Heartless December❄️ ZG version

အပိုင်း ၂၈ : ကန်ထုတ်ခံရခြင်းများ

❄️❄️❄️

"ဒါနဲ့ အဲ့ဒီ 'သူ' ဆိုတာ...
အစ်ကိုအာကာဝေယံလား..."

'အစ်ကို' ဆိုတဲ့စာလုံးနှစ်လုံးက ကိုယ့်ထက် အသက်ခြောက်နှစ်ကြီးနေလို့သာ အရေခြုံယဉ်ကျေးမှုအရ ဖျစ်ညစ်ထည့်ထားရတဲ့ အပိုစာသားတွေလိုပဲ။ အမှန်တော့ ဘာလေးစားသမှုနဲ့မှ ထည့်ချင်စိတ်ရှိမနေဘူး။

"သူက ကိုကို့ကို အဲ့လိုပြောပြသွားတာပေါ့..."

"..."

"ဪ... အဲ့လိုကိုး..."

ပြန်မဖြေခြင်းကနေ အဖြေရလိုက်ပြီးတဲ့နောက်...
ပတ်ပတ်လည်ကို ၃၆၀ ဒီဂရီပြည့်အောင် တစ်ချက်ချင်း လှည့်ကြည့်လိုက်မိတယ်။ ပစ္စည်းတွေက သိပ်ပြီးမခမ်းနားလှပေမယ့် သူဟာနဲ့သူ သပ်ရပ်လှပအောင် ပြင်ဆင်ထားတဲ့အတွက် သာမန်ဈေးသင့်တိုက်ခန်းတစ်ခန်းရဲ့ အပြင်အဆင်တွေနဲ့ကွဲထွက်ပြီးသေချာဒီဇိုင်းချထားတဲ့ကွန်ဒိုအငယ်စားလေးလိုဖြစ်နေတဲ့ ဒီနေရာ...။ ကျွန်တော် ကိုကို့တိုက်ခန်းထဲရောက်ခါစကဆို ဒီလိုတိုက်ခန်းမျိုးကိုလည်း ဒီလိုပုံစံပြင်ဆင်လို့ရတယ်ပေါ့ လို့ တွေးမိပြီး အမြင်ကျယ်ခဲ့ရသေးတယ်။

တကယ်လည်း... အဲ့ဒီလူပြောတဲ့ နေချင်စရာဖြစ်အောင်ဆိုတဲ့အချက်တွေ အကုန်ရှိနေပါရဲ့။

"ဒီနေရာက အရင်ကဒီလိုမဟုတ်ဘူး... ငါဒီမှာစနေပြီး နှစ်နှစ်လောက်ထိ သပ်ရပ်သန့်ရှင်းမှုကလွဲရင် ဘာမှသိပ်မရှိတဲ့ အခန်းလွတ်တစ်ခုလိုပဲ၊ ဧည့်ခန်းထဲမှာဆို ဆိုဖာရှည်တစ်ခုနဲ့ စားပွဲပုတစ်လုံးပဲရှိတယ်၊ အိပ်ခန်းထဲမှာလည်း ကုတင်နဲ့ စာအုပ်စင်တွေပဲရှိတယ်... အသုံးအဆောင်တွေကလည်း စာလေ့လာဖို့ လိုအပ်တာတွေနဲ့ တစ်ကိုယ်ရေပစ္စည်းတွေကလွဲရင် တစ်ခြားဟာတွေသိပ်မထားဘူး... နောက်ပိုင်း အာကာဝေယံနဲ့ငါတွဲဖြစ်တော့ သူက ဒီရောက်လာတိုင်း ငါ့ကိုပြောတယ်..."

ဧည့်ခန်းလေးထဲကိုဝေ့ကြည့်ရင်း နေရာတစ်ခုရဲ့အရင်ပုံစံကိုဖော်ပြပေးတဲ့ စကားလုံးတွေနဲ့အတူ မှန်ပါးလေးအောက်က မျက်ဝန်းနက်တွေထဲမှာလည်း အဲ့ဒီဘာမှသိပ်မရှိတဲ့ အခန်းတစ်ခန်းရဲ့သဏ္ဌာန်ကပြန်ပြီး ထင်ဟပ်လာသယောင်...။ သူကြည့်ရာကို လိုက်ကြည့်လိုက်တော့ ကိုကိုဆက်ပြောတဲ့စကားတွေက ကျွန်တော့်အတွေးဆုံချက်ထဲကနေရာမှာ ပုံရိပ်တွေအဖြစ် ပေါ်လာတယ်။