كتاب الأمل 💜
الجزء 43
فتحات الكتاب او دخلات من موراها العيالات ، حطات صاكها فداك البيت او جلسات وسطهم كتشوف فيهم كاملين عاد هضرات
أسماء: كيف قلت قبل السبت او الاحد ماغاديش تبقاو تجيو ، يعني غدا ان شاء الله بلاما تجيو
وحدا من العيالات : ماغاديش تنقسي لينا الثمن ، حينت راك غادي تحيدي لينا يوماين
أسماء شافت فيها او تنهدات: شحال كتخلصي لشهر
المرة :50 درهم
أسماء ابتاسمات : ايلا لقيتي ماتحيدي منها غير حيدي (شافت فالعيالات) متافقين معاها ننقس الثمن
وحدا اخرى: 50 درهم كي والو ابنتي
الكل هز براسو مأيد كلامها او هي شافت فالمرة لي هضرات : ايلا كنتي ماقادراش على هاد 50 درهم فاش نبغيو نخرجو اجي عندي نقيد سميتك او ماتبقايش تخلصي گاع
المرة : ماقصدتش هادشي ابنتي
أسماء وقفات من موضعها ماعندها كانة للنقاشات الفارغة ديالها : راجعو انا شوية او نعيط ليكم تستظهرو
مشات القنت آخر او جبدات صلاية فرشاتها او صلات صلاتها ، عاد جلسات شادة قنت او كتشوف فالعيالات بسهو ، تفكيرها مشغول ، الهضرة ديال عقاب فحال هضرة فرح او بان ليها منطقي ، ماغاديش تبقى حياتها هاربة ، تنهدات او بدات كتعيط عليهم يعرضو حتى وصلات ل11 خرج كلشي او حتى هي بدات كتجمع فالروينة حتى كتسمع تليفونها كيصوني ، شافت فالرقم كانت فرح او هي دوز الخط
أسماء: ألو
فرح: فينك
أسماء : فالكتاب
فرح : واخا تسنايني تما هانا جاية عندك
أسماء : واخا (قطعات الخط او جلسات كتسنى فيها )
مدازش وقت طويل حتى كانت عندها ، دخلات لابسة سروال جينز او قميجة طويلة شوية او شعرها جامعاه كوب شوفال كيبان طويل ، مع شوية ميكاپ فوجهها ، حيدات الطالون فالباب او تمشات حتى وصلات عندها او جلسات جنبها
بعدما سلمات
فرح : صافا عليك
أسماء : الحمد لله ، او انت
فرح : الحمد لله
أسماء ابتاسمات: اش سباب هاد الزيارة
فرح بأسف: عمرني قلت ليك انت صگعة
أسماء ضحكات: لا عمرك قلتيها ولكن عارفة راسي صگعة
فرح خسرات سيفتها : عمار لبارح بليل قال الماما باغي يتزوج
أسماء بفرحة : مبرووك عليه ، الله يسهل عليه
فرح هزات حاجبها : من نيتك
أسماء ضحكات : من نيتي علاش
فرح فتحات فمها غادي تهضر او هو يتسمع الدقان فالباب
فرح باستغراب: شكون جاي
أسماء وقفات حتى هي كتشوف فالباب باستغراب : ماعرفتش (رفعات صوتها) شكوووون
............: أنا يوسف اختي أسماء
أسماء ابتاسمات: دخل اخوياا يووسف راني ماشي بوحدي
رجعات جلسات او شافت ففرح لي كتشوف فيها باستغراب: غادي نعرفك على السيد لي غادي يعاوني
فرح تبشرات او هو يتسمع صوت يوسف فوق راسها : سمحي ليا ايلا جيت فشي وقت مامناسبش
أسماء شافت فيه او ضربات فالسداري جنبها : لا لا ، جلس
جلس يوسف حداها ماطلعش عينو ففرح ،
او فرح كتشوف فيه مخرجة عينيها : شكون هادا
يوسف شاف فيها او ركز بعينو على وجهها او حوايجها ولكن اكتفى بالصمت حتى هضرات أسماء
أسماء بابتسامة: هادا يوسف هو لي غادي يقري الدراري
فرح شافت فيها : اسم على مسمى يا ختي (شافت فيه) يوسف او جمالو فحال يوسف (ابتاسمات بغباء) بان ليا غادي ندير فحال زليخة
أسماء كانت مخرجة فيها عينيها عارفة فرح لي جات على فمها كتقولها ولكن ماشي لهاد الدرجة، نغزاتها او هضرات بين سنانها : قطعي الحس
يوسف تنهد او شاف ففرح: زوينة ولكن كون سترتي راسك غادي يكون احسن
ههههههه واخا اسي يوسف ، ولكن راه المظاهر خداعة ، الايمان فالقلب 🙂
YOU ARE READING
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
