ပြန်လည်မွေးဖွားလာသော ဧကရာဇ် (book 2) ဘာသာပြန်

Arc 3🗡81🗡သူမ

Chapter (81) Arc 3
သူမ

"မကောင်းတော့ဘူး!"

"ဒီစပျစ်နွယ်ပင်က မထိန်းနိုင်တော့ဘူး"

"ဒါက ဘယ်လိုဖြစ်တာလဲ? ဒီလိုစပျစ်နွယ်ပင်ကြီးက ဘယ်လိုလုပ် ညှိုးနွမ်းပြီး သေသွား​တော့မလို ဖြစ်​နေတာလဲ"

လူတိုင်းသည် ဆေးဝါးကျွမ်းကျင်သူများ ဖြစ်ပြီး ၎င်းတို့တွင် သဘာဝအလျောက် ဆေးဝါးများကို နှစ်သက်ကြသည်။ ဤမျှကြီးမားသော စပျစ်နွယ်ပင်ကြီး သေဆုံးနေသည်ကို တွေ့လိုက်ရသဖြင့် မအော်ဘဲ မနေနိုင်တော့ပေ။

"လူတိုင်း မြင်နေရတာ အမှန်ပါပဲ... ကျွန်မတို့ရဲ့ မြေသွေးကြောနှလုံးစပျစ်ပင်က သေပါတော့မယ်။ ကျွန်မနည်းလမ်းတွေ အများကြီး စဉ်းစားပြီးပြီ.... ဒါပေမဲ့ တကယ်ကို နည်းလမ်း မရှိခဲ့ဘူး.... ဒါကြောင့် နည်းလမ်းကောင်းများ ရနိုင်မလားဆိုတာ စောင့်ကြည့်ဖို့ အားလုံးကို အတူတူ လာကြည့်ဖို့ ဖိတ်ခေါ်ခဲ့တာပါ!"

ဆေးဝါးသခင်ချန်၏ မျက်လုံးများမှာ မှေးမှိန်သွားသည်။ မြေသွေးကြောနှလုံးစပျစ်ပင်သည် ဆေးဥယျာဉ် အကိုင်းအခက် တစ်ခု၏ အခြေခံအုတ်မြစ်ဖြစ်ပြီး အပင်သည် အဖိုးမဖြတ်နိုင်ပေ။

ဆေးဥယျာဉ်ကဲ့သို့ အစွမ်းထက်သော စွမ်းအားတစ်ခုပင်လျှင် အလွယ်တကူ မဖယ်ရှားနိုင်ပေ။ နှစ်ပေါင်းများစွာ လွန်လာခဲ့သည့် အကိုင်းအခက်သည် အမှန်တကယ် ပျက်စီးသွားပါက သူသည် သမိုင်းတွင် အပြစ်သား ဖြစ်လာလိမ့်မည်။

"မြေသွေးကြောနှလုံးစပျစ်ပင် အကြောင်း ကျုပ်တို့လည်း သိပ်နားမလည်ဘူး... ဆေးဝါးသခင်ချန်တောင် ကျုပ်တို့လည်း ဘာမှ မလုပ်ပေးနိုင်မှာကို ကြောက်ရတယ်"

အဘိုးကြီး တစ်ယောက်က အဲဒါကို ခဏကြည့်ပြီး ကူကယ်ရာမဲ့ ပြောလိုက်သည်။ သူ့စကားက သူများတွေကိုပါ သဘောတူလာစေ၏။

မြေသွေးကြောနှလုံးစပျစ်ပင်၏ စိုက်ပျိုးနည်း စနစ်ကို ဆေးဥယျာဉ်တွင်သာ တွေ့ရှိနိုင်သည်။ ထိုအရာက လက်မလွှတ်နိုင်သော လျှို့ဝှက်ချက် တစ်ခုဖြစ်သည်။ နှလုံးစပျစ်ပင်၏ ဂုဏ်ရည်များနှင့် အရင်းနှီးဆုံး ဆေးပညာရှင်ချန် ပင်လျှင် မကူညီနိုင်ရင် တခြားသူတွေ ဘာလုပ်နိုင်မှာလဲ။