ပြိုင်ဘက်ကင်းအမျိုးသားဧကရီ

အပိုင်း(၂၃) ပထမဆုံးအကြိမ် အရည်အချင်း ထုတ်ပြခြင်း (တတိယပိုင်း)

အရင်က ကျောက်ဝမ်ယုံးအား ကုထင်ရန်ပြောခဲ့သည့်စကားများကို အနှီလူက စိတ်ထဲထည့်လားမထည့်လား မသိချေ။ သို့ပေမယ့် အခွန်ကိစ္စကတော့ ပြောင်းလဲမှု လုံးဝ မရှိချေ။ အခွန်ဝန်ကြီးဌာနမှ ထိုအဘိုးကြီးက နေ့တိုင်းလိုလို ကျောက်ဝမ်ယုံးထံ ပိုက်ဆံမရှိဘူးဟု ညည်းနေဆဲပင်။

ကုထင်ရန်သည် ကိုယ့်ရဲ့ အကြံက အရမ်းကောင်းသည်ဟုထင်မိသည်။
ကျောက်ဝမ်ယုံးရဲ့ အသိအမှတ်ပြုခြင်း မခံရ
သဖြင့် စိတ်ထဲမှာလည်း အနည်းငယ် မသက်မသာဖြစ်နေလေသည်။

သို့ပေမယ့် သူလည်း စိတ်ထဲမှာပဲ တွေးနေတာဖြစ်ပြီး ကျောက်ဝမ်ယုံးကို ဘာတစ်ခွန်းမှ မပြောချေ။

သို့သော် သိပ်မကြာခင်တွင် အခွန်ဝန်ကြီးဌာန၌ ပြဿနာအကြီးကြီး ဖြစ်ပွားခဲ့သည်။
ကာကွယ်ရေးဝန်ကြီးဌာန၏ ဝန်ကြီးက အခွန်ဝန်ကြီးဌာန၏ ဝန်ကြီးကို ညီလာခံခန်းမ၌ တိုက်ရိုက် တိုင်ကြားခဲ့လေသည်။
နှစ်ဖက်လုံးက အချင်းချင်း လုံးဝ မျက်နှာ
မထောက်ဘဲ ပုတ်ခတ်ခဲ့ကြလေသည်။
ပြောရရင် စစ်ရေးအသုံးစရိတ်ပြဿနာကြောင့်ဖြစ်သည်။

ထျယ်မောက်စစ်တပ်သည်
ကျောက်ဝမ်ယုံး၏ ကိုယ်ပိုင်စစ်တပ်ဖြစ်သဖြင့် အခွန်ဝန်ကြီးဌာနက မျက်နှာလုပ်နေတာကြာပြီဖြစ်သည်။ ဧကရာဇ်နေရာကို ကျောက်ဝမ်ယုံးက အတည်တကျ ဆက်ခံပြီးကတည်းက ထျယ်မောက်စစ်စပ်၏ စစ်ရေးအသုံးစရိတ်သည် လုံးဝ လျော့နည်းသွားခြင်းမရှိခဲ့ချေ။

သို့ပေမယ့် အနောက်မြောက်အရပ်၊ အနောက်တောင်အရပ်နှင့် တောင်ပိုင်းစစ်တပ်များ၏ စစ်ရေးအသုံးစရိတ်က တပြေးတည်း လုံးဝ မရှိခဲ့ချေ။ လွန်ခဲ့သည့်နှစ်အနည်းငယ်က တောင်ပိုင်းစစ်တပ်သည် နန်ကျန်းစစ်တပ်နှင့် တိုက်ပွဲဖြစ်ခဲ့ပေမယ့် ထောက်ပံ့ကြေးကို ယနေ့အချိန်ထိ ပေးဆောင်ခြင်းမရှိသေးချေ။

ကာကွယ်ရေးဝန်ကြီးသည် ငယ်ရွယ်စဉ်အခါက ရဲစွမ်းသတ္တိနှင့်ပြည့်စုံသော ယောင်္ကျားတစ်ယောက်လည်းဖြစ်သည်။ စစ်မြေပြင်ပေါ် တတ်ခဲ့ပြီး တိုက်ပွဲလည်း ဝင်ဖူးခဲ့သဖြင့် ထိုလူတွေ၏ ပင်ပန်းဆင်းရဲမှုကို နားလည်မှာ သေချာပါသည်။