فيها شهر من احسن الاشهر فحياتهم ...

يحيى ولا شخص اخر و حبو لنور غطاا على جميع الاغلاط السابقة .. بغاها من كل قلبو و واعد راسو انه يعوضها على كل شيء فات و فعلا وفا بالوعد ديالو ...

استقرو فباريس فشقة يحيا تحت طلب نور .. الشقة لي كانت جامعاهم و مكفياهم و كل قنت فيها تينطق بالراحة و السعادة ...

دازو عليهم ايام صعيبة كانت نور تتشرب فيهم دواء منع الحمل ... الشيء لي مكانش تيعجب يحيا وكان تيخلق ليهم مشكل ولكن ملي تيتفكر لي داز عليها و انها خايفة تيرجع يطلب منها السماح على غواتو و تيواسيها ...

يوم على يوم تيدخل ليها فكرة الولاد بطريقة زوينة و يحاول يخرجها من العقدة الاولى لي اتسببات فمنعها من انجاب الولاد ...

من مورا عامين ديال الزواج و اخيرا حملات نور ... فالاول كانت خايفة بزااف و خافت يتعاود يتكرر معاها نفس القدر ولكن هضرة الطبيبة كانت جد مطمأنة ... مع مرور الاشهر و كبر كرشها دغيا كتاشفات ان عندها التوأم و التحاليل الطبيبة و الايكو بينو انهم فصورة كاملة و مكاين حتا تشوه...

بكات و حمدات الله و كيف اي ام تتبغي ولادها يكونو كاملين و تفرح بيهم... ذكرى امجد عمرها فارقات بالها و كل نهار تترحم عليه ..

علاقتها مع واليديها زوينة بزاف كيف اي ابنة مع واليديها... علاقتها مع ختها رجعات كيف قبل وعلاقتها مع عمر زادت كبرات ...

الاخوة شي حاجة ثمينة فحياة نور لي مقدراتش تستغنا عليها ... كيف مقدراتش تستغنا على حبها ليحيااا .. زاد كبر فعينيها بتصرفاتو العقلانية و بالمنطق ديالو لي تيخليها تقبل اي حاجة و تيفهمها كلشي بلا مايعاتبها ولا يقلل منها ...

الحياة مطبات يمكن تضحكنا و يمكن تبكينا ..حكاية نور كانت حزينة و تعلمات فيها بزاف ديال الدروس خلاو حياتها من بعد تكون هادئة ...

الحب الحقيقي ماشي ضروري يكون هو الحب الاول .. يمكن في يوم نقولو بلي هادا هو الشخص المناسب لينا و من غيرو منقدروش نعيشو .. ولكن تيجيو احداث و مشاكل تيبينو ليك بلي هداك ماشي حب و مجرد نزوة او اعجاب او او ..

الحب الحقيقي تيحمل فطياتو الكتير من المعاني .. الحب الحقيقي تيخليك تشوف شريك حياتك و تقول مع راسك معرفتش شنو تنبغي فهاد الانسان . الحب الحقيقي تيخليك تبغي بقلبك و بعقلك و بكل جوارحك .. الحب الحقيقي ممكن تلقاه فسن مبكر ممكن تلقاه فالعشرينات و لا الثلاثينات و يمكن متلقاهش نهائيا ..

حب يحيا و نور كان حب حقيقي .. خلا يحيا ينسا فيها قمر و يعرف انها عمرها كانت حب حقيقي .. بقات مجرد ذكرى زوينة ... مع نور عرف معاني جميع الاحاسيس .. مع نور معرفش يتحكم فقلبو .. مع نور جرب احساس الابوة و معاها عرف معنى السعادة الحقيقية لي تتربط بالعلاقات الاجتماعية و بحسن الظن و طيبة القلب ...

حكاية نور و يحيا كانت عبرة لكاع افراد العائلة .. علاقة بدات بزواج مزور و سالات باحداث كتيرة عرفو فيها قيمة بعضهم ..

النهااية
ماسخيتش بيكم بنياتي ولكن لكل بداية نهاية و تيسالي شي باش يجي شي
نتمنا نكون خفيقة على قلوبكم و تكونو عشتو معايا احداث قصتي البسيطة
قصة ماقصيرة ما طويلة انا ماعيتش و نتوما مامليتوش
كيف ديما مرحبا بأي انتقاد كيفما كان و مرحبا بأي كومنت كيفما كانت
تتبغيكم بزاف وحدة وحدة
نتلقاو فقصة جديدة باحداث جديدة و شخصيات جداد
استودعكم الله الذي لاتضيع ودائعه