أحلام يعرب (ليبية_منقولة)

الحلقة 65

#أحلام_يعرُب ((بين الحب والحرب))
#الحلقة_65((الفصل الثالث والثلاثون رصاصة في بيت النار))
((دراما واقعية مقتبسة من أحداث حقيقية))
.
.
.
لايك قبل تقري ♥ الحلقة كانت طويلة واجد ومازال فيها احداث ومشاهد واجد خليتها حلقتين.. هذه حلقة والاخرى قيد الكتابة 🔥
.
.
.
«ربي نحن الذين لا نملك من الأمر شيئاً سوى الدعاء، ، يا الله لا تردنا ونحن خائبين لا تردنا ألا ونحن مجبورين
اللهم بعرض السماء وامتدادها أرزقنا راحه بال ويقين، بأن كل ما ندعوا به سيأتينا ولو بعد حين»
.
.
.
في السور من قدام... كان واقف ويده في جيبه واليد الثانية شاد بيها التليفون ويهدرز مع خاله

سمعة  :  والله ياولدي تبهدلنا وكل يوم والتاني محاصر الحوش ويرحي فيه هوا والصعاليك اللي معاه وحتى من اماليه ماعاد قدروا عليه ولا عاد يخاف من حد

زم فمه  :  حلوف وماجاش راجل.. لكن دباره عندي أني... اعطيني اسمه بالكامل بس وفي اي كتيبة يخدم وماعليك منه شوري

سمعة بخوف  :  شن بدير  معاه ياولدي

يعرب  :  هادا واحد صرصري حشاك ويلزمه قرصة ودن باهية باش يحرم يستقوى على الناس هوا والخمر اللي معاه

سمعة  :  اسمه وليد محمد ميلاد.. يخدم في كتيبة ***** ومعروف بلقب وليد الشيخ

عقد حواجبه  :  لكن الكتيبة هادي صغيرة وماعندهاش قوة على الارض

سمعة  :  اي مجرد اتباع وزمزاكة.. لكن عاد عندهم سلاح وبلي احرف ومني بيشدهم علينا.. احني ماعندناش لا جهد ولا حيل ليهم

يعرب  :  ماتشيلش هم ياخالي.. عندي ناس تقدهم وتخليهم يحسبوا الف حساب قبل ماحد منهم يفكر مجرد تفكير انه يقرب من حوشكم تاني... أعطيني اليوم بس وأني بادن الله بندير راي باهي وتوا نرجع انكلمك من جديد ونطمنك

سمعة  :  ياريت والله ياولدي.. بدير فينا جميل لو فكيتنا منهم اني والاولاد حصلنا فيهم

ميل رأسه  :  جميل شني بس ياخالي ماتقولش هكي ... انتا راهو زي بوي الله يرحمه  و يعطيك طولة العمر والصحة

سمعة أبتسم بأمتنان  :  سلمك سلمك ياولدي.. والله وشاهد عليا ربي انك زي واحد من اولادي وانتا تعرف معزتك في قلبي مافيش داعي نقولك

ابتسم  :  القلوب عند بعضها ياخال ربي يعزك... المهم اني بنصكر توا وانشوف كيف بندير حل معاهم وبعدين بنقولك شن ايصير

سمعة  :  باه تمام.. واني في انتظارك

يعرب  :  بالسلامة بينا تليفون

سمعة  :  بالسلامة في امان الله

صكر يعرب... ونقز خطوتين لقدام لعند قرب من حوض ورد وقمعز على حافته

حرك جهات الاتصال في هاتفه لعند لقى رقم معين وبعدين اتصل بيه

وصاحب الرقم كان في سيارته رد عليه  :  اوووووو أفندي يعرب الشرقاوي.. عاش من سمع صوتك ياراجل