كتاب الأمل 💜
الجزء 66
وقفات الطنوبيل ديال عقاب فأحد محطات الدار البيضاء او توقفو موراه 4 السيارات فاللون الأسواد من نوع رونج روفر وحدا مور وحدا ، عقاب كيشوف قدامو او أسماء كتشوف فتليفونها كتسنى إتصال من الأب ديالها او رجليها كتحرك على ارضية السيارة بسرعة بسباب التوتر او عقاب مقدر حالتها او مكتافي بالصمت ، حتى تسمع تليفونها كيصوني شاف جيهتها او أسماء بداو يديها كيتفتفو تاني دوزات الخط دايرا هوط باغلوغ او تكلمات
أسماء : ألو بابا وصلتي
الأب: اه راني فالباب ديال المحطة انت فينك
أسماء فتحات باب السيارة او نزلات كضور عينيها لي كيلمعو بالدموع حينت خايفة ، او كتقلب عليه حتى بان ليها بعيد عليها بشي 10 متر فيديه التليفون دايرو على ودنو، او لابس فوقية بيضة او لحيتو سوداء طويلة كيتخللها بعض الشيب او على راسو قبعة او جنبو واحد لابس تا هو فحالو مي غليض عليه شوية او لحيتو سوداء قاتمة كيبان فسن الثلاتينات
أسماء رجعات شافت فعقاب لي باقي وسط الطنوبيل او تكلمات فالهاتف: انا قدامك ابابا لابسة عباية فالاسود
الأب بدا كيضور راسو حتى قشعها او هو يقطع الخط او هضر مع لي جنبو او تمشاو قاصدينها بخطواتهم المزروبة ، بينما هي مع كل خطوة كيخطيوها كتحس برجليها كيخواو بيها او غادي الطيح من الخلعة مافيهاش الشك ، حتى وقف قدامها او هضرات بخفوت محاولة تخبي خوفها
أسماء: على سلامتك ابابا
الأب كيطلع فيها او ينزل بنظرات احتقار او ملامح وجهو مخسرين : فين هو نقابك ، جيتي لهنا او انت تفسدي
أسماء طلعات فيه عينيها او اكتافات بالصمت او هو عاود هضر هاد المرة مخنزر فيها باغي يقتلها بشوفاتو:مالك كتشوفي واقلة هضرت جاوبيني
السيد لي كان حداه ماعندوش غض البصر فالقاموس ديالو كيشوف فأسماء بإعجاب او تكلم او عينيه مزال عليها : رخف عليها اسي عبد الله ماوقع باس
عبد الله شاف فيه: سيفطتها بالنقاب دابا جاياني بلاش (هز صبعو فوجهها) ولايني من بعد او انتفاهمو على هادشي (نزل صبعو) دابا شدي لينا شي طاكسي نمشيو لدارك عييت بغيت نرتاح عاد نهضرو فعلاش جيت
أسماء بلعات ريقها او هي كتفكر وصايا عقاب فالطريق ، هزات يديها بحركة كتطلب من شي حد يجي، حتى تمو جايين جوج ديال لي كارد وقفو كل واحد من جانب ولكن بعادين عليها ، او تكلم واحد فيهم
الكارد: نعام الالة أسماء
أسماء شافت فباها لي بانو على ملامحو الصدمة اما لي حداه ولا غير كيقرق ، القضية فيها الكارد او غير الهيبة لي واقفين بيها خلاتو يعرف بلي القضية فيها الزبابل ديال الفلوس
أسماء كتشوف فعبد الله: جيبو الطنوبيل هزو فيها بابا او السيد لي معاه ، غادي نمشيو القصر
الكارد هزو ليها براسهم او مشاو يجيبو الطنوبيل او عبد الله شاف فيها مصدوم
عبد الله:ملين جاك هادشي (خنزر) ياكما خرجتي الطريق الفاسقة
أسماء : من بعد او تعرف ملين جاو هاد الفلوس
عطاتو بالظهر او تمشات الطنوبيل ديال عقاب ركبات جنبو او باها كان متبع ليها العين شاف جيهة السائق شاف عقاب لي كيشوف فيه بهدوء ، بدون أي تعبير على وجهو ، حتى وقفات طنوبيل جنبو ركب هو او السيد لي معاه عاد التحركات الطنوبيل ديال عقاب او موراها الطنوبيلات لاخرين او منها لي فيها عبد الله
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
