أحلام يعرب (ليبية_منقولة)

الحلقة 43

#أحلام_يعرُب ((بين الحب والحرب))
#الحلقة_43((الفصل الواحد والعشرون سقوط جماعي_فبراير الحزين))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
« اللهم إليك أشكو ضعف قوتي وقلة حيلتي وهواني على الناس يا أرحم الراحمين أنت ربُّ المستضعفين، اللهم من اعتزّ بك فلن يُذل، ومن اهتدى بك فلن يضِلّ، ومن استكثر بك فلن يقلّ، ومن استقوى بك فلن يضعف، ومن استغنى بك فلن يفتقر، ومن استنصر بك فلن يُخذل»
.
.
.
موقف صعب
موقف محرج، موقف واعر ماتنحسدش عليه
موقف ماتتمناش حتى لعدوك
موقف عتيقة اليوم بايخ وثقيل.. الوضع اللي حطاته فيه بنتها خلاها تتمنى الموت.. او الارض تنشق وتبلعها ولا تلقا روحها في كم الفضايح والاحراجات اللي دارتها نجمة مع عيلة الحواتي
مع أختها الكبيرة واولاد أختها

كانت مغطية وجهها باحراج وتبكي.. من بعد مافكتها خديجة عن نجمة بالغصب.. والاخيرة كانت تبكي تحت البطانية ماتبيش حد ايشوف وجهها

أما اهنيوا كانت تعطي في فطيمة علاجها من خوف يرتفع ضغطها لانها زعلت واجد ومرضت من الموقف اللي صار

حطت يدها على كتف خالتها  :  ماعليش ياخالتي اهدي الله يخليك.. اسكتي معادش تبكي

عتيقة رفعت وجهها ودموعها تنزل  :  غير كيف تبوني نهدا ونسكت وأني بنتي بالشكل هادا.. بنتي جابتلي وجابتلكم العار والحشمة وحطت رأسي في التراب

هناء  :  وسعوا بالكم واستهدوا بالله.. ونجمة وراوية  ربي يهديهم ويصلح حالهم

رفعت راسها وتمسح في خشمها  :  ياودي درت كل شي على خاطرها وقفت في جنبها ودافعت عنها هلبا مرات.. وياما نصحتها وعقلتها وياشوق ماهدرزت عليها وفهمتها ان اللي ادير فيه غلط ومايصحش ولكن كلام فيك ياوادي

حولت البطانية عن وجهها وقمعزت تتكلم بحدة وتبكي :  ماهو كله منكم.. مش قتلك من البداية مانبيش انروح معاكم لاني مانتحملش مراة تانية تشاركني في راجلي.. قتلك مانقدرش ياخالتي وانتي شي شي مصكرة راسك عليا وشديتي فيا بالسيف

عتيقة تبي تنوضلها وخديجة تمسك فيها  :  صكري فمك ياوسخة.. مازال عندك وجه تتكلمي وتعيطي عليهم يامجرمة

فطيمة  :  اني شديت فيك لاني نحسابك مراة عاقلة وناصحة وتعرف تتصرفي زي الناس... نحسابك تعرفي كيف ادافعي عن حوشك وراجلك زي النساوين بالعقل والشطارة.. ماكنتش نحسابك بدير البصر هادا كله وتقطعي ايديك من ربي

نجمة  :  ولدك ماخلاش فيا عقل...قهرني وحرق قلبي من بداية حياتي معاه...ومشي جاب عليا مراة تانية واني مازال عروسة جديدة وحنتي في ايديا

فطيمة بعصبية  :  مش عذر باش تمشي اديري جرائمك هادي كلها.. ياريتك حتى عاديتي يعرب واحلام بس.. مشيتي دخلتي بنت خديجة معاك وحتى سيف اللي ماشوره شي ماسلم منكم