🔥لهيب الهوس 🔥( مكتملة)

part46

بسمة ناعمة
البارت 46: كوثر: آشمن عدة؟؟ ياك داك النص راجل مادخلش بيك؟؟
هبة: اه مادخلش ولكن راه ق.. قاصني يعني ممكن يكوون...؟؟
قاطعاتها بالغوات: آش يكون آش؟؟ دابا ختى داك الرويجل يقدر يسجل الأهدااف؟؟ وزايدون ياك جاتك العادة او لاا...؟؟
حركات هبة راسها وشافت فيها كوثر بشك وقللات من نبرة صوتها: شنو عندك أهبة؟؟ واش ماقلتيش ليه بللي نتي باقة بنت؟؟
هبة: لا ماقلتش... خايفة اكوثر خايفة من الزواج بززاف... حتى سمير كان كايعاملني مزيان فاللول ومللي تزوجنا عذبني...
نقزات غزلان: أويلي حاي دابا كاتقارني هاد السيد بديك الجرانة؟؟
شافت فيها مريم: ونتي كاتعرفي هاد السيد كيداير؟؟
غزلان: وايلي مانحتااجش نشوفو غير على التعاامل ديالو معاها وعلى الخوايج وداك الشي لااخوور راها باينة كاين فرق كبيير...
كوثر: من داك الشي للي عاودتيلنا باينة كايبغيك وباينة فيه الرجولة ومختاالف بززاف على دااك القرد للي كنتي واخدة... ماتخلليش تجربتك اللولة تحطمك... وماتنساايش بللي سمير كنتي تهربي تلاقاي معاه وتكرهي تجبدي سيرتو أما هاد تاج مللي كاتسمعي حسو عينيك كايلمعو.. كاين فرق أهبة كاين فرق كبير...
هبة: مااعرفتش... ماقادرة ندير حتى خطوة... ماغانتصرفش بغيت الأمور تبقا هاكا على الأقل غي. حتى تسالي هاد المدة ديال العدة
مريم: وبغيتي تبقاي عايشة هاكا كاتباتي معاه باا حتى شي قانون حتى تسالي العدة؟؟
تنهدات كاتفكر حتى نطقات كوثر: ماغانبززو عليك والو ولوكان كنا رفقة سوء غانقولوليك دجاجة بكامونها لصقي فيه شي كرش باش يبقا معاك... ولكن حنا خواتاتك وبغينا ليك الخير... ديري شي حل... ونساي الماضي ماتخلليهش يوقف فطريقك..
غزلان: غير نصائح من عندنا ونتي تعرفي
كوثر: اه حنا غانبقاو ديما صحاباتك وللي درتيها ماغانقلبوش وجوهنا عليك... ويلا قصحت معاك الهدرة غير حيت كانخاف علييك...
ابتااسمات وقربات لعندها معنقاها: لهلا يخطيك عليا... بادلاتها حتى هي العنااق... ولاخرين كايشوفو فيهوم ضاحكين وكايحمدو الله حيت تصاالحو...
بعدو على بعضهوم وناضو خارجين من لافاك حتى سمعات التيلي كايصوني... وصوت ميساج حلاتة لقاتو كاتبلها بللي كايستناها حدا لافاك وتعطلاات... عضات على شنافتها كاتفكر حتى جبدات كوثر كاتوريها الميساج: شنو ندير؟؟
كوثر: إلى كنتي كاترتاحي معاه وتايقة فيه غير سيري معاه...
حركات راسها بالنفي: لا مابغيتش نمشي... الشيطان كيف قلتي كايحضر
كوثر: وصافي خرجي لعندو شرحيلو كلشي وقوليلو للي كاين عاوديلو الحقيقة باش يجي يخطبك... قبل ماتكمل هدرتها ضغطاتلها على يدها كاترعد: ل... لا مابغيتش يخطبني مامستاعداش أكوثر
تنهدات كوثر كاتشوف فيها: علااش مابغيتيش ياك كاتبغيه وحتى هو كايبغيك شنو للي مانعك؟؟
هبة: رجعات عندي فوبيا من الزواج والخطوبة... ماعنديش استعداد ندخل فنفس التجربة
كوثر: الله يهديك أهبة واش نتي كاتقارني بين زواجك لبي داز وهذا للي جااي؟؟ انا ماكانعرفش هاد تاج ولكن جاني حسن من سمير وبززاف
هبة: عارفة عارفة... هو حسن منو بززاف مايقدر يوصلو حتى ب1٪ ولكن نتي ماعارفاش للي داز عليا كنت كاتقول نسلك غير من هذي ماعمرني نجبد سيرة الزواج على فمي
كوثر: وهذا فارس أحلامك للي ماكنتيش متصورة غايكون فالواقع... تخافي ضيعيه وتندمي
حركات راسها بالنفي: لا.. هو كايبغيني ماغانضيعوش... ولكن رجعات عندي فوبيا من الزواج والخطوبة
كوثر: أوووففف.. وشنو المعمول داابا؟؟
هبة: يالله نخرجو من الباب لااخوور
كوثر: واش غاتهربي؟؟
هبة: هو عصبي شوية ماغايفهمش إلى شرحتلو.. خللي حتى لمن بعد ونشوف كيف ندير دابا غير يالله نخرجو...
كوثر: واخا للي بغيتي
ضارت كاتقلب على لبنات لقاتهوم مجمغين مع شي بنات آخرين أشارتلهوم ومشاو خارجين من البااب اللورااني وكوثر كاتعاودلهوم شنو وقع
غزلان: دابا من هاد الشي كاامل التيتيز كاين على بررا؟؟ حرام علييك وريهلناا...
خنزرات فيها هبة: انا كانشكي عليكوم ونتي كاطنزي عليا
ميقات فيها: وصافي حتى نتي شحال قدك تبقاي هاربة
مريم: ماعرفت علاياش ناوية؟؟ أنا غير عاودتيلي عليه بديت نحبوو... خنزرات فيها: جمعي رااسك..
مريم: أححح كانشم ريحة الغيرة..
.....
كان جالس فالطومو متكي على الكوسان اللور حاط يدو على الفولون عينيه على باب لافااك كايستناها تخرج وكل مرة يصوني عليها وماماتجاوبش وماجاوباتش حتى على الميساج... عض على فموو معصب.. ياك وضحلها كلشي شنو كاتحاول دير وفين هي دابا؟؟ نزل من تما داير يديه فجيابو كايتمشى ويعرج على رجلو شوية حيت بدات كاتبرا... عينيه مخنزرين وهو غادي فاتجاه الباب مخللي لبنات غير للي دازت كاتحل فمها... دخل ومابقاش قادر يزيد بنادم بزاف وهو مايعجبوش هاد التخلااط.. تكا على الحيط ورجع كايصونيلها والو ماكاتجااوبش... تعصب بلبياان... ورجع خرج ركب فالطومو ديالو وزااد كايتمشى منير باغي غير يشووفها
غير كايتمشى فالطريق ماعارفش فين وقف فجنب الطريق كايفكر حتى وصلو ميسااج فالتيلي جبدو بتعب غير شاف نمرتها حللو دغيا كايقراه: تاج سمحلي ماخرجتش لعندك... بصراحة فكرت فداك الشي للي قلتيلي واخا نتا ماعطيتينيش حق الإختيار ولكن من حقي نختار... مانقدرش نعيش معاك تحت سقف واحد وغير بوحدنا وحنا غراب على بعضنا... ربي مايبغيش او وليديا مايبغيوش وحتى أخلاقي مايبغيوش... مانقدش ندير شي حاجة حرام.. غير قراه عينيه حمارو رما التيلي عند رجلو حط يديه على وجهو معصب وسااخط... يمكن يكون ميساج عادي ولكن بالنسبة ليه هو راه حكمات عليه بالمووت... حتى قال شدها بين يديه ورجعات ديالو وغايبقا ينعس الليل كاامل وهو مرتااح ماناويش يستاغلها... يآذي راسو ومايآذيهااش... باغي غير يحس بيها يسمع صوتها ويتمتع بملمسها يحضر لخوفها ويكون هو الحاامي دياالها... عاارف بللي عندها الحق هو فااهم وعقلو فاهم ولكن قلبو مافااهمش وشكون غايفهمو... حاس بيه كايتعصر... وحاس بللي طريق حبو طويلة وعاامرة بالشووك... حط راسو على الفوولون لمدة كايفكر فشي حل شنو يدير وكيفااش يتصرف؟؟ تنهد مرجع راسو االلور كايشوف فالطريق غمض عينيه مطلع الزااج باغي غير يتكالما ويرتب أفكارو...
........
حطات التيلي من يدها مللي شافت بللي دازت مدة طويلة مللي قراه وماجاوبهاش... بقات مدة وهي كاتشوف فسقف دالشومبر... خايفة يكون هاد الميساج سبب انها تخسروو... تنهدات حاطاها فيد الله وناضت توضات وصلات تغداو هي ولبناات
مريم: لبنت للي كانت معانا هزات حوايجها وخرجاات يعني مابقيناش مزاحمين
كوثر: الله على راحة دابا تجمعنا بربعة كيف كنا كانتمناو من صغرناا..
تبسمات كاتفكر: آه بصح وأخيرا حنا بربعة والحرية...
ناضو جمعو الماعن غسلوهوم وهي تكات على اللية ديالها حتى جات غزلان جلسات حداها هازة صباغة فالحمر كاتصبغ ضفارها بقات كاتشوف فيها شهاتها وناضت مادالها يديها: صبغي صبغي..
شافت فيها: واصبري نصبغ أنا ومن بعد نصبغلك
حركات راسها: لاا لا بدااي بياا...
تأففاات وضارت لعندها كاتصبغلها... يالله سالاتلها ناضت راجعة لبلااصتها حتى سمعاات التيلي كايصووني.... طلاات لقات نمرتو سرطات ريقها ماعرفاات شنو جوابو... هزاتو وخرجات لبررا وقفات بوحدها جاوبات وحطاتو على وذنها غمضات عينيها ونطقاات: آلوووو...
بصوت قاصي وحاد ومايقبلش النقااش: أنا لتحت نزلي لعندي
ماعندهاش الشجاعة باش تنزل نطقات: تااج.. أنا شرحتلك..
تاج: تنزلي ولا ندخل... غاندخل حتى لعندك وعارفاني نديرها
هبة: و... ولكن....
تاج: غادي غير ندويو ماناوي على والو نزلي... عندك خمسة دالدقايق...
قطع وخلاها واقفة ماعارفاش شنو ناوي يدير؟؟ حطات التيلي حدا فمها كاتفكر... ماعندها مادير خاصها تنزل ولا غايطلع لعندها وماعلابالوش بللي هذي بلااصة لبناات وحتى العساس للي لتحت ماغايقدرش عليه... دخلات لعند لبنات خبراتهوم بشنو وقع.. شجعوها تمشي تشوفو وتسايس معااه... كانت لابسة سروال بيجامة بتريكو ديالو ماعندوش اليدين لبسات عليها دغيا كاب صوفي طويل شوية ومحلول من القدام وزيف قاداتو... نزلات كاتجري حيت خمسة دالدقايق قرباات تسالي وهو عندو الوقت هو الوقت... خرجات كاتقلب عليه بعينيها حتى سمعات لكلاكصون ضورات عينيها لمصدر الصوت شافتو من الزاج كايشوف فيها مخنزر... سرطان ريقها ومشات لعندو... حلات الباب من الجهة الاخرى وطلعات موكلة امرها لله.. ضورات وجهها كاتشوفو قريبلها وكايشوف غير قدامو حاط يديه بجوج على الفولون كايضرب فيها ضربات خفااف... كان لابس مونطو كحل بالقب فيه الريش وسليم كري وسبرديلة طالعة كحلة... ضار لعندها كايشوف فيها حرك يدو جبد بيها الكااب ملااصقو مع بعضو حيت كان محلوول ونطق: سديه...
خلاها غير كاتبرقق فعينيها: م.. ماكايتسدش..
حرك راسو زعما راه فااهم وهز صبعو كايمسح على نيفو: مزياان... وعلااش خرجتي هاكا؟؟
تمتمات: حيت ... نتا قلتيلي خمسة دالدقاايق و...
حرك راسو مرة أخرى مقااطعها: صافي صافي فهمت... ونتي كاتسمعي لهدرتي داك الشي علااش نفدتي يااك..؟
حنات راسها للأرض كاتلعب برجليها من كثرة التوثر وهو ميل راسو حتى قربلها وتضربات بوجههو خلاها كاترعد فبلااصتها شدها من ذقنها بعصبية جابدها لعندو ونطق مزير على الحرووف: كاانبغييك وعارفاني كانتعذب فبعدك... علااش مصرة ديريها؟؟ علااش باغية تبعدي؟؟ ياك البارح قلتليك نتي الأكسجين باش عاايش... علااش بغيتي تقطعيه علياا علااااااااااااش؟؟
غمضاات عينيها منزلة منهوم دمعة حيت قصحها بززاف ورابطلها شفايفها مامخلليهاش تدوي... طلقها دافعها علييه حتى مشات وجاات... غير حساتو بعد هزات يديها كايترعدو بغات تحل البااب تنزل... دغيا سدو أوتوماتيكمون وضحك بجنب: ناوية تهربي بحال قبايلة يااك؟؟