အပိုင်း။ ၃၀
ကြမ်းတမ်းတဲ့လေအေးတွေက နွေဦးရဲ့ နောက်ဆုံးမိုးပြေးနဲ့အတူ လွင့်ပါးကုန်ကြတဲ့အတွက် ရန်ကျိုးရဲ့ရာသီဥတုက လတ်တလောမှာ နွေးထွေးလာတယ်၊ ကောင်းကင်တခွင် ပြာလဲ့နေကာ ဘယ်ကိုကြည့်ကြည့် ကြည်လင်နေတဲ့ ပတ်၀န်းကျင်ကို တွေ့ရလိမ့်မယ်၊ မိုးပြေးကြောင့် ညတွင်းချင်း ပွင့်လန်းလာကြတဲ့ ပန်းတွေရဲ့ ပွင့်ဖတ်လေးတွေပေါ်မှာ မိုးရေစက်တွေ တင်ကျန်ခဲ့ပြီး သူတို့တွေက နွေးထွေးညင်သာတဲ့ လေပြေနဲ့အတူ ဘယ်ညာယိမ်းနွဲ့နေကြတယ်။
ရှောင်းကျန့်က မျက်လုံးတွေကို အနည်းငယ် မှေးကျဉ်းထားပြီး တောက်ပနေတဲ့ နေရောင်ထဲကို ငေးကြည့်နေတယ်၊ ကျန်ရှိနေတဲ့ ပူပန်မှုတချို့က နှလုံးသားမှာ အခိုးအငွေ့တွေများအဖြစ် ရစ်သိုင်းဖွဲ့တည်နေတယ်။
ပုယွီက အခါးရည်ချပေးရင်း ရှောင်းကျန့်ကို အရိပ်အကဲကြည့်ပြီး မေးမြန်းလာတယ်။
"ယန်လူကြီးမင်းကိစ္စနဲ့ ပတ်သက်ပြီး ဘယ်လိုများ မှာကြားလိုပါသလဲ အရှင်"
ရှောင်းကျန့်က မဖြေသေးဘဲ အခါးရည်တစ်ငုံ သောက်တယ်၊ အတန်ကြာ နှုတ်ဆိတ်နေပြီးနောက်မှ ပြောလာတယ်။
"မတော်တဆ ခြေချော်ကျပြီး သေတယ်လို့ သတင်းပို့လိုက်.. အစားထိုးဖို့အတွက် အထက်က ကြည့်စီစဉ်လိမ့်မယ်"
"အရှင့်ရဲ့ သနားကြင်နာမှုက မြင့်မြတ်လှပါတယ်"
ပုယွီက ပြန်ပြောတယ်။
ယန်လီက အချစ်ကြောင့် ရူးသွပ်သွားတာ မှန်ပေမဲ့ ရှောင်းကျန့်ကတော့ သူ့ရဲ့ဂုဏ်သိက္ခာကို ဆက်လက်ထိန်းသိမ်းပေးဖို့ ဆန္ဒရှိပါတယ်၊ ဘယ်အရာကြောင့်မှ မယိမ်းယိုင်ဘဲ ထင်းရူးပင်လို ဖြောင့်မတ်ခဲ့တဲ့ လူငယ်လေးက ဘယ်တော့မှ ပြန်မလာနိုင်တော့ဘူး ဆိုပေမဲ့လဲပေါ့။
"ဒါတွေက ယန်လူကြီးမင်းကျန်ရစ်ခဲ့တဲ့ ပစ္စည်းတွေပါ"
ပုယွီက ပစ္စည်းတွေကို ရှောင်းကျန့်ရှေ့ယူလာတယ်၊ ယွန်းဘူးငယ်တစ်ခု၊ စည်းမျဉ်းအတိုင်း ပြန်အပ်ရတဲ့ ယန်လီရဲ့အဆောင်အယောင်အရာရှိ၀တ်ရုံနဲ့ အမည်းရောင် အရာရှိဦးထုပ်၊ စုစုပေါင်း ပစ္စည်း ၃ မျိုးပါတယ်။
YOU ARE READING
He Dufo [何渡佛] •COMPLETED•
Fanfiction"အမှန်စင်စစ် အတွင်းအထိ ဗလာနတ္ထိ ဖြစ်ရိုးမှန်ရင် ဘယ်လိုကြောင့် ငါ့ကို မကြည့်ဝံ့သလဲ" ⚠️ BJYX, Yizhan, Adventure, Romance, Angst, Historical, Monk and Princess. I do not own this story. Fan translation. All rights reserved to the original author : 橘子...