كتاب الأمل 💜
الجزء 117
عقاب سمع إسمو ضار شاف فيه عاقد حجبانو متأكد جايب ليه شي خبار ملاوطة او الكارد كيشوف فيه او يتفتف
الكارد: لالة فدوى مكايناش فلاكاب
عقاب وقف من بلاصتو بسرعة او هو كيشوف جيهتو بعصبية : كيفاااش مكيناش
الكارد كيبلع فريقو : كنا سادين عليها مشينا باش نطلو عليها كيف موصي او مالقيناهاش
عقاب حرك خطوايه او خرج بسرعة من الصالون او موراه الكارد ، راضية او مريم كانو كيشوفو فبعضهم مصدومين او عائلة أسماء كيف الأطرش في الزفة مامقشبلين والو ، من غير أسماء لي تبعات عقاب بعينيها كتنهد حتى خرج او عضات شفتها التحتية بتوثر
برى فالجردة واقف عقاب كيغزل بالأعصاب او عينيه مخرجهم حمرين فالكارد لي حانيين راسهم قدامو خايفين
عقاب : مرا يا ولاد القح***اب ماقدرتوش عليها ، خرجااات او ماشافها حتى واحد ، مخدم عندي الرعاوين ، غادي نجري على الزاا*مل بوكم كلكم ، ماعندي ماندير بيكم (عض شفتو مزييير عليها بالأعصاب او كمل كلامو ) تحركو قلبو عليها ليحرق طواسل مكم
الكارد غا سمعو تحركو جاتهم من الجنة والناس هربو طايرين من قدامو ركبو فالطنوبيلات او خرجو مزفزفين من القصر ، بينما هو حط يديه على جنابو او بدى غادي جاي او عصبيتو كتخليه يبدى يسب تحت نيفو حاقد على الوضعية
بعيد على القصر بشوية نقدرو نقولو بربع ساعة ديال الطريق ، سيارة من نوع كليو فالرمادي ، سايقها يوسف كيشوف فالطريق او مرات يضور يشوف جيهة هاديك لي مرمية فالسيارة اللور او يعض على شفايفو ، مسافة الطريق او كان فبلاصة غير الخلى او القيفار فحال ايلا داخل مع الطريق ديال شي بادية ، كيبان فداك الشانطي غير طنوبيل كاطكاط بيضة ، زاد بسيارتو شوية حتى ولا جنبها او توقف ، ضور غير طرف عينو كتبان ليه الزاجة ديال ديك السيارة كتنزل او ظهر وجه فرح لي كانت لابسة عباية فالأسود او شال فالأبيض او تكلمات بصوت هادئ
فرح : تبعني
قالت كلامها او طلعات الزاج ديال الطنوبيل او ديمارات ، او يوسف دار نفس الشي ديمارا تابعها من اللور حتى بانت ليه انحارفات على الشارع او دخلات مع ديك الأرض القاحلة ، مسافة مكانتش طويلة او هي توقف قدام دار صغيرة نزلات كتجرجر بالعباية او تسناتو حتى نزل ، شافت فالكرسي اللوراني او هضرات
فرح : ايلا كنتي تقدر تهزها دخلها الداخل
يوسف طلع غير طرف عينو او نزلو : شوفي كي تفيقيها واحد الكارد هو لي هزها حطها فالطنوبيل
فرح بغيض : جيبو معاك ديك الساع يعاود يهزها
مشات جيهة الطنوبيل مخطياه او فتحاتها كطل على فدوى لي مغيبة او حالتها حالة ملوية فواحد ليزار بيض فحال شي ميت ، دخلات راسها او حاولات تجرها عندها كتحس بيها ثقيلة حتى خرجات ليها رجليها او شافت جيهة يوسف لي كان كيشوف فالدار او تكلمات
فرح : هزها غير من رجليها او انا نهزها من راسها عاوني ندخلها
يوسف شاف فيها او هز براسو ، هي جراتها حتى ولا النص ديال جسمها برى او عاد دخلات قابطاها من راسها مزيان او يوسف شدها من رجليها او هزوها تمشاو بيها جيهة الدار او فرح قتلاتها بالتقل تقول هازة بطانة مرخية داكشي باش ثقيلة بزاف ، يوسف دفع داك الباب ديال القزدير لي تحل دغيا او دخل الداخل بان ليه فوطوي حطوها عليه او فرح تقادات فالوقفى كتنفس براحة فحال ايلا كانت هازة جبل او تنفض فيديها
فرح : اووف على السلامة (شافت فيوسف) انا غادي نبات معاها هنا حتى تفيق ، انت ملين تمشي قول لأسماء بلي كلشي داز مزيان
يوسف : ماتخافيش تبقاي هنا بوحدك
فرح بثقة : معاك كزاوية، لي دوى يرعف ، متنخاافش
يوسف هز حاجبو : اولا كانو بزاف
فرح سكتات او هو عاود تكلم : انا غادي نبات فالطنوبيل برى ، يصبح او يفتح
*يتبع
ČTEŠ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
