Slowly Falling For Changkong ( ဘာသာပြန် )

Chapter-20

ညခုနစ်နာရီ၌ ရှန့်ချန်ခုန်း အော်ဒါမရတော့သည့်အချိန်တွင် သူ့အခြေအနေအား busy လုပ်ထားလိုက်သည်။ သူ ရွှီလျန်ကိုအကြာကြီးမစောင့်နေစေချင်သလို ဗိုက်လည်းအဆာမခံစေချင်သည့်အတွက် သူ အပြေးအလွှားသွားကာ ရှစ်နာရီတိတိတွင် သူမအခန်းဘဲလ်ကိုတီးလိုက်၏။

"ရှန့်ချန်ခုန်း ရှင်ရောက်လာပြီပဲ"

ရွှီလျန် အိမ်ရှေ့တံခါးကိုဖွင့်ပေးလျက် သူ့ကိုနှုတ်ဆက်၏။

သူ ရွှီလျန်ကိုတွေ့တော့ ရှန့်ချန်ခုန်းစိတ်တွေ ဟိုရောက်သည်ရောက် ရောက်သွားတော့သည်။ အထူးသဖြင့် သူမ၏လှစ်ဟပြထားသောလည်ပင်းပေါ်ရှိအမှတ်အသားများကို သူမြင်သွားသည့်အချိန်၌ပင်...

သူတို့နှစ်ယောက်ပြီးမြောက်ခြင်းများ၏အမှတ်အသားများ....

"......."

ရုတ်တရက် ရှန့်ချန်ခုန်းမျက်နှာနီမြန်းလာရကာ သူ့အသက်ရှုသံတွေဟာလည်းပြောင်းလဲလာ၏။

"အထဲဝင်လာခဲ့လေ"

ရွှီလျန် ခါးကိုင်း၍ သူ့အတွက် အိမ်တွင်းစီးဖိနပ်တစ်စုံကိုထုတ်ပေး၏။ သူ ဖိနပ်စီးလိုက်သည်နှင့် ရှန့်ချန်ခုန်းသည် တစ်စုံတစ်ရာအားသတိပြုမိသွားသည်။ ဒီတစ်စုံက အရင်တစ်ခေါက် သူစီးခဲ့တဲ့ဟာနဲ့မတူတဲ့တစ်စုံပဲ.. ဒီဟာကအသစ်ကျပ်ချွတ်ပဲ။

"ဒီ...ဒီဟာကအသစ်လား?"

"အင်း"

ရွှီလျန် ခေါင်းညိတ်လျက်
"ကျွန်မ စူပါမားကတ်မှာတွေ့လို့.. အပြာရောင်ကရှင်နဲ့လိုက်မယ်ထင်လို့လေ ကျွန်မဝယ်ခဲ့လိုက်တာ၊ ရှင် အခုကစပြီးဒါကိုစီးလို့ရတယ်"

သူ့အကြည့်တွေလျော့သွားပြီး ဖိနပ်စီးလိုက်၏။

ထို့နောက်...

"ရှင့်လက်ထဲကဘာတွေလဲ"

ရွှီလျန်မေးတော့ ရှန့်ချန်ခုန်း သူမကိုအိတ်ကမ်းပေးလိုက်သည်။

"အာ ကိုယ် ဒီကိုလာတဲ့လမ်းမှာဝယ်ခဲ့တဲ့ဖက်ထုပ်ကြော်တွေ ကိုယ်မင်းဗိုက်ဆာနေမှာကိုစိုးရိမ်လို့ အဲဒါကြောင့် လောလောဆယ် ဒါတွေကိုမင်းအရင်စားထားလို့ရတယ်"