Slowly Falling For Changkong ( ဘာသာပြန် )

Chapter-21

ရှန့်ချန်ခုန်း အိမ်ပြန်ရောက်ချိန်တွင် မနက်နှစ်နာရီလောက်ရှိနေလေပြီ။ ပုံမှန်အားဖြင့် သူက ညဘက်မှာအလုပ်လုပ်သော်ငြားလည်း အရင်တုန်းက အိမ်ပြန်ရောက်ချိန်ဟာ ဒီလောက်ထိနောက်မကျဖူးခဲ့ပေ ၊ သူ သူ့အမေကိုအရမ်းစိတ်ပူနေ၏။

ကံကောင်းထောက်မစွာဖြင့် သူ့အမေက ရှန့်ချန်ခုန်းအိမ်ပြန်မရောက်ခင် အိပ်ရာစောစောဝင်လေ့ရှိသည်။ ထို့ကြောင့် ဖြစ်နိုင်တာတော့ ဒီနေ့ သူနောက်ကျမှအိမ်ပြန်ရောက်ကြောင်းကို သူမသတိပြုမိမှာတောင်မဟုတ်ဘူး။

အိမ်ကအရမ်းတိတ်ဆိတ်နေသောကြောင့် သူ့အသက်ရှုသံကိုတောင် သူပြန်ကြားနေရသည်။ ရှန့်ချန်ခုန်းသည် မီးမဖွင့်တော့ဘဲ သူ့အခန်းထဲခြေဖျားထောက်မဝင်သွားခင်တွင် သူ့အမေအခန်းတံခါးကိုလှမ်းကြည့်လိုက်၏။

သူ့အခန်းထဲရှိမီးအိမ်ငယ်လေးကိုဖွင့်၍ ရှန့်ချန်ခုန်းသည် ရွှီလျန် သူ့ကိုပေးလိုက်သောစက္ကူလေယာဉ်လေးကိုထုတ်ကြည့်လိုက်သည်။ စက္ကူအဖြူရောင်လေးမှာ လေယာဉ်တစ်စင်းအဖြစ် ပြန်ခေါက်ထားပြီးပြီဖြစ်၏။ လေယာဉ်လေးကို အချိန်ခဏကြာစိုက်ကြည့်နေပြီးနောက် ရှန့်ချန်ခုန်းသည် သူ့စားပွဲပေါ်ရှိသစ်သားလေယာဉ်လေးဘေး၌ နေရာချထားလိုက်လေသည်။

သစ်သားလေယာဉ်လေးကို သူ့အသက်ဆယ့်ငါးနှစ်မွေးနေ့မှာပဲ သူ့အဖေကကိုယ်တိုင်လုပ်ကာ သူ့အားပေးခဲ့ခြင်းပင်။ သူ အထက်တန်းကျောင်းဝင်ခွင့်ရပြီးတာနှင့် သူ့အဖေလေ့လာခဲ့သောတူညီတဲ့အရာကိုပဲလေ့လာရန်ဆုံးဖြတ်ခဲ့သည်။ ရှန့်ချန်ခုန်းကိုအားပေးရန်အလို့ဌာ သူ့အဖေက ၎င်းလေယာဉ်လေးကို သူ့အတွက်လုပ်ပေးခဲ့ခြင်းဖြစ်သည်။

ရှန့်ချန်ခုန်းမှာ ၎င်းလက်လုပ်လေယာဉ်လေးအား သူ့အပေါ် သူ့အဖေ၏မျှော်လင့်ချက်များနှင့်အိပ်မက်များရဲ့ကိုယ်စားပြုအဖြစ် တစ်ချိန်လုံးသိမ်းထားခဲ့ခြင်းဖြစ်သည်။

[ ရှင်အမှန်တကယ်လုပ်ချင်တဲ့အရာတွေနဲ့ပတ်သတ်လာရင်တော့ ရှင်လွယ်လွယ်လက်မလျှော့သင့်ဘူး ]

ရွှီလျန် သူ့ကိုပြောခဲ့တဲ့စကားတွေဟာ သူ့နားထဲမှာ ပဲ့တင်ထပ်နေ၏။ သူ့စားပွဲပေါ်ကအဖြူရောင်စက္ကူလေယာဉ်လေးကိုကြည့်ရင်း တဖြည်းဖြည်းပြုံးလာမိသည်။