🔥لهيب الهوس 🔥( مكتملة)

part 120

بسمة ناعمة
البارت 119: دار آخر نثرة من الكاارو وطفااه من بعد رماه فالسلة من ورااه.. حااس بعقلو خااوي ولا بد ماايعمرو...
.......
داز نهاار آخور.. ماكايدخل عندو حد.. من غير لطبيب للي بالطليب والرغيب عاد كايخلليه يشوفلو الجرح ويبدلو الفااصماات... غير صبح الصبااح.. نااض كايلبس فحواايجو مامسوقش.. دخلو عائلتو كايضورو فعينيهوم خايفين يجري عليهوم.. حتى شافوه كاايلبس فالدجااكيط واقف كاايتمشى بالشوية على قبل رجلو.. داز من حداهوم: ها البيت للي غاتحمااقو عليه خلليتولكوم...
الأب: تاج فين غادي راك باقي مريض..؟؟
تاج: مامريض والو... أنا مريض فمخي وماغانبرا حتى نتفكر آش وقع فهاد العاامين.. ويلا بقيت بين هاد ربعة دالحيوط غانزيد نمرض..
خرج وهما جاو يتبعوه حتى وقف مخنزر فيهوم: حتى حد مايتبعني.. البيت للي بغيتو دخلولو هااهو خاوي نعسو ولا جلسو ولا ريبوه كااع.. ماتبعوونيش أنا مزااوك..
خرج وزدح الباب من وراه خلاهوم غير كايشوفو تمشى فالكولوار والفرمليات حاضيينو حاط يديه فجياابو.. طلع عينو حتى جات عليها جالسة كاتخمم ساهية... ابتااسم جنب وقرب لعندها.. حسات بخياالو وطلعات راسها بالشوية كاتشووف فيه.. ناضت بالزربة: ت.. تاج فين غاادي..؟؟
حرك راسو باستغراب: تااج...؟؟!! كاتعرفيني مزياان على هاد الحسااب..
زيرات على يديها مخنوقة: ل.. لاا.. س.محلي..
حرك راسو: ماشي مشكيل... علاش نتي هنا...؟؟
هبة ببلادة: هممم..؟؟
حنا راسو لمستوااها: شنو كاديري فالسبيطار؟؟
هبة: مع.. ل..لبنات..
تاج: وغاتبقاي نتي غير تابعة هاد لبناات...؟؟ هما جاو مع رجالاتهوم ونتي؟؟
شهقاات راجعة اللور بلعات الغصة يالله جات تنطق سبقها: وفين عايشة هنا...؟
سرطات ريقها ماعارفاش باش تجااوب حتى سبقها وديع من وراها: معانا فالقصر..
شاف فيه لقاهوم كاملين من وراها: أممم مزياان...
زاد بخطواتو: باغي نبقاا بوحدي...
غير عطاها بالظهر غمضات عينيها حااسة بالسخفة.. حتى وقف وشاف فيها: أجي..
حلاتهوم كاتشوف فيه باستغراب.. وهما مخرجين عينيهوم وماريا واقفة اللور عاضة على شناافتها... تنهد وعاود نطق: راه والله ماقاد نوقف أجي...
تمشات بخطوات ثقيلة حتى لحداه وشدها من يدها جاارها هاز التيلي للي يالله جابوهلو كاايدوز إتصاال آمر ليكارد جابولو الطومو حدا البااب... حل باش يركب.. وهي كاتلعثم: غا..تسوق ونتا مري..
قاطعها: مامريضش أنا مزياان... طلعي..
شافها مترددة ونطق هو براسو ماعارفش علاش كايتصرف بلا عقل... علاش كايعطيها وقت علاش دايها معاه.. علاش كلشي كاايعصبو من غيرها هي.. وزادت بتصرفااتها الكيووت: ياك قلتي عايشة فالقصر غانوصلك معايا.. يالله ركبي..
ضارت حلات الباب وركبات وحتى هو ركب وديمارا.. شاف فيها: كيفاش حتى جيتي لفرنسا..؟؟
شافت فيه بغبااء: هاا..؟؟!!
تاج: نعاود السؤال..
سرطان ريقها: قلتليك.. ج..جيت مع لبنات..
تاج: وهاد لبنات كيف دارو تلاقاو مع عشاقهوم..؟؟
هبة: م..ماعرفتش..
حطات يدها على راسها وهو كايشوف فيها: ضاراك شي حاجة..؟؟
هبة: ل... لا غير راسي.. عييت..
حرك راسو: وااخا.. حتى نوصلو ودخلي ترتااحي..
حركات راسها: أوكي..
كان كاايسوق حتى حبس بالجهد مشات وجاات فالطومو حتى قفزات حاطة يدها على قلبها.. سرط ريقو كايفكر: جدة.. جدة كاانت مريضة.. كانت مشلولة.. كيفااش صحاات ووقفات على رجلييها.. إمتاا....؟؟!!
عضات على شنافتها: م.. ماشي بزاف...
ضرب على راسو بعصبية: كييفااش...؟؟ شفتها ونسييت...؟؟ جاتني عاادية.. بففف نسييت نسييت..
ضرب على الفولون بعصبية وهي غير كاتشوف مرعودة.. مسح على شعرو ورجع شااف فيها: خلعتك..؟؟
حركات راسها بلاا مكمشة.. وهو ابتااسم: سمحيلي... ماقصدتش...
رجع كايسووق... ومرة مرة يشوف فيها ملخبط فأفكارو وفمشااعرو مافاهم والوو...
حتى وصل دخل للقصر وحبس الطومو نزل ونزلات حتى هي دخلو مع البااب.. وشاف فيها: سمحيلي حاس براسي عيان وباغي نرتاح غانطلع.. ونتي ماعرفتش فين بيتك... سيري تنعسي.. بنتيلي عيانة...
حركاتليه راسها وهو لاح السواارت وطلع.. ابتااسمات بحزن وجلسات على الفوتوي كاتشوف فيه طالع مع الدروج.. قالها غانمشي نرتاح ونتي سيري لبيتك.. كان صعيب يخلليها لتحت ويطلع بوحدو.. هذاك جنااحهوم بجوجهوم وهاهو طالعليه بوحدو...
تنهدات مللي تفكرات حوايجها وحتى جهة الدريسينغ للي كانو فيها صورها على شكل لوحات هو رسمهوم.. للأسف الدراري غطاوهوم بورق ماكايباانش ورجع عادي بحال اللول...
دخل لجناحو لاح الدجاكيط فالبااب وهو كاايضور فعينيه... حتى حاجة ماجاتو عاادية.. فكل خطوة وفكل لحظة كايزيد يتأكد بللي شي حااجة وقعاات فهاد العاامين.. حط يدو على جبهوو كاايمااصيها حااس بالعيا وعينيه كايتسدو باغي غير ينعس... حل باب الدوش وهو حاس بللي شي حاجة ماشي طبيعية فهاد الجناح شي حاجة ناقصة.. واخا الدراري ماخلاو حتى شي دليل.. ورجعوه كيف كان قبل عامين.. مي هو حااس بالعكس.. إلى كان عقلو نااسي فراه قلبو بااقي عااقل وعلى التفااصيل.. دوش ولوا فوطة على نصو دخل للدريسينغ.. حل جهتو جبد توني وتيشورط لبسهوم وحط الفوطة على رااسو كااينشف شعرو.. وعينو على الحيط للي مخبي بالورق... تنهد وخرج من تما تلااح على النانوسية كايحاول ينعس... غمض عينيه... بقا مدة هاكاك حتى رجع حلهوم النعااس طاار... شي حاجة نااقصااه.. شي حااجة تعود ينعس بيها فهاد العامين ودابا ماكاينااش... هادو أفمار كايضورو فراسو.. والحاجة للي هو متأكد منها أن تااج ديال شحال هذا ماشي هو تااج ديال داابا...
بعد عدة محاولات باش ينعس فشل... ناض من بلااصتو قرب للبلااصة للي فيها الفيترينة الخاصة بالمشروبات.. صغر عينيه مللي لقاها خاوية (مللي تزوج بهبة خواها مابغاهاش تعيش فوسط شي حاجة حرام وخصوصا أنها ماكاتحملش الشراب) تراجع بخطوات اللور وضار خارج من الجنااح.. نزل مع الدروج.. هاز التيلي فيدو كايبقشش فيه حتى وقف مللي شافها طالعة حانية راسها للأرض... كمل الدريجات بخطوات ثقيلة حتى وصل لعندها وهي فير شافتو وقفاات كاترمش.. ابتااسم.. أصلا هاد الإبتسامة كاتخرج مللي يشوفها بلا مايرد الباال.. حزا راسو لمستواها حيت هو طويل عليها: فين غادية؟؟
سرطات ريقها منزلة راسها: لب.. لبيتي..
تااج: فآشمن طاابق..؟؟
هبة: الثالت..
تااج: الدروج بززاف عليك طلعي فالسانسور..
غمضات عينيها: كان..نخااف
ابتااسم مرة أخرى: كاتخافي من لاسانسور...؟؟
حدها حركات راسها... تنهد كاايشوف فيها وهي ماقادراش طلع راسها... عض على شنااافتو: شنو سميتك...؟؟
دغيا طلعات راسها شاافت فيه حابسة البكية: عفااك خلليني نمشي...
يالله زادت خطوة حتى شدها من يدها: شششش... راه سولتك جااوبي...
حركات يدها كاتحاول تفكها من بين يدها: ه.. هبة...
حرك راسو كايعاود سميتها مابين شفايفو: هبة.. هبة...
فيقاتو من سهوتو: عفااك طلق مني...
زير على يدها حتى تأوهات بألم: علااش نتي بالضبط؟
شافت فيه عينيها دامعين: ماد..مادرت والو خلليني نمشي...
هز صبعو الإبهام مسح دمعة نزلات من عينيها: دغيا كاتبكي...
طلق منها: هانا طلقت سيري..
ضارت طالعة مع الدروج دغياا وهو تابعها بعينيه حتى مابقاتش كاتباان وتنهد مستغرب من راسو.. تصرفاتو معاها مختاالفين وهي حاسها مختالفة على لبنات لاخرين... شي حاجة كاتجدبو لعندها... كيوت ضريفة وزوينة... حرك راسو طارد هاد الأفكار ونزل لتحت.. لقاهوم جالسين فالصالون.. باينة يالله داخلين
تاج: جدة على سلامتك... كيفاش حتى وقفتي على رجليك...
شافت فيه بابتسامة: ولدي قصة طويلة نخلليها مفاجأة حتى تفكر رااسك..
ساط بعصبية وشاف فالدراري: فين تيليفوني لقديم...؟؟
أشرف: مااعرفناش.. مالقيناهش..
شاف فيه بشك: زعماا...؟؟
أشرف: و..
شافو كايتلعثم وقاطعو: شنو وقع..؟؟ كيفاش وقعات هاد الحادثة؟؟
بقاو كايضورو فعينيهوم أصلا ماشي كلهوم عارفين خدمتو الحقيقية.. كايقولو بللي هذا للي خطف هبة غير عدو فمجال الأعمال...
وديع: تاج حنا ماعارفينكش آش كادير؟؟ نتا عيطتي وكنتي عيان بززاف وجينا لعندك..
صغر عينيه مقرب لعندو خاشي يديه فجيابو: وباش عيطت؟؟ ياك التيلي ديالي قلتو مالقيتوهش؟؟
وديع بتوثر: ما.. ماعرفتش المهم ماشي بالتيلي ديالك.. بشي تيلي آخوور..
رجع خطوات اللور: حاس براسي بحال شي حمار وسطكوم.. كاتكذبو عليا وفوجهي...
ناضت ماريا مقربة لعندو: لا غ..
قاطعها بيدو مغوت فوجهها: نتي عارفة مزيان ماكانخللي حتى وحدة تقرب ليا... واخا هاكاك كاديريها واش كاايعجبك الحال نقمعك...؟؟ تلاحي بعيدي مني..
ناض باها شدها من يدها: بنتي ماتنساايش رااه...
غمزها زعما مزوج وهي حنات راسها وتاج خنزر فيهوم وقلب الدورة...
......
دازت يومين على نفس الحال رجعات كاتفادى تشوفو بالنهار ختى الماكلة كاتطلع لبيتها وكايدخلو لعندها لبنات وخت تاج وفردوس وحتى عجوزتها ومرت عمو.. كاتدوي مع واليديها وختها ابيل فيديو.. وتضحك معاهوم فوق جهدها.. وبالليل كادير الكيت فيه القرآن وكاتنعس...
أما هو طيلة هاد اليومين معذب.. ماكرهش يدير المستحيل باش يفكر فشنو وقع... راجع خدمتو فالشركات.. لقا راسو شاري بززاف دالأملاك فالشرق للي جامي كانت عندو فيه شي حااجة.. ماعرفش علااش...؟؟ وبالليل ماكاينعسش نهائيا... وطول النهار وهو كايقلب عليها ويتمنى يشوفها... وشحال من مرة سول عليها..
ناضت فالصبااح دوشاات وفطرات لبساات كسوة حجاابية انيقة قادات زيفها.. دارت ماكيااج خفيف خباات بيه التعب والصفورية.. جات زوينة.. ابتاسمات كاتفكر فهدرة لبنات ومامات تاج كل نهار.. تبقا حابسة راسها هنا مااشي حل.. هي كاتزيد تأزم... شافت جهة البالكون.. الشميسة زوينة... غاتخرج على الأقل تجلس غير فالجردة.. وتشوفو غير من بعيد.. توحشااتو..
نزلات مع الدروج بالشوية حتى وصلاات لتحت... لقات الدنيا خاوية غايكونو مشاو للخدمة ومريم غاتكون خرجات مع وديع اما كوثر وغزلان كل وحدة بداارها
(غزلان دارت العرس هي وفارس من ورا عرس هبة وتاج بشهر) خرجات للجردة هازة التيلي ديالها وتوجهات للأرجوحة.. جلسات فيها ودارت الكيت فوذنيها كاتصنط لموسيقى غربية هادئة.. حركات راسها كاتشوف قدامها مللي حسات بشي حد جلس حداها لقاتو لؤي جاالس كايشوف فيها بلا مايهضر.. ختى هي ماهضراتش.. رجعات غمضاات عينيها وتكات عايشة مع الأغنية...
دخل بطوموبيلتو مع الباب.. كان عندو إجتماع ونسا شي ملف.. وحيت هو فجناحو وماكايتحل غير بالبصمة ديالو اضطر يرجع بوحدو (الجناح كايتحل حتى بالبصمة ديال هبة غير هو ناسي ومللي بغاو الدراري يخبيو الدريسينغ ديالها هي حلاتو) حبس الطومو بسرعة ونزل يالله غايدخل مع الباب جات عينو عليها مغمضة عينيها وعايشة فعالمها.. حرك راسو كايشوف فلؤي للي جالس حداها ساهي فيها.. زير على قبضة يدو إحساس خاايب راودو.. كره لؤي كثر ماكان كارهو من قبل.. وكره قربو منها... زاد جهتهوم بخطوات سريعة حتى وقف عليهوم.. لؤي سرط ريقو وهي طلعات راسها بتعب كاتشوف فيه.. شافتو مخنزؤ وحايدات الكيت.. نطق بعصبية ماعارفش آش كايقول: ماعنديش هنا حديقة العشاق...للي بغا يتزلل يمشي لبلااصة أخرى..
خرجات عينيها مصدومة من هدرتو.. أما لؤي صغر عينيه ونطق متشجع حيت عارفو ناسي: واخا اولد عمي.. سمحلنا تعدينا على أملااكك.. مي هاد الهدرة راها قاصحة وهبة ماتستااهلهاش منك...
تاج بنرفزة: ونتا ماالك...؟؟ آش دخلك..؟؟
لؤي: والو.. شاف فيها: تبغي تخرجي..
هزات عينيها عامرين دموع.. كاتبكي بحرقة كلامو جرحها كثر من نسياانو ليها.. بغات غير تبعد باش تبكي.. باش تتنفس حسات براسها مخنوقة... حركات راسها للؤي: آه..
يالله زادت خطوة باش تمشي حتى شدها من يدها مزير عليها.. شاف فلؤي: *ود عليا من هنا.. هي ماغاتمشيش معااك...
لؤي: وبآشمن حق..؟؟
شافت فيه ماقادة على مضاربة وهي كاتتشوف فتاج صاعر: لؤي غير سير..
حرك راسو: واخا غير على قبلك..
ضغط على يدها للي شادها منها كرد فعل على هدرة لؤي.. عضات على شناافتها بألم وهي كاتنخصص فصمت.. اصلا هدرتو قصحاتها كثر من هاد الشي... سمع التيلي فجيبو كايصوني جبدو وجااوب كايغوت: ماكاين لا اجتماع لا زمر.. أجلو ولا بيع ديك الشركة وهنيني كااع..
قطع وجرها مدخلها معاه.. غير وصلو للصالون طلق منها.. شدات فيدها مقصحة وهو كايشوف فيها: بيناتكوم شي حااجة؟؟
دموعها للي كانت حابسة بداو كاينزلو وحدة ورا ختها.. هدرتو كاتقصحها بزاف قرب لعندها باينة فيه واصلة ليه العظم: كاتبكي علييه؟؟ مابغيتش نخلليك تخرجي معاه يااك..؟؟ حل يديه كاايدوي بنرفزة: إيوا ألالا ماغانخلليكش يالله موتي.. ماغاتخرجيش..
حركات رااسها حاطة يدها على وذنها: مانخرجش.. اهيء اهيء.. بغيت نمشي غير لبيتي انا مااشي بنت الزنقة اهيء..
ضارت كاتجري طلعات مع الدروج وهو حاضيها صدرو كايطلع وينزل.. ضرب واحد الفااز كبير برجلو خاى شخشخو.. وغوت حاط يدو على راسو...

تصبحون  على خير