حب من نار

54

هبطات نظرها ببطئ و مدات رجليها تمشي .. عاود بغا يشدها من ايديها ولكن حبساتو ايد قوية .. هز راسو باسى شاف فعمر واقف عليه و الغضب تيشع من عينيه .. حرك راسو بلاا بمعني بلا متحاول .

بعد يحيا تيشوف فيه و نطق تيغوت: نتا مرتك و بنتك بخير و حياتك بخير بلاا ماتخسر ليا حياتي اعمر..

دفعو عمر من كتفو بغضب و غوت : حياتك خاسرة من نهارك اولد خالتي

هز عليه صبعو بتهديد و كمل: فرق علييك ختي ايحيا و لا مغاديش نعقل عليك

وقف جامد تيشوف فيه شاد فيها و مدخلها للطوموبيل .. الشياط ناض فيه و العافية شعلات فيه ... يلاه غادي ينقض عليه و هو يشدو بدر من اللور كارز عليه ...

واقف تيتركل وسط ايديه ولكن مقدرش يتفك منها حيت شادو منو اللور ...

نزل على ركابيه من بعد ماطلق منو بدر. تيشوف فالطوموبيل غادا .. غمض عينيه بانكسار و هنا تأكد بلي خسر جوج الارواح هاد النهاار ..

بعد مرور سنة و نصف ..

جالسة فبالكون متوسط .. تتشوف فالسيارات غادين جايين .. على ركابها قط لونو رمادي مغلوق مع عينين بنيين كبار تدوز عليه ايديها ببطئ ...

تنهدات بشوية و حطات القط فالارض . دخلات الداخل حتا وقفات وسط بيت النعاس .. وقفات قدام المرايا و هزات ايديها تدوزها على شعرها ... تلفتات جيهة الباب و خرجات لبرا ..

مشات جيهة الكوزينة لي محلولة على الدار.. وقفات حدا واحد المجر و جبدات منو اندومي .. دارتها فاالما و قاداتها عاد حطاتها فوق البوطة ...

حطات ايديها بجوج على البوطاجي راسها التحت ساهية تتسنا فمكلتها توجد .. سافر عقلها لبعيد و على حادثة دازت عليها سنة و نصف ..

فغرفة كبيرة و قدام قاضي الاسرة وقفات .. شافت فيه ببرودة و نطقات بجدية: بغيت نطلق

القاضي: ولكن خاص يكون سبب ابنتي .. ان ابغض الحلال عند الله الطلاق ..

هزات فيه عينيها بتحدي و قالت: بغيت نطلق

حرك القاضي راسو بلا حول الله حيت من الصباح وهي تتعاود نفس الكلمة ... شاف فالطرف الاخر و نطق: ونتا اولدي .. باقي على رأيك

هز يحيا راسو من بعد ماكان حادرو تيخمم . شاف فيه و نطق: مغاديش نطلق..

سد القاضي عينيه بتعب و نطق: كاين شي فرصة للصلح .. هادي اخر فرصة و اخر جلسة فكرو مزيان

وقف يحيا داير ايديه فجيبو و شاف فنور بقسوة : مغاديش نطلقك

حولات راسها لعندو و نطقات ببرودة : بغيت نطلق

هبط القاضي راسو تيتنهد و هزو هزة وحدة مع ضربة بالمطرقة : يحيى الزايدي رمي عليها يمين الطلاق و دابا قدامي

فاقت من سهوتها على الشياط عاطي من الكسرونة... هزاتها بالزربة لقاتها كلها لسقات .. افأفات و حيداتها حطاتها فلفابو غسلاتها و عودات دارت وحدة اخراا ...

جلسات فصالة مونجي وسط الكوزينة و بدات تتاكل بشوية ...

هزات عينيها فالباب ملي سمعاتو تحل .. ابتاسمات بفرحة ووقفات مشات لجيهتو .. تلاحت عليه عنقانو و حتا هو حط ايديه على خصرها هزها عندو

دارها قدامو و شد وجهها بين ايديه تيضحك: توحشتك ..

بتاسمات بخجل و رجعات اللور .. شدات من عندو فاليز و دخلاتها الداخل ..

دقات عليه فالبيت جوج دقاات و نطقات بشوية: مهدي وجدت ليك الحمام ..

حل عليها تيضحك و شدها من ايديها دخلها الداخل .. وقفات قدام بزاف ديال لي كادو ملفوفين .. بتاسمات و شافت فيه: ديالي ..

حرك راسو بااه: كلشي ديالك..

ضحكات بشوية و جلسات فوق السرير تتحل فلي جا قدامها..روايح و كساوي و حوايج ماركات .. برودي لي تدير و صنادل ديال الطالون ..

هزات فيه راسها بابتسامة: شكراا بزااف هادشي زوين ..

عنكش ليها شعرها بحنية و نطق: يلاه ديهم لبيتك انا ندوش و نجي .