🔥لهيب الهوس 🔥( مكتملة)

part122

بسمة ناعمة
البارت 122: جالس على كرسي جلسة رجولية.. رجل فوق رجل وحاط كارو ففموو... سااط الدخان وشااف فالراجل للي جالس مقاابل معاه: حتى حد مابغا يعاودلي شي حااجة.. هاد العامين ماشي تمسحات غير من ذاكرتي.. تمسحات من الأرشيف كاامل...
نطق الراجل للي معاه.. هو عضو أساسي فالمخابرات: كلشي لمصلاحتك.. الطبيب أكد على أنهوم مايقولولك حتى حاجة حتى ترجعليك الذاكرة... حيت ممكن تدخل فصدمة..
ابتااسم باستهزاء: هه.. صدمة..؟؟ كثر من هادي للي انا فيها..؟؟
حط الكارو فالطفاية: لا جرائد ولا مجلات ولا أرشيف للأخباار.. من غير نجااح الشركات دياولي وخبر رجوع شركة جدي للمنافسة فالسووق... حتى من الحفل لكبير للي تقام لهاد المنااسبة تمسح بحاليلا جامي كاان... مافهمتش.. أنا متأكد بللي وقعو حوايج بززاف فحياتي.. وانا ماعارفهوومش..
سرط ريقو كايشوف فيه عارف تاج ماتخفا عليه حتى حااجة وكاايعرف بنادم إلى كان كايكدب غير من عينيه: ماغانقولش لييك ماوقع والوو.. ولكن غير سمحلي ماعندي باش نفيدك.. أما هاد الشي ديال الأخبار غايكونو عائلتك للي مسحو كلشي على قبل مصلااحتك..
تنهد مكره: يااك..؟؟ حتى نتا معاهوم..؟؟ واخا ممكن تقولي أشمن مداهمة هذي ذخلت فيهل حتى تضربت فراسي وفقت نااسي كلشي..
......: هذا كان إنتقاام..
تااج: إنتقام..؟؟
حرك راسو: آه.. أنا ماعرفتش كيفاش وقع بالضبط... أنطونيو رئيس المافيا الإسباانية هو للي هجم عليك..
تااج: انطونيو...؟؟ بفف.. فاللول مدخلني لغيبوبة ودابا مفقدلي الذاكرة.. غاننن..
قاطعو: راه مات محروق.. قبل ماتفقد الوعي ضربتي بلاايص محددة فالطومو للي كانو هاربين بيها هو وصاحبو وانفاجراات...
تاج: قليلة عليه.. شاف فيه: وكيفاش حتى تلاقينا انا وياه...؟؟
حنا راسو: ماعرفتش..
تااج: ماعرفتييش..؟؟ أممم.. ودابا علاش معيطلي ياك لبااس؟؟
سرط ريقو: عندنا مشكل كبير..
تااج: شناهو...؟؟
.....: المافيا الإنجليزية... سيطرات وشوية بشوية كاتوسع عبر العالم.. غاتحتل كااع الدول.. وماغانقدروش نحبسووها.. والمشكل انهوم مسيح وكايوهمو الناس بللي كاع دوك الأعمال والقتيلة من صنع المسلمين..
تااج: مشكيلة... شنو غانديرو؟؟/صعيب نسيطرو عليهوم
تنهد: الرئيس ديال المافيا عندو بنت.. وهي بنتو الوحيدة مفششة بززاف وللي بغاتها كاايحضرها... وهي كاتشارك فبعض الأعمال ديال باها...
تااج: وشنو علاقتها..؟؟
...: بصراحة البنت مهووسة بيك بززاف.. كاع مواقع التواصل الإجتماعي كاتدوي فيهوم عليك.. وكاتنشر تصااورك.. وكاتمنى تكون عندها فرصة معاك.. ولجرأتها ماكاتخبيش هاد الشي... وحتى باباها صرح فواحد الإستجواب بللي مستااعد يدير المستحيل باش تكون من نصيبها...
صغر عينيه مع ابتساامة: ههه.. شنوو...؟؟ هي انا مونيكة يااك...؟؟ البنت كاتنشر وتعبر كيف بغات وباها كاايخطبني وأنا مااجايب للدنيا خباار..
.....: تاا...
قاطعو: من اللخر شنو المطلوب...؟؟
....: ب.. بصراحة ماكرهتكش تستعملها كنقطة رابحة باش تدخل فوسطهوم ومن بعد نتا عارف شنو ممكن دير...؟؟
تااج بصدمة: كييفااش؟؟ بغيتي تقول ندير يدي فيد العدو وندخل لقلب دارو...
......: على قبل المسلمين وعلى قبل العرب.. وعلى قبل الناس كااملين..
نااض من بلااصتو معصب: ندويو من بعد.. دابا تعصبت...
دخل للقصر بالليل بحال العادة.. طلع مبااشرة لجناحو.. معصب ومريض فراسو.. من نهار فاق من الحادثة مانعس بحاال الناس... ومافاهمش أصلا مالو.. وزيد عليها هاد العامين للي نااسي... وهبة للي مسيطرة على قلبو وعقلو.. بافي يعرف غير كيفاش كانت علاقتهوم من قبل.. هو عاقل بللي كان معول يقلب عليها.. حاس براسو غاينفااجر.. وللي ضايرين بيه كايكذبو عليه وفوجهو.. مصبر راسو بزز باش مايهزش السلااح ويبدي يتيري من طرف.. ودابا زاادتو هاد المشكلة لكبيرة.. خدمتو كاتحتم عليه ينفد.. ويفرتك هاد الخلية للي كاتهدد االعالم.. ولكن كااره رااسو.. ماباغيش يدخل شي وحدة لحياتو واخا غير مجرد خطة... حل باب الجنااح ودخل.. لاح الدجاكيط والسوارت.. يالله غايدخل الحمام صغر عينيه فالتيلي.. رجع هزو ودخل للإنسطا للي ماكايحللوش بززاف.. دار سميتها فالبحت #جوليا_مانويل.. طلعولو بززاف ماعرفش أشمن وحدة فيهوم وماعندوش الوقت باش يبقا يقلب كل كونط بوحدو.. تفكر هدرة الراجل فالمخابرات.. تنهد وزاد حداها تاج.. #جوليا_مانويل_تاج..
حط يدو على جنبو مللي طاح فيه.. ابتاسم بعصبية وهو كايشوف فتصاورو معمرين الكونط ديالها... وفمختلف البلاايص.. كبر تصويرتها كايشوف فيها.. كانا زعرا بززاف عينيها عسليين كباار طاايتها مطبووعة.. شعرها كيرلي.. زوينة.. وطويلة.. عض على شفايفو وعينو عليها: معااودة.. كلشي معااود..
ابتااسم: فرق كبير بينك وبينها... #سمرائي...
لاح التيلي على الناموسية ودخل للدوش...
....
كانت فبيتها كاتمشي وتجي.. حاسة براسها موحشااه بززاف.. شي حااجة فيها كااتجدبها لعندوو.. كاانت تقدر تصبر راسها وتبقا بعييدة.. ولكن داابا لاا..بحاليلا صبرها تقادا... بغاات تكون حدا راجلها وقريبة منو... توحشات البيت للي جمعااتهوم.. تنهدات وتوجهات للباب.. حلاتو وخرجات.. كانت ببيجامة بسروالها وفوقهوم بوليرو.. وشعرها جامعاه كوت شوفال نسات ماغطاتوش.. طلعات مع الدروج متوجهة للجناح.. قلبها للي متحكم فيها.. بغات تدخل تشم ريحتو عند بالها باقي مادخل... وصلات لحدا الباب.. حطات يدها كاتفكر.. هو ماكايحملش شي حد يدخلليه لجناحو.. وكيف ماكان هاد الوااحد.. حتى من مو.. غمضات عينيها حاطة بصمتها.. غاتدخل وتخرج قبل مايجي.. حلاتو ودخلات كاضور فعينيها خاايفة.. كان الضو شااعل... ابتااسمات وهي كااتشم فريحتوو... توحشاات البيت... قربات للناموسية.. حطات يدها على الدجاكيط ديالو... هزاتها بين يديها حطااتها على نيفها كاادخل أكبر قدر من ريحتو لنيفها كأكسيجين... خرجات عينيها فايقة من سهوتها مللي سمعات صوت الرشااش.. يالله ردات البال.. عرفاتتو كااين.. دغيا حطات الدجاكيط ونااضت... غير خطات خطوة وقفها صوتو: هبة....؟؟؟!!!!
سرطات ريقها مشابطة يديها مع بعضهوم بقوة لدرجة خشات ضفارها فيدها حتى تجرحات... وهو واقف كايشوف فظهرها مستغرب... تحرك بالشوية جهتها وضورها لعندو.. بقات حانية راسها للأرض ماشافتش فيه
تاج: كيفاش دخلتي...؟؟
عضات على شنافتها باقية هاكاك.. حتى غوت مقفزها: راه سولتك كيفااش دخلتي...؟؟
قفزاات: د..د
تنهد كايحاول يتكالما: شوفي فيا... طلعي رااسك شوفي فياا يالله راه دويت معاااك
طلعات راسها بالشوية.. كاتشوف فيه وترمش... وهو حاضيها حالفة حتى تجيب آخرتوو.. ابتااسم سااهي فيها ونطق بالشوية: كيفاش حتى دخلتي أهبة؟؟ الباب كايتحل غير بصبعي..
خرجاات عينيها تاالفة: ل.. لقيتو محلوول..
حك على جبهتو: أنا ماخلليتوش محلول..
هبة: ل.. لا لقيتو محلوول...
سكت قبل مايكمل كلامو مللي شافها مدات يدها للفوطة للي لاوي على عنقو جبداتها خلاتو موسع فيها عينيه... كمشااتها فيديها وشافت فيه ببراءة: ن.. ناخدها ونمشي..
حرك راسو يمين وشمال بصدمة.. وحط كف يدو على جبهتها: حرارتك طبيعية.. ولكن شفتك ماشي هي هذيك أهبة يااك لبااس؟؟
عضات على شنافتها هي براسها ماعارفاش ماالها... الأيام كلها وهي ماعاجبها حال مريضة ومستريسية.. وحتى حاجة ماعاجباها.. وهو غير فبالها ورجعات توحشو كثر من اللول: ع.. عجب.. عجباتني ريحتك.. ب.. بغيت نقول ريحة الشاامبوان...
تااج: القرعة لدااخل خودييها كااملة
حركات راسها معنقة عندها الفوطة: ل.. لا بغيت هذي...
جلس على الناموسية مستغرب وغير حال فمو: هبة واش لبااس...؟؟
هبة: ل.. باس.. صافي هانا غاانمشي...
تااج: لفين غااتمشي؟؟
ناض ووقف حداها: واش نتي ماعارفاش بللي ممنوع منعا كليا يدخل شي حد لجنااحي؟؟
هبة: س.. سمحلي..
تنهد حاضيها ميفاش خاايفة وكيفاش متوثرة.. وملامحها البريئة كيفاض كايترعدو: ماعرفتكش علاش جيتي لعندي... ولا حتى كيفاش دخلتي.. وماعنديش فضول نعرف.. المهم هو انك هنا معايا وحداايا... عرفتي لوكان شي حد آخور دخل بهاد الطريقة شنو مكن يوقعلو؟؟
شافت فيه بخوف كاتسنا يكمل.. وهو ابتااسم: بلا ماتعرفي حسن...
شاف جهة الناموسية: حتى نتي غانعاقبك..
سرطات ريقها.. وهو كمل كلامو: يالله هذا وقت النعااس..
حنات راسها يالله غاتخرج حتى وقفها: لفيين...؟؟
ضارت لعندو باستغراب.. لقاتو مشيرلها بصبعو للناموسية: غاتنعسي هنا.. حدايا ومعايا هاد الليلة... هذا عقاابك
ضورات عينيها: و... ولكن
تااج: شششش... ولا غانضربك حيت دخلتي لهنا... غانصللي ونرجع...
عطاها بالظهر وهي تنهدات براحة قالها عقااب.. هذا راه بالنسبة ليها هذية.. غاتنعس فحضنو.. ابتااسمات لهااد الخطوة...
تكات فبلااصتها مغمضة عينيها كاتسترجع اياامها معااه... مارداتش البال حتى حسات بشي حد كاايلعبلها فشعرها.. حلات عينيها دغيا وسمعات كلامو المهموس عند وذنيها: شعرك زويين... وااش خرجتي هااكا من بيتك حتى لهناا...؟؟ شافك شي حد
سرطات ريقها: ل.. لا كلشي نااعس.. الدنيا خااوية...
شد على رااسو حاس بيه كايزدح بقوة.. وكايتعاود نفس الحوار بنفس الأصوات ولكن فبلااصة أخرى... عينيه حمارو وهو كاايتنفس بالجهد.. جلسات مقابلة معاه كااتضرب فوجهو بالشوية مخلووعة: ت.. تاح ماالك تااج..؟؟
شاف فيها مللي حس براسو مزياان.. ابتااسم وهو كايشوفها خاايفة عليه.. نطق بتعب: أنا مزياان غير ضرني راسي شوية...
هز يدها بين يدو كايشوف فيها: جرحتي يدك بضفارك يااك...؟؟
هبة: و.. وباش عرفتيها؟؟
تااج: راها باينة ضفار..
مد يدو للمجر جبد بومادة.. حطهالها على يدها.. وتكا تكاها على كتفو كايشوف فالسقف... ماشي بززاف حتى نعس... واخيرا بعد مدة طويلة نعس براحة.. وغطس فنعاسو... وهي بقات حاضياه مبتااسمة وكاتلعب فوجهو ونيفو ويديه حتى دااتها عينها...
حل عينيه... حاط يدو على رااسو... قلب عينيه للجنب مللي حس بشي حاجة فوق كتفوو.. ابتااسم وهو كايشوفها فساابع نومة... باسها فوق رااسها وحط يدو على شعرها.. تفكيرو مشا لبعييد... حااس براسو مصحصح وكاع دااك لعيا للي كان كايحس بيه مشاا.. وحتى قلبو انفاارج.. ومابقاش دااك الضيم للي كان طاايح علييه... مللي كاتكون بين يديه ماكايبقاش يهمو فقدان ذاكرتو.. ولا حتى شي مشكل آخور.. مد يدو هز الساعة اليدوية من فووق الكوافووز.. خرج عينيه مللي لقاها العشرة دالصبااح... كيفاش نعس هااد الشي كاامل؟؟ لا ماشي هذا هو السؤاال.. هو كيفاش نعس أصلا..؟؟ وبهاد السهولة.. آخر حاجة عقل عليها هي مللي حط راسو على الوسادة وجبدها لعندو معنقها.. يعني ماتقلب فالفراش مامشالو نعاس.. مااجاه الأرق... ضار جنب باقي حاط راسها على كتفوو.. كاايشووف فيها وصبعو السبابة كاايدوز على وجهها.. واش هذا هو لادروك للي كان خاصو طيلة هاد الأيام باش ينعس؟؟ وااش سحرها اخطر من سحر المشروب للي مابقا كاايقضي فيه والوو...؟؟ كيفاش وقع هااد الشي.؟؟ وكيفااش مابين ليلة ونهار يفيق ومايقدرش يرجع ينعس.. ومللي يقلب على السبب يلقا بللي هااد الملااك للي حداه هو السبب وهو الحل فنفس الوقت.. عيا يفكر ويفكر.. ومالقا حتى جواب.. وماجاش فبالو نهائيا أنها تكون مراتو... بااسها جنب فمها.. وناض من حداها ماساخيش.. ولكن الله غالب عندو الخدمة.. وعاد إلى بقا حداها هو متأكد ماغايفلتهاش.. بلا حتى مجهود.. هذاك للي ماكاينوضش بسهولة هاهو نااصب خيمة تحتوو... وقف غادي جهة الحمام وهو مصدوم من راسو.. حاس بللي حواسو وكاع أعضاء جسمو متافقين ضدو ومعاها...
دخل الحماام وحل الرشااش بالما باارد.. سلت حوايجو بقا غير بالبوكسور تخشا تحتوو...
حلات عينيها مللي حساتو دخل للدوش.. ابتااسمات كاتفكر فليلة البارح.. ماتعصبش عليها حيت دخلات لجناحو.. اكيد كاتعنيلو شي حااجة.. وعاد نعسها حدااه.. ناضت من بلااصتها نااشطة وفرحاانة... يالله تحركات تجمع لفراش حتى رمقات التيلي ديالو فوق الناموسية... عضات على شنافتها وقربات جهتو.. هزاتو بين يديها كاتطلب الله ماتلقااش الكوود.. وفعلا لقاتو محلول.. وبلا كود... خرجات عينيها كاتشووف فتصاور جوليا.. بدات كادوز وحدة بوحدة حتى بانولها تصاورو.. شهقات حاطة يدها على فمها.. تعاليقها وهدرتها.. كادل على حاجة وحدة.. هو أنها معاه وكاتبغيه... رمات التيلي فالأرض ودموعها كايسيلو.. سمعات الرشااش تسد وناضت بالزربة خرجات..
خرج من الحمام بالزربة مللي سمع الباب تسد... عرفها غاتكون خرجات.. مافكرش كيفاش حيت الباب كايتحل غير من مرة بالبصمة.. من الداخل عادي بالساروت.... ولكن ماعارفش علاش خرجات بلا ماتسنااه.. زير على يدو مللي تفكر شعرها عرياان.. يالله ضار غادي للدريسينغ باش يلبس ويتبعها.. لقا التيلي ديالو طاايح فالارض.. هزو ناسيه كاع من البارح ماشاافو.. غير دخلات لعندو هبة نسا كلشي.. غير حللو بانتليه واحد التصويرة دياالو مع جوليا فوطوشوب بايساه من حنكو.. وكاتبة فوقها: حب حياتي..
فهم بللي هبة شافت هاد الشي.. زدح التيلي مع الناموسية جاعر: وبربي وماكان عندي بيك الغراض حتى نعلقك بالمقلوب على هاد التلصيقة للي ملصقاني فيك بزز..
دخل للدريسينغ كايقلب على مايلبس بعصبية: حنكي انا شاايط تبووسيه...
حط يدو على حنكو كايمسحو.. واخا ماباستوش بصح ماتقبلهاش..
لبس التيشورط: قالك حب حيااتك... هذا هو لخلاا دياال حيااتك غابلاتي عليك.. شبعتو خبز...
كمل اللبس مشط شعرو اللور لبس سبرديلتو.. هز التيلي والسوارت.. ناوي يمشي لواحد الٱجتماع.. غير يجي يدوي مع هبة... نزل لتحت بالزربة ناوي يخرج.. حتى عيطاتلو ماماه كانو كلهوم جالسين على الطبلة دالفطور: ولدي أجي تااكل..
جاوبها بلا مايشوف فيها: مشغول الوااليدة..
جاوباتو بترجي: واحشومة أولدي هذا شحال ماجلستي معانا على الطبلة...
ضار لعندها باغي يقنعها حتى لمن بعد.. وهو يشوفها جالسة خاشية راسها فالطبسيل كاتلعب بالفورشيط متكية براسها على يدها... قرب جهتهون.. مخللي الكرسي الرئيسي للي مقابل مع بااه.. ومشا وقف عند راس رانيا: سيري لهيه خلليني نجلس هنا..
شاافت فيه باستغراب: فيين لهييه؟؟ .. و.. واش فبلااصتك...؟؟!!
حك على نيفو: أمم بلااصتي تحركي..
بقات كااضور عينيها وهما كلهوم كايشوفو مستغربين... نااضت وجلس قرب كرسيه كثر لعند هبة وهمس عند وذنيها: هراابة.. هانا شديتك..
كلهوم ابتااسمو وعاد عرفو علاش نوض راانيا.. إلى العقل نسا القلب مااشي بالسااهل ينساا...
شافت فيه من تحت رموشها: م.. ماهربتش.. أنا أصلا مااعرفتش كيفااش نعست تما..؟؟
تحنى كايطل عليها وهي حانية راسها: مابيني وبينها والو.. والله ماكانعرفها...
هبة: ش.. كون هي...؟؟
ابتااسم عاض على شفايفو: مالعبتيش فصغرك؟؟
شاافت فيه ببراءة: أمممم...؟؟!!
تااج: الطبسيل كاناكلو فيه ماشي كانلعبو بيه..
حايدولها من يدها وعمرولها.. حطو حداها كلشي تحت أنظارهوم وهو مامسوقش...
همس عند وذنيها: كولي... وكمليه إلى ماكملتيهش غاننن...؟؟
هبة: غا.. شنوو...؟؟
تاج بابتسامة شريرة: غانبوسك ففمك وقدامهوم..
خرجات عينيها وهو كمل كلامو بجدية: والله حتى نديرها...اصلا مشهيها..
جبدات الطبسيل لعندها بالزربة وبدات تااكل... كب العصير وحطو حداها: بالصحة ألعمر
وقف كايمسح فمو بالمنديل واخا ماكلا والو اكتافا بطاس ديال القهوة كايستناها تكمل طبسيلها للي سالاتو بزز..
حط المنديل فوق الطبلة ونطق: بصحتكوم.. شاف فيها: هبة بغيتك....
خرجات فيه عينيها... وهو كمل كلامو: تبعيني..
شافها عاد جالسة كاضور فعينيها شدها من يدها منوضها وجارها معاه... خلاهوم حابسين الضحكة من وراه... ماوقف بيها حتى مابقاوش كايبانو ليه.. تقابل معاها مخنزر: خرجتي من الجناح بشعرك عريان ياك...؟؟
حنات راسها للأرض: م.. ماشافني حد
غمض عينيه ورجع حلهوم مع شهيق وزفير ونطق: هذي آخر مرة أهبة.. آخر مرة..
حركات راسها: ووااخا...
تنهد حاط يدو على راسو: وحاجة أخرى..
شافت فيه كاتسناه يكمل كلامو... بدا كايحك بيدو على شعرو بتوثر الشي للي خلاها تستغرب: ب.. بصراحة هذا طلب.. ولكن إلى رفضتيه مبااشرة غايرجع امر..
صغرات عينيها: شناهو...؟؟!!
تااج: أحمم... ماكرهتكش تبقاي تنعسي معايا..
شاف الصدمة على وجهها.. وزرب كايحرك فراسو: لا.. لا.. والله ماندير شي حاجة.. غير تنعسي حداايا صاافي هاد الشي للي باغي..
هبة: غير غانجي وننعس حداك؟؟ انا راه ماشي بنت..
قااطعها: نتي ماشي بنت الزنقة نتي بنت داركوم.. شحال من مرة عاودتيلي هاد الهدرة... شوفي أهبة أنا راه من نهار فقت من ديك الحادثة مانعست حتى للبارح مللي نعستي حدايا طحت كومة.. ماعارفش علااش... ولكن للي متأكد منو انك نتي شي حااجة خاصة بالنسبة ليا.. ماغاندير والو غير تنعسي حدايا بااش نقدر ننعس..
قاطعاتو: واخاا..
تاج: كييفااش؟؟!!
هبة: موافقة... غانبقا نبات حداك
ابتاسم بفرحة ماعطاش لراسو الفرصة يفكر علاش قبلات دغيا وبهاد السرعة.. شد راسها بين يديه خشا فمو ففمها شكات واش سرطو.. باسها مطول وبعد منها محافظ على ابتساامتو.. واخا هاد القرب للي غايرجع بيناتهوم غايطلب منو مجهود كبير باش يسيطر على راسو... مي كلشي على ودها يهوون...
تاج: هانتي.. عندي اجتماع.. پالليل نلقاك فالجنااح... بفف نسيت.. المهم حتى نجي ونزيد البصمة ديالك باش تقدري تحلليه... واخا ماعرفتش كيفاش دخلتي الباارح.. مايهمش...
باسها فوق راسها: هانا مشيت..
عطاها بالظهر خلاها كاتشوف فيه مبتااسمة آه وافقات حيت هذاك حقها وهذاك راجلها حلالها..
....
من بعد ماسالا الٱجتمااع كان فالمكتب خدام على شي وراق.. والتيلي حداه غير كايبدا يصوني كاايقطعو.. ماباغي حتى حااجة تشغلو.. بالنسبة ليه هبة حيااة جديدة وسعيدة.. على الأقل يستمتع ولو غير شوية... تنهد مللي برزطو التيلي شدو وجاوب: ياك لبااس..
.......: تاج وقع إنفجار كبير فمسجد فلبناان.. وللي فجروه خلاو الرمز ديالهووم
تااج: المافيا الإنجليزية؟؟
.....: تمااما... أملنا الوحيد هو نتاا... البنت كااينة ففرنسا أتااج... رااه كاتجي لتما على قبلك.. وكاتمشي لواحد الملهى ليلي غانصيفطليك العنوان ديالو...
تااج: ماشي داابا.. مامستااعدش لشي زبل.. وحتى هاد اللصقة لوكان لقيت نكون صفيتهالها على ديك الجرأة باش مشوهة تصاوري..
......: تاج الله يخلليك تعاون معاانا
تااج: ماشي دابا أماكس مااشي داابا.. باغي حتى أنا نعيش حيااتي شوية...
قطع عليه قبل ماايكمل كلامو.. وهو معصب.. لأول مرة كايندم علاش دخل لهاد الميداان