كتاب الأمل💜
الجزء 17
هي شافت فيه بعينيها دامعين او عليهم لمعة الترجي : واش درت شي حاجة خلاتك تعصب عليا
عقاب طلق منها او جلس على السرير او هي واقفة قدامو كتشوف فيه كترجف شوية او تسخف بالبكى
عقاب كيشوف فيها: مكيعجبونيش العيالات لي ضعاف فحالك ، العمر لي شاركنا كامل او انا كنقولك قوي راسك او متخلي حتى حاجة كتأثر عليك
هي زادت كتبكي كثر هاد الهضرة كتسمعها منو بزاف او عارفة هاد التدرواشيت لي فيها مانافعاش مي هادشي لي عطا الله ، هضرات او هي كتشهق: هئ هئ باغي تزوج بيها حينت هي احسن مني او ماضعيفاش ياك
عقاب تنهد او جرها عندو مجلسها على فخاضو او عنقها عندو: غير بغيت نشوف ردة فعلك ماغاديش انتزوج
هضرتو خلاتها تهدن شوية مي ولا عندها شك بخصوص يفكر شي نهار يتزوج عليها ، او حتى ايلا فكر فالموضوع مابيدها حيلة من غير تبكي عليه او توافق بلا نقاش
صباح يوم جديد 🌤️
من عند أسماء لي فايقة مبكرة دوشات او صلات صلاتها عاد مشات البلاكار جبدات ملابسها عبارة على عباية فالأسود ، او شال فنفس اللون لبساتهم او هزات صاكها او طالون لبساتو او خرجات من الموبل نزلات التحت او تمشات على رجليها مع داك الشارع حتى وصلات لتقاطع او ضارت مع شارع ثاني ، كان كلو منازل مانقولوش عشوائية ، مي كانت المنطقة نقية ماشي لدرجة الرقي ، من بعيد كيبان ليها واحد التجمع ديال النساء قدام أحد المنازل لي فهاد الشارع ، تمشات حتى وصلات جنبهم لقات عليهم السلام بابتسامة او هوما ردو عليها بنفس البشاشة عاد فتحات الباب ديال داك المنزل او وقفات فالجنب او هوما بداو كيدخلو واحد واحد او كيسلمو عليها عاد يدخلو كانو غير نساء فقط ، دخل كلشي عاد دخلات هي او خلات الباب مفتوح او قلبات بلاكة تما مكتوب عليها (مفتوح)
دخلات الداخل كان عبارة على صالون كبير مفرش بزرابي فالرمادي او محطوطين سدادر فالكرونة ، كل مراة شدات بلاصتها او هي مشات جيهة واحد الباب كان فواحد القنت بوحدو ، فتحاتو او دخلات حطات صاكها او هزات مصحف فيديها او جلسات فقنت بوحدها ، عاد بداو كيجيو عندها النساء بوحدا بوحدا كيستظهرو محفوظهم او يمشيو.
قدام باب هاد الكُتَّاب توقفات سيارة من نوع رونج روفر فالأسود ، تفتح الباب ديال السائق او نزل راجل لابس كوستيم فالأسود ، سرع فخطواتو او فتح الباب اللوراني او نزلات مرة كبيرة تكون فالثمانينات ، بدات كتعكز بعكازها او الراجل لي فتح ليها الباب معاونها حتى وصلات الباب الكتاب ، دق على الباب او بقاو واقيفن كيتسناو شي واحد يخرج عندهم
أسماء كانت كتستظهر عليها وحدا من النساء ، حتى سمعات الدقان او هي تهضر مع المراة
أسماء بأدب: حسبك
المرة حبسات او هي وقفات من بلاصتها مشات الباب حتى كتبان ليها ديك المرة ، قربات عندها او هضرات
أسماء: السلام عليكم
الراجل هضر: لالة راضية جات هنا حينت سمعات بزاف على الجمعية ديالكم ، هي باغيا تقرى القرءان او عندها موضوع بغات تناقشو معاك
أسماء هزات براسها او شافت فراضية بابتسامة : مرحبا بيك (دارت يديها جيهة الباب ) تفضلي
راضية هزات براسها او تمات داخلا او الراجل شاد فيها باغي يدخلها حتى حبساتو أسماء بكلامها
أسماء: سمح ليا ممنوع يدخلو الرجال ، هادا كتاب خاص بالنساء او كاين لي منقبين
الراجل ياله غادي يهضر او هي تحبسو راضية : سير اولدي هي تعاوني ندخل
*يتبع
أنت تقرأ
كتاب الأمل 📖مكتملة📖
العاطفية💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
