Slowly Falling For Changkong ( ဘာသာပြန် )

Chapter-34

ရွှီလျန်ရောက်လာသောအခါ သစ်သီးများပါ ဝယ်လာခဲ့သည်။ ရှန့်ချန်ခုန်းက သူမကို သော့တစ်ချောင်းပေးထားသော်လည်း ရွှီလျန်သည် တံခါးအရင်ခေါက်ရန် ဆုံးဖြတ်လိုက်သည်။

ရှန့်ချန်ခုန်းက သူ့အမေကို ရွှီလျန်အလည်လာမည့်အကြောင်း ပြောထားပြီးသားဖြစ်ပေမဲ့ သူ့အမေက နားလည်ကြောင်းတုံ့ပြန်ချက် မပေးခဲ့ပေ။ ရွှီလျန် တံခါးခေါက်လိုက်ချိန်၌ သူမကို အိမ်ရှေ့တံခါးလာဖွင့်ပေးသောသူမှာ ရှန့်ချန်ခုန်းဖြစ်၏။ ရွှီလျန် သူ့ကို ပြုံးပြလိုက်သည်။ ရှန့်ချန်ခုန်း သူမကို အထဲဝင်ရန်ခေါ်ပြီးနောက် ဆိုဖာပေါ်တွင်စာအုပ်ထိုင်ဖတ်နေသော ဝမ်းရှုလီကိုပြောလိုက်သည်။

"အမေ ရွှီလျန်က အမေ့ကိုလာတွေ့တယ်"

လက်ရှိတွင် သူမက စာဖတ်နေတာဖြစ်နိုင်တာကြောင့် ဝမ်းရှုလီက ယနေ့ မျက်မှန်တပ်ထား၏။ သူမသည် စာအုပ်ထံမှ ခေါင်းမော့ကာ ရှန့်ချန်ခုန်းနှင့်ရွှီလျန်ဆီသို့ကြည့်ပြီး သူမစာအုပ်ကိုပဲ ပြန်ကြည့်သွားသည်။

သူမအမေက အိမ်မှာတစ်ယောက်တည်းရှိနေသည့်အချိန်တွင် ပျင်းနေမှာစိုးရိမ်သဖြင့် စာအုပ်ကို ရှန့်နွမ်ကဝယ်ထားပေးခြင်းဖြစ်သည်။ ဝမ်းရှုလီမှာမူ ၎င်းအား တစ်ချိန်လုံး မထိခဲ့ဖူးသည့်တိုင် ယနေ့တွင် သူမက ရုတ်တရက် စိတ်ဝင်စားလာ၏။ တော်တော်တွေးရခက်တာပဲ...

ရှန့်ချန်ခုန်း ကူကယ်ရာမဲ့စွာဖြင့် ရွှီလျန်ကို ဆိုဖာပေါ်တွင်ထိုင်ရန် ဆွဲခေါ်၍

"ကိုယ် နေ့လယ်စာပြင်ပြီးသွားပြီ ရွှီလျန် နေ့ခင်းကျရင် မင်း ဒီမှာစားချင်ရင်စားလို့ရတယ်... နွှေးလိုက်ရုံပဲ"

ရွှီလျန် ခေါင်းညိတ်၏။

"ကောင်းပါပြီ ကျွန်မကိုစိုးရိမ်စရာမလိုပါဘူး ရှင် အလုပ်သွားလို့ရပြီ"

ရိုးရိုးသားသားပြောရလျှင် ရှန့်ချန်ခုန်းသည် ရွှီလျန်ကို သူ့အမေနှင့်တစ်ယောက်တည်း မထားလိုပေ။ ရွှီလျန်က သူ့အမေကို အနိုင်ကျင့်မှာကို သူ စိုးရိမ်နေတာမဟုတ်ဘဲ ဝမ်းရှုလီ၏အခြေအနေက ရွှီလျန်အား ပြဿနာတစ်ခုခုဖြစ်စေမှာကို စိုးရိမ်နေခြင်းဖြစ်သည်။ သို့ပေမဲ့ သူ့အမေနှင့်အချိန်နည်းနည်းပေးရန် အရင်ပြောဆိုလာသည့်သူမှာ ရွှီလျန်ပဲ ၊ ယင်းက သူ့အား အလွန်ပျော်ရွှင်စေ၏။ သူတို့နှစ်ယောက်ကြားဆက်ဆံရေး တိုးတက်လာစေရန် ရှန့်ချန်ခုန်းလည်း မျှော်လင့်မိပါသည်။