أحلام يعرب (ليبية_منقولة)

الحلقة 3

#أحلام_يعرُب ((بين الحب والحرب))
#الحلقة_3 (( الفصل الثاني قرارت حاسمة))
((دراما واقعية مقتبسة من أحداث حقيقية))
.
.
.
لايك قبل تقري ♥ من بدري نحاول نزل الحلقة بصورة مابتش تنزل... بلا صورة مش مهم
.
.
.
(( لو عُرِضت الأقدار على الإنسان،  لاختار القدر الذي اختارهُ الله له))
.
.
متمدد على سريره وحط يده اليمين فوق اعيونه.. واليد اليسار تحت رأسه متكي عليها
حس بتليفونه يهز تحت المخدة.. ساوى قعدته ومد يده طلعه ومجرد ماشاف الاسم ابتسم بدون شعور

رد طول :  اووووووه عمي المهدي

المهدي  :  والله الواحد المفروض مايكلمك ولا ينشد عنك... معقولة لاتكلم ولاتقول عمي ينشغل علي ويسأل علي ياراجل

ابتسم وطبس  :  عندك الحق.. والله العظيم عندك الحق وماعنديش عذر ونبيك اتسامحني

المهدي نبرة صوته تغيرت بوضوح  :  اتغيب كم يوم ولما ننشد عليك ايقولولي مصاب وراقد في بنغازي ونا اخر من يعلم.. اتجي هذه توا بالله عليك اتجي منك ؟

يعرُب  :  سامحني والله ماقصدي.. التهيت في الشباب ومعاش ركزت على شي.. واللي تبيها حاضر غير ماتزعلش مني انتا بالذات والله مانقدر انزعلك

المهدي بحزن  :  كنت لوطى في الوسيطة لي كم يوم.. واليوم بس جيت للبلاد وبعد علمتك معاش عرفت ايش اندير.. ناخذ سيارة من الجنسية ونجيك والا نرجى سيارتي تطلع من الورشة والا كيف ندير بالضبط؟

هز رأسه طول  :  لا رد بالك اتجي.. أني يومين تلاتة ومروح للبيضاء.. وبنجيك برجليا لعندك

المهدي  :  يعني انت اكويس.. شنو اصابتك بالضبط ؟

مرر يده بشعره  :  والله إن شالله ساهلة مافيش حاجة واعرة... عندي إصابة في رجلي من شظايا متعبتني اشويا.. اما غيرها تمام مافيش مشكلة

المهدي  :  ربي يشفيك ويعافيك وتروح طيب لاهلك وناسك

يعرُب:  تسلم عمي المهدي

رفع حاجبه وتكلم باللهجة ساخرة  وفيها حدة :  سقد روحك فيسع وروح للبيضاء... راهو شينة بلاك لبلاد يا اوبا

عض فمه وطبس يضحك.. رفع وجهه ورد:  حاضرين ياغالي اطلب وادلل... بس مادام قتلي يا اوبا نبيك تمشي اتشوف عبودة وين وشن اموره وطمني عليه بالله عليك

تنهد المهدي  :  وهذا وين نبي نلقاه توا نا؟ 

يعرُب  :  شوفه في شارع المستشفى.. عند المطعم والكافي اللي ديما يقمعز بحداهم.. او شوفه في شارع العروبة ماعنداش غير الامكان هادي يقعد فيهم

المهدي  تنهد بقل صبر  :   اهههههي ايصير خير.. تعرفني مانحبش زحمة لبلاد.. لكن مش بوصاتك ليا.. اليوم مانطلعش من البيضاء لعند نلقاه ونطمنك عليه ياسيدي