🔥لهيب الهوس 🔥( مكتملة)

part69

بسمة ناعمة
البارت 69:نطقات وهي كاتشوف فيدو بخوف: داك الشي للي داز عليا وأنا فسن 18 ماخلااش عندي الجهد نتحمل شي حااجة كثر...
استغرب من هدرتها وشاف فين كاتشوف... جمع يدو مخبيها عليها ونطق: نآذي راسي ومانآذيكش..
تنهدات متكية على الحيط وهي جالسة: يمكن لوكان جيتيني فوقت قبل... مانكونش تزوجت ولا عشت شي حااجة.. نكون فرحت بهاد المعاملة حيت هاد الشي للي كنت كانتمنا... نتا جيتي فوقت عييت فيه من كلشي... بغيت غير نرتااح... مابقااش عندي الجهد باش نتحمل شي حاجة أخرى...
سرط ريقو كايحاول يصبر راسوو أعدى حاجة عندو هي تذكر زواجها اللول: نفهم بللي كاتقارنيني بهذاك...
قلبها قفز... قاطعاتو قبل مايتسرع: لا لا.. ماكانقارنكش بيه.. نتا فين وهو فييين..؟؟ مي كانفكر من وااحد النااحية.. إلى كان هو وااحد فقير وماعندو لا فلوس ولا قيمة قدر يدير فيا هااد الشي... كيفااش واحد بحاالك غاايحن فيا ويرحمني؟؟
شدها من ذقنها مزير علييها حتى غمضات عينيها بألم: ماتقارنينيش بيه وماتجبديهش على فمك... هذاك محيه من حيااتك.. وأنا ماغانآذيكش.. ونادايرش بحالو...
طلق منها مخلليها شادة بيدها كاتحسس آثار قبضتو أكيد خلا ليطراس... مسحات دمعة وحيدة نزلات من عينيها وابتاسمات بضعف: بلا ماتبرر.. أصلا عطيتيني الدليل بللي ماغاتآذينيش
دفعات يدو وناضت من حداه.. وقف بالزربة وشدها من يدها: شنو كاتقصدي؟؟
حركات صبعها حطاتها فوق شنافتها فالفاصمة: هذا.. وعاود حطاتها على ذقنها: وهذا كلهوم دلائل بللي ماغاتآذينيش...
تنثرات من يدو وخلاتو مرفوع... بعدات عليه شوية دارت شهيق وزفير... مادام وصلو لهاد الحد.. خلليها توضح الآمور... وهي فيد الله... سرطات ريقها ونطقات: بلا زواق ولا نفااق... هو على الأقل ماعمرو ضربني قبل مانتزوجو... كان ناوي على الغدر... وخلا حتى دارني بين يديه عااد وراني حقارتو...
غمضات عينيها رافضة تشوف فشوفاتو النارية قبل ماتكمل كلامها: أما نتا تصرفتي هااكا وأنا بااقية غريبة عليك... ماخطيبتك مامرااتك... هو ماعمرني خفت منو لا قبل الزواج ولا من وراه.. او واخا هاكاك قدر يعيشني فالجحيم... ونتا كانخااف منك... كيفاش غانعيش مع عصبيتك... هو ماعندو والو... أصلا حتى رجولتو ماكاملااش... نتا رااحل كاامل مكمول... كيفاش مالقيتش الزهر معااه.. وغانلقااه معااك....؟؟!!!
طول الوقت وهو مصبر راسو... مزير على واحد الطرف دالزااج كان فالآرض... كايحاول يرد غيه عصبيتو قبل مايخويها فيها... هاكا داير هو مريض ومهووس... ومن صغرو معصب.. عاد معاها رااه داير فوق جهدو... لدرجة أنو مللي كاتقول كلمة #هو... كايزيد يضغط على داك الطرف دالزاج حتى يدخل فلحمو... ولكن مابقاش قاادر... والله ماحاس بالم الجرح للي فيدو بقدر ماحاس بالجرح للي فقلبو... عض على لساانو... شدها من درااعها ودفعها على الحيط بكل جهدووو... عينيه حمريين.. لونهوم الرماادي مابقاش يباان مع اللون النااري للي طغا علييهوم... شنافتو مجرووحة بكثرة ماعض علييها.. أما يددو خلااص... شدها من عنقها خاانقها.. وهي مخرجة عينيها كاتحااول ترخف يديه... نطق وهو معصب كثر من لقيااس: قلتليييييك ماتقاارنينيش بشي شمااتة... وقلتليك مااتدويش على شي شمااتة آخوور فحضووري.. وقلتلييك ماايكوون فحيااتك حتى ذكرى لشي قوااد من غييري... ونتي بكل جرأة... كااتقوولي #هو.. فكل جملة بديتيها... كاتدوي علييه بكل حقاارة حداايا... أنا مااعندي نفس يااك؟؟ مااعندي شخصية.. مااعنديش قلب... أنا حبييبك أهبة حبييبك... أنا مهوووس... مهووس لدرجة لحمااق... فهمييها أنا كزااوك فهمييني...
بقات جامدة فبلااصتها كااترعد وخاايفة يزيد يزير على عنقها حيت كان رااخف... حمدات الله للي باقي مسيطر على أعصابو شوية
تااج: هاد الشي كاامل داايرو غير بااش نتزوج بييك... غير بااش نخطبك... غير بااش تكوني ليا فالحلاال...
طلق منها وطااحت فالأرض بالخلعة كاتنهج بالجهد حاطة يدها على قلبها.. وعينيها عليه.. كاتشوف فحاالتو... الدماايات فكل بلااصة... شهقات وهي كاتشوف فالطرف دازاج بااقي لااصق فلحمة يديه وهو غادي جااي كاع مااحااس... غوتاات بلا وعي منهاا: تااااج.. يدك يدك... اهيء اهيء اهيء...
شاف فيها مخلوع ورجع شاف فيدو للي كاتشوف فيها.. ابتااسم وتحنى لعندها: علااش كاتبكي؟؟ واش خايفة عليا..؟؟ أمم.. خايفة علياا...
حركات راسها بالإيجااب وهي بااقية طاتبكي... وهت تنهد بارتيااح: على الأقل كاتحسي بشي حااجة من جهتي... هز يدو لوخرى: شششش.. هانا غانحاايدها غير تهدني.. غوتاات مرة أخرى مخبية وجهها بيديها: لا لاا... اهيء اهيء.. دااخلة بززاف غاتقصحك... اهيء اهيء..
هز يدو نثرها بالجهد رماها وعض على شناافتو مغمض عينيه حتى برد لحريق شوية.. ورجع حلهوم كايشوف فيها مخبية وجهها وكاتبكي... ابتااسم بتعب وقرب لعندها عنقها جنب: ششش.. صاافي هانا حاايدتها مااوقع والو تهدني...
حايدات يديها كاتشوف فالجرح غاارق... بقات كااتبكي.. نطق مرة أخرى وهو كاايشوف فيدو: كانقسمليك أهبة بللي خلقني وخلقك... هاد الجرح كاع ماضارني كيف هذا للي هنا (حاط يدو على قلبو)...
تخطفاات من حدااه كاتشوف فيه بحب مخلط مع شفقة مع خووف... وقفاات غير بزز شادة بيدها على طرف النااموسية: مانقدرش أتااج... ماانقدرش نعييش فهااد الشي.. (كاتدوي وتبكي): الدم الخووف الأعصااب... الهوس ماكنتش متوقعااه هااكا.. اهيء اهيء... تيقني ماانقدش... أنا ضعييفة.. ضعييفة على أني نتحمل... خلليني علييك... صاافي حااسة براسي عييت وتهدييت... خلليني نمشي... ماا.. ماغانتفاارقوش حتى أنا كاانبغيك... ولكن نبقاو غير نتلااقاو... و.. والزوااج بلااتي... حيت أنا.. أنا مامستااعدااش.. رجعاات عندي فوبيا منوو.. رجعت كانخااف منوو.. كانكرهوو...
نااض من بلااصتو.... مشا جهة المجر... جبد الدواا كب لاالكوول فووق الجرح كااع مامسوق للحريق للي فييه... هز فااصمة لواها عليه... وهي غير كااتشووف واش هذاك الجرح قدو قداش هااكا غاايعاالجو؟؟ شاف فيها بوجه خالي من اي تعبير: بغيتي تمشي؟؟ تسكني بعيد...؟؟!! ونبقاو نتلااقاو؟؟!! واخا.. خااطرك... سيري...
حلات عينيها مصدومة وااش بصح واافق؟؟!! علاش ماعجبهاش الحاال؟؟!! وقريب تلومو حيت وافق... فيقها من سهوتها مللي نطق مرة أخرى: ولكن ديري فباالك وااحد الحااجة... التقااعد دياال باباك مااعمرو غاايااخدو.. وحتى ديك المنحة ديال لاكسيدون ديالو للي عايشين بيها وهي كلشي عندكووم... بااحح ماغاتبقااش...
ضحكات بصدمة: ههههه.. شنووو...؟؟!! كيفااش؟؟!
تااج بجدية: كيف سمعتي..
بقات ساكتة حالة فمها مرفوعة وهو كايشوف فيها... قرب حداها جرها جلسها على الفوتوي وجلس حداها: عندك جوج اختيارات... تخرجي تجلسي بعيد عليا... من غدا كانقسمليك بالله ماغايبقا عندكوم حتى عشا ليلة... وماكاين حتى قوة ترجعلكوم حقووقكووم... تبقااي هناا.. غايبقا لكوم كلشي.. وحتى التقااعد غااياخدو باباك فاللول دهااد الشهر وبضعف أضعاف داك الشي للي كاايحلم بييه...
شاافت فيه بااقية تحت تأثير الصدمة... سرطاات ريقها: بنتي على حقييقتك
حنا راسو حشمان منها... مااغاينفدش تهديدو وااخا يعرف يمووت فبعدها؟؟ وااش هو حقيير لدرجة يعاقب عائلتها بسباابها...؟؟!! ماغايديرهااش غير كايخوفها.. هو راه داافع لوراق لباباها باش يخرجلو التقااعد... أو واخا يتفاارقو ماغايحرموش منو... مايمكنش يحاايدلو الشهرية للي عندو... مي هو عارف بللي وليديها هما نقطة ضعفها... ومابقا عندو حل غير هذاا... ماقاادرش يبعدها علييه... مللي كاتغيب على عينيه كاايحس بقلبو مخنووق... الأكسجين كاتاخدو معاها... تنهد ونطق بصووت ضعيف: ماخلليتيليش اختيار...
نااضت من حدااه: ماتوقعتهاش منك صدمتيني فييك..
نااض حتى هو حاط يديه فجيابو: شنو قررتي...؟؟
هبة بضعف وقلة حيلة: شنو فنظرك؟ غانخللي وليديا يسعااو وبسباابك؟؟!! ههههه... أكيد مواافقة..
ابتااسم بررااحة... مااشي مهم كيفااش المهم هو أنها غاتبقا تحت عينيه ومعااه..؟؟ غمضات عينيها مكرهة... مانواتوش يدير هااكا... نطقات مرة أخرى: عندي شرط حتى أناا...
شاف فيها بتعب.. نزف بززاف وتعصب وعيا.. كلشي تلااحق علييه بااغي غير يرتااح: شناهو؟؟ شرطك أمر..
هبة: لبناات يبقااو هنا ونبقا نباات معاهوم فنفس البييت...
يالله جا يحااوبها قاطعاتو: إلى ماوافقتيش ماغانبقاش هنا... واخا نعرف نموتو بالجووع..
تنهد كايمسح على وجهو: ماغانقيصكش... غير تنعسي حدايا...
هبة: مواافق ولا لا...؟؟!!
حط يدو على راسو حاس بيه كاايضوور: ماتعذبينيش انا مزااوك... علاش كاتعاملي هااكا؟؟ قربلها كايحااول يدوي معاها بالشوية: خلليني غير نخطبك مانتزوجوش حتى تكوني مستااعدة.. كانواعدك غاانسيك فللي دااز ونخلليك نتي تمنااي الزوااج.. يالله وصل لحداها بعدات بخطوات اللور ونطقاات الغضب عاامي عينيها: مواافق ولاا لاا...؟؟
ضار بسرعة وبعصبية ضرب يدو مع الحييط حتى داز الدم عااود من تحت الفاصمة مغوت: علااش كاتعذبيني علااش؟؟!
قفزاات فبلااصتها مخلووعة وهو طااح على الفووتوي مغمض عينيه: مواافق مواافق...
سرطات ريقها وهزات صااكها خرجات لعند لبناات... لقاتهوم مشااو ولقاات غير أشرف تنهدات ووقفات من وراه: فين لبناات؟؟!!
شاف فيها: مشااو..
هبة: مشاو بلا مايستنااوني؟؟
أشرف: تاج صافطلي ميساج قالي غير يمشيو هي باقية معطلة...
خرجات معصبة ناوية تشد طااكسي.. بقات غادية مع الجردة حتى وقفاات الطومو ديالو حدااها بالجهد... شافت فيه مخلووعة.. كيدارلها؟؟
تنهد بتعب وحلها البااب دالطومو دارلها إشارة بيدو باش تتطلع... بقات واقفة كاتشووف فييه وهو كاايشوف قدامو مكالي بيدو على الفولون... الطاكسيات شبه منعادمين فهاد لبلااصة.. والحال مشا عليها... أصلا النص فالمحااضرة راه دااز... تحركات وركباات غير سدات البااب ديماارا بسرعة حتى مشات وجات فبلااصتها مخلووعة.. تقريبا نصف ساعة او وصلو... وقف الطومو كاايشوف من الجهة الأخرى وهي شاافت فين هما عرفات راسها وصلاات.. تنهدات ونزلاات.. غير حطات رجليها فالأرض كسيرا بسرعة حتى قفزات مهربة رجليها... بقات خمسة دالدقاايق واقفة مصدومة من تااج الجدييد... حسات بغصة فقلبها... تنهداات ودخلات لافاك....
........
كانت الخمسة دالعشية.. خارجين من لافاك.. ماقراوش الساعة اللخرة حيت غايدوزو للشومبر ديالهوم... كانت كاتعاودليهوم شنو وقع... وماقالتش ليهوم على التهديد... قالت غير بللي دارو اتفاق تبقا تما وااحد المدة وحتى هما وغاتبقا معاهوم فنفس البييت.. دخلو للشومبر وجمعو حواايجهووم للي كانو تما... حالفة ماتلبس شي حاجة من حوايجو.. خرجو وغير وصلو لحدا لافاك لقاو الشيفور كايستنااهوم.. ركبو متوجهين للفيلا... وصلو ونزلو والشيفور هاز لافاليز طلعها الفوق حطها فبيتهوم للي وراتهاليه كوثر... دخلات مع البااب ولقات أشرغ ووديع جاالسين خدامين على شي وراق... ضورات عينيها فالجوار ماكااينش حسو..
بغاات تعرف فينوو؟؟ هبطات كوثر من الفووق... همساتلها فوذنها تسول أشرف.. قربات حداه وسلمات عليه... وسلمات على وديع غير بيديها تحت تخنزيرات أشرف... جلسات حداه وسولاتو بينو وبينها: تااج ماكاينش فين هو...؟؟
خنزر فيها: ونتي مالكي؟؟!! آش بغيتي لهاد تاج؟؟
كوثر: واغير كانسول حيت تخاصمو هو وهبة الصبااح داك الشي علااش..
تنهد: عندو شي خدمة على بررا...
حركات راسها بالإيجااب وصافطات ميساج لهبة للي كاانت جالسة بعيدة عليهوم شااردة وغير كاتخمم...
كان خدام كايسيني فشي ورااق... حرك عنقو حاس بيه ضارو حيت شحال وهو محني... جات عينو عليها كانت خاشية راسها فالتيلي معصبة وغير كاتشوف... صغر عينيه مستغرب.. وهز يدو نغزها كانت بعيدة عليه شوية... هزات راسها كاتشوف فيه مخلووعة... حرك راسو بمعنى آش كااين؟؟ ابتاسمات ابتساامة صفرة ودارتلو إشارة بللي ماكاين والوو... ورجعات كاتشووف فالتيلي... جاه فضول قاتل يعرف شنو عندها..
استغرب من راسو.. منين جاتو هاد الرغبة؟؟ فين هو عمرو جاه شي فضوول فحياتو كااملة... تميل شوية للجنب بدون وعي... رمق ميسااج فالفايس: غاديري داك الشي لي قلتليك ولا غدا تفرجي فشوهتك فسوشل ميديا...؟؟
غير من هاد الميساج فهم لبلاان عض على شناافتو معصب... أصلا جنو وجنونو فالبراهش للي كايهددو لبنات بهااد الطريقة... بقا كاايحرك رجليه بعصبية... باغي يتدخل ومااعرفش كيفااش..؟؟ مابقاش عندو الصبر... نغزها مرة أخرى حتى شافت فيه مستغربة: غانخرج للجردة وتبعيني...
سرطات ريقها هاد الزين كاامل كايقولها تبعيني.. شنو بغا منهاا...؟؟ ناض من حداها وهي متبعالو العين... خرج داير يديه فجيااب الدجاكيط... تنهدات وناضت تبعاتو... مااشي حمقة هي بااش تفلت هااد الفرصة... واخا يكون باغي يقرقب غير النااب... راه لحظة مع هذا ماكاتعوضش.. وعااد غاتطلب فالمقاابل سيلفي معاه... خرجات كاتقلب عليه براسها.. حتى شافتو وااقف متكي على وااحد الشجرة... مشات لعندو وهي متوثرة... واخا تصاحبات شحال من مرة... ماعمرها جرباات تدوي مع نيوتيلا شخصيا... وقفات حداه وهو شاف فيها وابتااسم... نطق بهمس: لبااس؟؟!!
حركات راسها بالإيجااب: الحمدلله...
بلا مقدمات نطق مرة أخرى: بااش كاايهددك؟؟
حلات فمها واللون تبدل فوجهها: ك... كيفاش؟؟!!
تحرك من حداها عاطيها بالضهر: شفت واحد الميسااج بلا مانقصد.. ومنو فهمت بلي كاين شي شماتة كايهددك... دابا باغب نعرف بااش؟؟ واش شي تصاور معاه.. ولا فيديواات مفضووحة ولا شنوو...؟؟!!
حركاات راسها بالزربة مخلوعة وكان خاصها غير علامن تفضفض: لاا... معااه.. مادرت معاه والوو.. والله مادرت شي حااجة... هو كاايهددني بوااحد التصااور صيفطهومليه...
جلس فالأرض: كيدايرين هااد التصااور؟؟
حناات راسها حشمانة وجهها حمر... بقا سااكت كاايشووف فيها.. حتى نطق: شنو سميتك؟
شافت فيه باستغراب: مريم..
حرك يدو: أجي تجلسي...
تحركات بالشوية وجلسات بعيدة عليه شوية.. بقا كايشوف فيها: ماجاوبتينيش كيف دايرين هاد التصاور؟؟
مريم: م... معريين شوية
حرك راسو فاهم: إلى كاينيين عندك وريهوملي
مريم: هااا...؟؟!! لاا...
وديع: وريهوملي باش نعرف نتصرف... ماتخافيش..
مريم: لاا... مانقدرش...
خنزر فيها: هو قدرتي كاع تصيفطيهوملو وأنا ماقادرة حتى توريهوملي...
مريم: كنت معااه...
قاطعها: وليكن.. ماكانش عليك تصيفطيهوم..
سكتاات كاترمش متوثرة
وديع: ودابا غير وريني باش نقدر نعااونك...
بقات ساكتة لمدة حتى جبدات التيلي من جيبها يديها كايترعدو حشمات منو بززاف... جبدات التصااور للي صافطاات لأيمن كانو جووج... ومداتولو راسها فالأرض... شااف فيهووم... كانت وحدة فيهوم لاابسة جيب قصيرة حد الركبة وطالقة شعرها غير فالداار جاات مغرية بززاف... عض على شفايفو.. كاتبان زوينة... وشعرها طويل شوية... والثانية لابسة بيجامة دالنعااس... حتى هي جاتها مثيرة.. بعد عينيه ماباغيش يتعمق... مابينو وبينها والو جاه هاد الشي قلة اذب... مدلها التيلي وهي ماقادراش تشوف فيه... نطق وهو كايلعب بيدو فذقنو: بالنسبة ليا أنا هاد التصااور عاديين... وكاينين بناات كايلبسو كفس من هاكا... حنا ماكانسميوهش عراا.. ولكن بالنسبة ليك نتيا.. على مابانلي محجبة ماشي ديال هااد الشي...
حلات فمها باغية تدافع على راسها وسبقها هو كايدوي مهدن بززاف: عارف عاارف.. بللي غير فالدار وكدا... من حقك... حيت التيلي ديالك من خصوصيااتك وتقدري تتصوري كيبغيتي.. ولكن سمحيلي نكون صريح معااك.. غلطتي غلطة كبيرة مللي صيفطيها لبناادم... ونتي ماكاتعرفيهش حتى مزياان
مريم: لا رااه كانعرف...
قاطعها: مادام ماعرفتيش بللي غايغدر بيك هاد الشي ماكايعنيش بللي كاتعرفيه... وأصلا واخا تكوني كاتعرفيه.. ماتصيفطيش ليه بحال هااد الشي..
بقات سااكتة وهو كايشوف فيدها مزيرة بيها على التيلي: ماغايقد يدير والو ماتخافيش.. هادو ماشي تصااور يفضحك بيهوم أنا كان يحصاابلي شي حااجة كثر..
مريم: ع... عارفة ولكن رااه إلى شافهوم غير خويا ولا بابا ولا عمامي ولا غير صحاباتي غانخسر..
تنهد كايشوف فملاامحها مبتااسم.. باينة عليها بريئة وداخلة سووق راسها.. مادام خاافت من حاجة بسيطة بحال هذي.. يعني ماموالفاش بهااد الشي... حط يدو على يدها خلاها جامدة فبلااصتها: تهدني ماغايدير والووو...
سرطات ريقها ماعمرها حسات ببحال هاد الشعور.. يديه سخاان تمناات ماايحايدش يدو... سمعو صوت الطومو جااية بالجهد.. رومبلااصا بقوة
وديع: مال هذاا؟؟
مريم: م.. ماعرفتش...
نزل تاج عينيه فالأرض مخنزر ودخل....
وديع: عندو شي مشكل مع صاحبتك؟؟
مريم: غير مخااصمين..
حرك راسو: عطيني سمية هذاا وكنيتو... وفين خدام؟؟
عطاتو المعلوومات للي بغا.. وبقاو جالسين تما مجمعين لا هو سخا بيها ولا هي سخاات بييه..
.....
تصبحن على خير  سمحوليا حيت تعطلت عليكم و حطيت أجزاء قليلة اليوم راني مريضة داكشي باش  او غدا ايلا لقيت راسي مزاينة نحطليكم وايلا كنت مزال مدكدة مانحط حتا لبعد غدا 
#توقعاتكم او كترو من لجيم☺