حب من نار

51

فعز المضاربة و الدفيع و الكلام الخاسر .. واحد تيدافع على كرامة ختو و واحد باغي يطلع يشوف مرتو باي طريقة ..

كلثوم تغوت و زينة تجذب و قمر شادا قنت تتبكي و توقف و ترجع تجلس تالفة و الدنيا ضايرة بيها ...

وسط هاد الصداع هابطين رجلين صغيورين كدام حمرين و صبيعات صغيورين نقيين ... توب ابيض مدلي عليهم .. كانت نور لابسة توب ابيض طويل حتا رجليها... هازة بين ايديها كبدتها تتشوف فيه بابتسامة حارقة .. عينيها ناشفين و شعرها مدلي عليها .. نزلات راسها بالشوية قرباتو ليها استشنقات ريحتو و باستو و رجعات ليه الغطا على وجهو .. شافت قدامها و هبطات بثبات و صوت الصداع واصل ليها حتا لوذنيها...

تلفتو كاملين مصدومين .. الحركة حبسات و الكل تينهج و يشوف فيها مصدوم... عينين قمر خرجو و هي تتشوف ختها قدامها ذابلة رغم الجمود لي فوجهها...

واقفة نور قدامهم و كل واحد فيهم رصا على الحركة لي كان فيها كانهم فيلم تلفازي و دارو ليه بوز ...

يحيا وجهو فيه بعض قطرات الدم.. شافها قدامو و هو يخسر ملامحو بحنية و باسى ..يلاه ايمد رجليه جيهتها وهي تنطق صدماتو : حبس عندك ..

وقف تيشوف فيها باغي يبكي .. مخرج عينيه مصدوم باغي يمشي يشد ولدو ويقول ليها انا راضي بيه كيفما كان و سمحيليا ..

هزات نور عينيها فيهم واحد واحد.. تتشوف فيهم و تتبتاسم بسخرية .. قربات خطوة و الثوب الابيض لي لابسة تابعها ... قردات فالارض و حطات رضيعها ملفوف فثوب ابيض و رجعات وقفات و هنا صدمات الكل بكلامها

شافت فيهم واحد واحد حطات ايديها على قلبها و دوات بصوت خالي من العتاب و خالي من القسوة و خالي من الكره كأنها تتقوليهم نتوما كلكم لاشئ ماتتعنيو ليا والو باش نحس باتجاهكم شي احساس

شافت فختها هي اللولة و رجعات شافت فعمر و رجعات نظرها لبدر و رجعات ليحيا و هنا استقر نظرها و نطقات: تدابزو على هاد الطرف ديال اللحم.. جسم هزيل و ضعيف قدر يدير فيكم هاد الحالة كاملة .. غادي نفرحكم بلا مدابزو .. ولدي مات .. كبدتي ماتت و الحمد لله طير من طيور الجنة . انا فرحانة بزاف ولدي معاش وسط منافقين بحالكم .الحمد لله ولدي ايعيش حياة زوينة مع ملائكة بحالو . ولدي جا لهاد الدنيا باش يوريني وجه الناس لي حاسباهم عائلتي و فضلت سعادتهم على سعادتي.

قربات قدام يحيا و كملات: شفتي فيه بنظرة عمرني ننساها و رمقتيه بشوفة كلها احتقار.. رضيع صغير قدر يرجعك على حقيقتك.. من نهار عرفت عندي ولد مشوه و انا تنطلب الله يكون باه قد المسؤولية و مايكملش داكشي لي بدا ... ولدي عاش معايا المرار لي وكلتيني ... ولدي جا نتيجة غلطة كان بااه تيشوف فمو وجه بنت خراا و يعيط ليها بسميت مرا خراا .. ولدي جا و هو عارف باه واحد خاين و مايستاهلوش .. شهر و انا مسدود عليا بلا ماكلة تقد و لا ما نشرب .باش نولف الوحدة لي زرعتي فيا بديت نشرب الشراب لي تتجيب و نسا الحزن لي دخلتيني فيه .. تنشرب و نتا تتجي تلاح عليا و سكران و معارفش كاع واش لي معاك نور و لا قمر ولا سكرانة و لا فوعيها ... صبرت للذل و صبرت للاهانة ولكن نهار عرفت راسي اش عندي فات الفوت صبرت و قلت ولدي ايبين ليا وجوه الناس لي معايا و لي دايرين بيا ..

رجعات للور تتشوف فيهم بحقد كاملين و وجهات كلامها لقمر: نتمنا تكوني فرحانة اختي و نتمنا ليك قدر حسن من ديالي . دوماج خطتنا فشلات و ضريبتها كانت غالية بزااف .

شافت فزينة و كلثوم: كن كان ولدي ولد الدنيا عمرني كنت انتشرف و نقوليه ها جدواتك حيت ماتستاهلوش .. حيت نتوما ناس تتأمن بالمظاهر و ولدي ماشي من مستواكم ..

رجعات باللور حتا وصلات لدريجات صغار تيطلعو للباب الخارجي و نطقات: دابا جا وقت الجنازة ديال بصح و قبل مانسا طلقني ايحيا

رمات كلامها و عطاتهم بالظهر خلاتهم مصدومين .. ماطيحات حتا دمعة و كلامها مكان فيه حتا حزن . لهاد الدرجة صبر هاد الانسانة قادر على هادشي كامل ...

طاح يحيا على ركابيه حدا الثوب الابيض ... عينيه حمرين قربو يقطرو الدم تيترعد و عرقان .. مد ايديه حيد داك الثوب حتا لمح وجه ولدو لي مالحقش يشوف فيه شوفة كاملة.. هزو عندو باسو كلو تيترعد و رجع غطا ليه وجهو تيبكي .. عنقو عندو كارز عليه ووقف مشافش فيهم و طلع مع الدروج و كلام نور باقي فوذنيه ..