Slowly Falling For Changkong ( ဘာသာပြန် )

Chapter-2

ည(၁၀:၂၀)လောက်တွင် ရှန့်ချန်ခုန်း အိမ်ရှေ့တံခါးကိုဖြည်းဖြည်းချင်းဖွင့်နေခဲ့သည်။ အခန်းကတိတ်ဆိတ်နေလျက် သူ့အမေလည်းအိပ်ပျော်နေတာကြာလေပြီ။ သူက တံခါးပိတ်လိုက်သော်လည်း မီးမဖွင့်ခဲ့..တံခါးကိုသာလော့ချပြီး ဝမ်းရှုလီအိပ်ရာမဝင်ခင်ဖယ်ရှားပေးခဲ့သည့်ချိန်းကြိုးကိုပြန်စေ့ပိတ်လိုက်၏။

ဧည့်ခန်းထဲရှိစားပွဲပေါ်တွင် ပန်းကန်များစွာရှိနေကာ ရှန့်ချန်ခုန်းက ပန်းကန်တွေကိုအထပ်ထပ်ဆင့်စီရင်း ဆေးကြောရန်မီးဖိုချောင်ထဲသယ်သွား၏။ ဆေးကြောပြီးနောက် ပလတ်စတစ်အိတ်အသစ်တစ်လုံးကိုယူကာ မနက်ဖြန်မနက်ပိုင်းတွင်လွှင့်ပစ်မည့်အမှိုက်ပုံးထဲကအိတ်နှင့်လဲလှယ်လိုက်သည်။

သို့သော် အိတ်လဲရန်ငုံ့လိုက်ချိန်၌ ရှန့်ချန်ခုန်းတုံ့ဆိုင်းသွားခဲ့၏။ အမှိုက်ပုံးထဲတွင်စာတစ်စောင်ရှိနေကာ အလယ်ကနေဖြဲထားလျက်...စာအိတ်ပုံစံနှင့်အရောင်ကို သူရင်းနှီးနေသည်။

စာအိတ်ကိုအပြင်ထုတ်ယူလိုက်ချိန်တွင်သူအံ့ဩနေမိသား...

သေချာတာပေါ့ ဒါကလေကြောင်းတက္ကသိုလ်ကစာအိတ်...

စာအိတ်ပေါ်ကလိပ်စာကို 'ရှန့်ချန်ခုန်း' ဟုထင်ထင်ရှားရှားဖြင့် တညီတညာတည်း အတိုင်းသားရိုက်နှိပ်ထား၏။

အတော်ကြာရပ်နေပြီးနောက် မီးဖိုချောင်မီးကိုပိတ်ကာ စာရွက်အပိုင်းအစတွေကို သူ့အခန်းထဲသို့ပြန်ယူသွားတော့သည်။ အိပ်ရာဘေးကမီးအိမ်သေးလေးကိုဖွင့်ရင်း ဆုတ်ဖြဲထားသည့်အပိုင်းအစနှစ်ခုကို နဂိုအတိုင်းပြန်ဖြစ်အောင်လုပ်လိုက်၏။

'ချန်ခုန်း ;

လေကြောင်းတက္ကသိုလ်ဘွဲ့ရကျောင်းသားတွေအတွက် စာရင်းပေးသွင်းခြင်းကမကြာခင်စတင်တော့မယ် ၊ လေယာဉ်ဒီဇိုင်းမေဂျာအတွက်နှစ်နေရာရှိတယ်..ဒီအကြောင်းတွေကိုမင်းသိလားဆိုတာတော့အန်ကယ်မသိဘူး..အဲဒါကြောင့် စာရင်းပေးသွင်းရမယ့်ဖောင်ကို အန်ကယ်ပရင့်ထုတ်ပြီးတော့ မင်းဆီကိုပို့ပေးလိုက်တယ်..အန်ကယ် မင်းရဲ့အခက်အခဲတွေကိုလည်းသိတယ် မင်းအနေအထားကိုလည်းနားလည်ပေမဲ့ မင်းကအရမ်းငယ်သေးတယ် ၊ မင်းမှာအရည်အချင်းကောင်းတွေနဲ့မင်းအဖေထက်မနည်းနိုင်တဲ့စိတ်အားထက်သန်မှုတွေရှိတယ်..မင်း ဒီလိုမျိုးလက်လျှော့မှာမဟုတ်ခဲ့ဘူးလို့ အန်ကယ်မင်းကိုအမြဲယုံကြည်ခဲ့တာ...