كتاب الأمل 💜
الجزء 44
فرح غير كتبتاسم تقول دايرين ليها التنويم : حتى انت زوين
يوسف ضور عينو شاف فأسماء: كنت باغي نهضر معاك بخصوص غدا ، ماحددتيش ليا الوقت معاياش نجي او ماعرفتش الصراحة كيفاش نبدى معاهم ، يعني ماكرهتكش تقولي ليا شنو ندير
أسماء شافت ففرح لي مزال كتشوف فيه او تبتاسم او رجعات شافت فيه: غدا أول يوم حاول غير تعرف عليهم ، او عرفهم على القرءان ، او وريهم كيفاش يحفظو او ملين يبداو ، بنسبة الوقت غادي دير من 2 حتى ل5 ياك مناسبك
يوسف هز براسو: اه
أسماء وقفات : نمشي نجيب ليك لاليست ديال الدراري لي غادي يجيو
مشات لداك البيت او هو رجع عينو لفرح لقاها مزال كتشوف فيه طلع حاجبو مستغرب منها او ضور عينو متجاهلها حتى سمع كلامها
فرح بتساؤل : مزوج ؟
يوسف شاف فيها او جاوب باستغراب: لا
فرح قربات عندو: اتقى فيا وجه الله او تزوج بيا
يوسف بعد عليها او هضر بحدة: واش انت مريضة اولا كتبوهلي عليا
فرح ابتاسمات: انا حبيتك من الشوفة اللولة
يوسف وقف : انت بنتي ليا ماشي حتى اللهيه
تمشى غادي جيهة الباب او هو يسمع صوت أسماء كيناديه او ضار شاف فيها : غير خلي اختي ديك لاليست حتى لغدا او عطيها ليا
لبس بلغتو او خرج او هي شافت ففرح ليكانت مزال متبعاه بعينيها ، غززات سنانها او جمعات يديها او عطاتها بتسرفيقة حتى تسمعات سمااط ، خلات فرح تقفز من بلاصتها او شدات حنكها بألم
فرح شافت فأسماء: واش تسطيتي (كتحك حنكها) قصحتيني
أسماء: كون تشوفي تسطيتك انت ، كون نضتي تلاحيتي عليه واش مرضتي (هزات صاكها او رجعات شافت فيها ) نوضي نمشيو فحالنا
فرح وقفات او هي مزال كتحك فحنكها او تمشات مور أسماء حتى خرجو على برى سدو الكتاب او طلعات مع فرح فطنوبيلتها ، غاديين بين الشوارع
أسماء: فين غادي نمشيو
فرح شافت فيها كتبتاسم: نتغداو او نتسراو ، شحال هادي ماخرجنا انا وياك
أسماء هزات براسها : واخا سيري على الله
داكشي لي كان مشاو لريسطو تغداو او من بعد عاد دخلو مع شوارع كازا كيتسناو تبان شي بلاصة سبيسيال ، لي يقدرو يضورو فيها
أسماء شافت ففرح : سيري المول ، راه حوايجي مانعرف فينهم خاص ناخد مانلبس
ضورات فرح الطنوبيل فاتجاه المول ، حتى وصلو ، سطاسيونات او نزلو كيضورو بين البوتيكات كتاخد لي خاصها ، منها مسارية او منها كتشري حتى تعاشات العشية
رجعو البلاصة فين حطات الطنوبيل كتلقاها ما عندها فين تحركها جات الوسط او هي تصعر
فرح شافت فأسماء بغضب : ناااري ليوم غادي نخرج ديك بنت كازا ، ليوم طيح بطانة
أسماء ضحكات على تصرفاتها : االبطانة لي غادي الطيح هي انت ، تهدني شوية او يجي مول شي طنوبيل يحيد طنوبيلتو او انتحركو
فرح تكات على وحدا من الطنوبيلات كتحرك رجليها على الأرض بعصبية : انا راه قليلة صبر متنحملش انتسنى
أسماء حركات راسها بلا حول او سكتات ماجاوبتهاش جالسين كيتسناو شي واحد يجي ، حتى وقف عليهم واحد القلدة لابس مسكسك على الحالة هو او صاحبو كيشوفو ففرح او أسماء ، او يطلعو او ينزلو بإعجاب
واحد من الدراري : اش كيدير الزين بوحدو هنا ، ماخايفينش
فرح شافت فيه مخسرة ملامح وجهها : كون كنا نخافو من دجاج كاعما نريشوه
لاخر شاف فأسماء كيضحك : صاحبتك صعيبة ، ولكن انت بنتي ليا داخلا سوق راسك ماشي ديال الصداع
*يتبع
YOU ARE READING
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
