كتاب الأمل 💜
الجزء 30
يوسف: الموضوع نسيتو الالة راضية
راضية : انت نسيتي ولكن انا لا ، علاش ملين سولك عقاب علاش بغيتي تخلي خدمتك قلتي ليه ظروف خاصة ، كان خاصك تقوليه لي وقع منها انتهناو من ديك اللفعة او منها تحافظ على بلاصتك فالقصر
يوسف : كنحتارم سي عقاب او مابغيتش نخيب الصورة ديال مراتو فعينو ، تقدر تكون لالة فدوى ندمات او انا نكون سباب نفرق شملهم
راضية باستهزاء: كتخربق اولدي ، او ماعرفتش علاش إحساسي كيقول ليا بلي هاديك ماشي اول مرة تقرب منك او تهضر معاك بديك الطريقة
يوسف هز فيها عينو: الموضوع ماشي كيفما فبالك الالة راضية
راضية قربات وجهها عندو بطريقة خلاتو يتوتر : عاود ليا ياك من ديما كنتي كتعتابرني ميمتك لي تحرمتي منها
يوسف شاف فأسماء لي وقفات او تكلمات مخاطباهم: بان ليا الموضوع خاص نخليكم تهضرو فراحتكم
مشات من قدامهم خرجات او راضية رجعات شافت فيوسف مطلعة حاجبها بمعنى هضر
يوسف تنهد او تكلم بهدوء: فدوى الالة كنت خاطبها او ناوي انتزوج بيها ولكن ماكتابش ، كانت تقطعات علاقتنا بسبب اني كنت باغيها اتحجب او هي كانت رافضة ، من بعد مدة دخلات القصر على أساس خطيبة ولدك ، خرجتها من عقلي فمرة حينت هي ولات عندها حرمة ، او مامنحقيش نشوف فيها حينت غادي تولي على رقبة راجل او مابغيتش دنوبو يطيحو على كتافي ، ولكن هي من بعد الزواج ندمات او ولات كتجي عندي بزاف ولكن كنصدها حينت بصح انا خرجتها من عقلي ، ملين ولا الأمر كيتكرر بزاف لدرجة ولات باغيا تسلمني راسها واخا مزوجة تما فاش قررت نخرج من القصر حينت عارف بلي غادي يجي نهار لي انغلط فيه او نطيح فالمعصية
راضية كانت كتسمع فيه بهدوء فحال ايلا متوقعة هادشي كامل ، ابتاسمات ليه او تكلمات: درتي الصواب اولدي ، الله يسهل عليك فخدمتك الجديدة او شوف بنت الناس لي تناسبك او تزوجها اما هاديك كنتي غادي ضيع راسك معاها
يوسف هز براسو : عارف الحاجة
راضية تبسمت ثاني : نوض عيط على أسماء نهضرو على الخدمة ، حينت هاديك ماتستاهلش نخففو عليها ذنوبها
يوسف هز براسو او مشا خرج على برى لقى أسماء متكية على الحيط او مربعة يديها كتفكر
يوسف: اختي أسماء
أسماء قفزت من بلاصتها او شافت فيه : خلعتيني (تحركات عندو ) صافي ساليتو
يوسف هز براسو : اه
دخل او هي دخلات موراه اجتامعو مع بعضياتهم كيهضرو او يتافقو على الخدمة
من بعد ما سالا حديثهم وقفات راضية او شافت فأسماء
راضية : غادي نسيفط ليك غدا شي واحد يجيبك ابنتي ، خاص نشركو الطعام ، باش ربي يسهل علينا
أسماء بتوتر : كون غير خليتيها لنهار آخر
راضية تخطاتها خارجة : قررت ، مرحبا بيك غدا فقصر الشريف
أسماء شافت فيوسف : هاد لالة راضية راسها قاصح
يوسف ضحك: مزال تعرفي عليها اكتر او غادي تأكدي بلي هي مرة متحكمة او سلطوية بزاف او كلمتها مكتنزلش الأرض ،كنت كنستغرب كيفاش كانت كتفرض قراراتها على سي عقاب ، لي مكيسيرو حتى واحد
أسماء هزات صاكها او تمات خاجة كتهضر مخسرة سيفتها : غير بغيتي تخصر الديكور او جبدتي هاد عقاب
خرجو على برى هي وياه او بدات كتسد فالباب او هو هضر : الله يكون فعونك هاني مشيت
أسماء شافت فيه : امين ، الله يعاون
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
