بسمة ناعمة
البارت 110: دفع الكرسي برجلوو وناض خاشي يدو فجيبو كايشووف فسمير بطريقة مخيفة... تمشى بخطى ثقيلة غادي فاتجاهو.. وهو كايترعد بالخوف وكايحاول يتحرك باش يبعد عليه.. لقا رااسو مربوط من يديه ورجليه بحبل غليظ فالكرسي الحديدي... وقف مقابل معاه مبااشرة.. وتحنى حتى تلاقاو وجووههوم: نتا بهاد لاطاي وهاد لكماارة تهضر فمراتي وتجبد سميتها على فمك...؟؟ نسيتي نهار حدرتك.. وصلتك حتى للسبيطار وقلتليك بالحرف.. ياغاتبعد من طريقها ولا غاتكون عندي معاك هدرة أخرى... مع كمل هدرتو جبد معاه بركلة للمعلم خلااه طااح بكل جهدو بالكرسي وغوت حتى تسمع صدى الصوت فالديبو.. حرك عينيه جيخة لي كارد للي جاو كايجريو عاودو جلسوه... ضربو ببونية لوجهو... والمشكلو مابقااتش فأنو هضر فيها وطلق عليها إشاعة.. ولكن تاج فديك اللحظة جاو فعينيه كاع اﻷحداث للي مرتاابطة بسمير... زواجو بيها قربو منها تصرفاتو معاها... عرسهوم... كلشيي... بقا غير كايضرب ويعاود وفوقاش ماطاح كايجلسوه الكارد... وجهو كامل تخلط بالدم... وهو ماعايقش براسو.. سمير مابقاش قاادر يغوت ولا يتحرك.. وفباالو غير لوكان يعرف بللي راه سيفط لهبة صورتو وهو واقف مع دوك لبناات شنو غايدير هااد الشي غير حيت هضر فيها.. يالله حس بخطورة الوضع وعرف شكون هو تااج وشكون هبة بالنسبة لتااج.. ندم على كاع شنو دار وهو كاايتلقا فاللكمات لقوية من عندو... حتى نطق واحد من الكارد حاني راسو: سيدي راه غاتقتلوو...
حبس على إثر صوتو وهو كااينهج... شاف فيديه عامرين دم... وعطاهوم إشارة جابولو الما كاايغسل فيدو ويخنزر فهاد اﻷخير للي متكي على الكرسي وكاايتألم فصمت وملامحو مابقاوش كايبانو بالدم والجروحة... رجع بخطوة اللور وضور راسو شاف فهادوك للي جالسين مخرجين عينيعوم وجههوم صفار والجروحة كبار تما بالضرب ديال لي كارد عير شافوه كايقرب شي بال فسروالو شي جمد بالخلعة... وقف بعيد عليهوم شوية وخشا يديه فجيبو: كاتعرفووها...؟؟
سرطو ريقهوم كايضورو فعينيهوم.. حتى عاد قالها بصوت مرتاافع قفزهووم..
نطق واحد فيهوم: آ..آه.. ب.. بحال ختنا كانعرفوها من بعيد
تاج بصوت هادئ: كاتباانلكوم مامزياناش..
نقز لاخور: لا.. والله هي ديما داخلة سوق راسها وماكاتشوفش فشي واحد... و..
قاطعو بلكمة للوجه حتى طااح: ومللي هاكا علااش تنشرو إشاعة ماعندها بيها علاقة...
بقاو غير كايشوفو لساانهوم تسرط ماعمرهوم وصلو لهاد الدرجة من الخووف... شهقو مللي ضربهوم بقوة حتى حللو فامهوم يغوتو حطلهوم خيط ديال الضو على لسانهوم بثلااتة... وبداو يفيفريو... بالجهد وجوههوم كحالو... حتى كاتو غايودعو وحبس... رما الخيط بعيد ورجع اللور كاينفض فيديه... نطق بحدة وهما سخفاانين حاللين عينيهوم بزز: كنت بااغي نقطعهوم.. باش ماتلقاو باش تدويو فالناس مرة أخرى... ولكن خسارة باقي محتاجكووم تهضرو... شااف فسمير للي باقي كاايلهت وهو كايشوف فيهوم... زاد تأكد بلي هادي اللخرة فيه.. ورجع شاف فيهوم: غاتبقاو فضياافتي هااد الليلة... ولكن غدا غاتخرجو... مي بشرووط...
شاف فليكارد: عالجوهوم.. وهذااك (سمير) ديوه وتهلااو فيه..
خرج عينيه بزز عاارف بللي كاينة شي حااجة غاتوقعلوو... وتاج خرج... كان لعشا... ركب فطموبيلتوو.. وديمارا بسرعة.. كايحس برااسو شااعل ومعصب.. وهي دواه.. داك الشي علاش زاد فالسرعة بااش يخشي راسو فحضنها ويتهدن..
دخلات لبيتها باش تصللي للي فاتها وترتااح... حيت تشهاات الحلوى ديال الكوك.. وتعاونو هي ومها وختها دارووها... غير سالات دخلات دوشات وتوضاات وصلات للي فاتها... تكات على النااموسية وهزات التيلي ديالها.. تفكرات مللي كانت كاتكا فنفس البيت وتهز التيلي وتقرا القصص وتغمض عينيها تخاايل فارس أحلامها.. ابتااسمات.. ماعمرها تصورات بللي أحلامها غاتحقق.. بل واقعها فات أحلاامها... دخلات للفايس بحال العادة.. (الفايس القديم ديالها.. مابدلاتوش تاج بلوكالها غير الدراري وخلااهلها...) من ديما قبل ماتدخل تقرا شي قصة ولا تشوف المنشورات كاتدخل للميساجات.. وتبدا بدوك للي مصيفطين بار أنفيطاسيون... داك الشي للي داارت... لقات بززاف دالميسااجات بقاات كااتفوت بيدها حتى وقفاات عند واحد الميسااج من واحد داير: (أفتقد للماضي) صغرات عينيها كاتشوف فالميساج اللخر للي صاافط: من هاد الطوف غاتعرفي حقيقة راجلك...
دغيا دخلاات ليه... لقات تصويرة باقي مامقريااش.. ضغطاات عليها وقلبها كاتحس بيه مزير... سرطات ريقها مركزة على الصورة المظلمة حتى خرجات عينيها مللي شاافتو واقف وهما بثلااتة مضااورين عليه... شهقاات حاطة يدها على فمها... وبداات كاتزومي الصوورة كان مبتااسم جنب وهما حداه.. كاتعرفهووم مزياان.. هادو هما التيتيزات ديال الحي... واش عجبوه؟؟ طلقات التيلي من يدها كاتشووف فالحيط
حركات راسها بالنفي... مايمكنش يعجبوه... هو بنت عمو قرطااسة وعاد لبناات الغنياات المانكات للي كايتغزلو بيه فالعلن كاايحتااقرهوم.. كيغااش غاايديها فهادو..؟؟ رجعات عاود هزات التيلي كاترعد وقلبها مخنووق دغيا نزلو دميعاتها... ماعمرو خلاها تحس هاكا معاه... شهقاات حاسة بالنفس محبوس فيها... ركزات نظرها فالصورة وعينيها مظلمين بالدموع.. مادامو مااكاتعمرلو حتى وحدة العين من غيرها علااش وااقف معاهوم...؟؟ سرطات ريقها كاتفكر فاحتماالية انهوم بصح عجبوه... حركات راسها باﻹيجاب وهي كاتبكي.. هو بغاها هي بنت هاد الحي.. يمكن هو كايعجبوه بنات اﻷحيتء المتوااضعة ماشي بنات البورجوا بحالو... بكثرة ماغارت مابقااتش كاتفكر بعقلاانية.. هاد الشي للي جا فباالها... شافت نمرتو كاتصوني.. دايرالو: نبض قلبي..
ابتاسمات باستهزاء... قطعات عليه.. وبقات جالسة وهو كل مرة كايصووني.. طفات التيلي غسلاات وجهها وخرجات.. نزلات عند عائلتها لتحت جلسات حداهوم مرفوعة وكاتحاول تبتاسم بزز... تعشاات ولا غير هما للي تعشااوهي غير كاتنقب وواليديها كايسولوها مالها... قالتلهوم غير راسها ضارها وصافي... شافت فختها: ضحى نقدر ننعس معاك هاد الليلة...؟؟
شافت فيها مستغربة: آه معلووم.. الدار دارك أختي..
شافت فيها ماماها: ياك لبااس أبنتي؟؟
ابتااسمات: ل.. لا والو.. غير تاج ماغايجيش بكري وبغيت نباات معاها.. توحشتها..
عنقاتها ضحى جنب: حتى انا توحشتك وتوحشت ننعس حداك... همسات حدا وذنيها: ففرنسا تاج غير كان كاايسمعني قلتهاليك كايخنزر رديتليه الباال..
تنهدات: هانا غانسبقك...
ضحى: واخا غير نغسل هاد المااعن ونتبعك...
يالله غاتحرك حتى مداتلها مها كاس ديال الما فيه فنيد: هذا مزيان... شربيه وغاترتااحي..
شداتو من عندها: واخا أماما تصبحي على خير.. سلمات على باباها وطلعاات.. دخلات للبيت... توضات فحمامها خرجاات صلاات ودعات ربي فخااطرها يصبرها ويفاجيها عليها... تخشات فالنااموسية.. وجبدات التيلي شعلااتو.. طلعولها بززاف اﻹتصالات ديالو والميساجات كايسولها مالها وفينها...؟؟ صافطاتليه التصويرة فالواتس وعاود سداات... وطفاتو خشاتو تحت الوساادة.. ونعساات كاتفكر حتى دخلات ختها غير شافتها غمضات عينيها مافيها مايجمع معاها.. طلات عليها غطاتها وضارت للجهة اﻷخرى نعساات وطفاات الضوو...
....
YOU ARE READING
🔥لهيب الهوس 🔥( مكتملة)
Actionسلاام بنوتاتي اليوم جيتكم بواح مولاتي القصة فريدة من نوعها البطل ديالنا مهووس بالبطلة القصة طوب فيها كولشي من كل فن طرب القصة لبدعات فيها الكاتبة بسمة ناعمة لمحبي الهوس و الأحسن و الغيرة الشديدة مرحبا بيكم 🍒 قراء ممتعة نتمنى تستمتعو كيما انا كنست...
