أحلام يعرب (ليبية_منقولة)

الحلقة 97

#أحلام_يعرُب ((بين الحب والحرب))
#الحلقة_97(( الفصل السابع والأربعون _أنت لي 6))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«الحمد لله ربّ العالمين، يُحب من دعاه خفياً، ويُجيب من ناداه نجيّاً، ويزيدُ من كان منه حيِيّاً، ويكرم من كان له وفيّاً، ويهدي من كان صادق الوعد رضيّاً.
الحمد لله الّذي بعزّته وجلاله تتمّ الصالحات، يا ربّ لك الحمد كما ينبغي لجلال وجهك وعظيم سلطانك على نعمك الظاهرة والباطنة التي أنعمت بها علينا وعلى رفع البلاء عنا»
.
.
.
مقمعزة مقابل أختها.. واتشوفلها كيف تاكل في ظوافرها.. وتهز في جسمها بعصبية... واعيونها منفوخات من كثر مابكت اليوم

تنهدت بحزن وربعت ايديها  :  لعند امتى بتمي هكي... خلاص سادك.. نوضي اغسلي وجهك وانسيه واللي فاتك فوتيه

حركت اعيونها لاختها  متجاهلة كلامها  :  انتي علاش مقمعزة بحدا وجهي... خيرك مامشيتيش للقفة مع أمي

نادية  :  وانخليك بروحك هكي

نجمة بحدة   :  أني مافيا شي.. ياريتك مشيتي باش تعرفي شن صاير غادي.. وشن مدايرينلها اليوم

عقدت حواجبها  :  تي شن مالك ومالها... خلي المراة في حالها وانسيهم... نجمة انتي هكي تحرقي في روحك.. فوتي البلي وعيشي حياتك

تكلمت بغضب  :  وربي ماني مخليتهم في حالهم وبنتم وراهم لعند نخرب حياتهم وندمرها زي ماخربوا حياتي ودمروها....والله بنخليهم يكرهوا اليوم اللي داروا فيا هكي ويعضوا صوابعهم ندم

نادية  :  والله ياوخيتي مانخاف الا تخربي ودمري حياتك انتي وبس وبعدين معادش ينفع الندم... يانجمة سلم اوخيتي فوتي الافكار هادي و كلي امرك لله وبس وكان عندك حق عند حد بياخدهولك ربي..  ياحبيبتي أنتي مازال صغيرة وقنينة والف راجل يتمناك...زيحي عنك الماضي والتفتي لحياتك ومستقبلك... صدقيني اللي قاعدة اديري فيه ماينفعش وبيرد عليك كله

تكلمت بعصبية  :  بالله اي مستقبل تتكلمي عليه... مراة مطلقة بعد شهرين من عرسها وفي العمر هادا شن بيكون مستقبلها وشن بيحكوا الناس عليها

نادية  :  مانبيش ندوي شن وصلك للحال هادا من الاول لانك تعرفي بروحك مليح... لكن شن فيها كان مطلقة...مئة مراة مطلقة وعاشت حياتها عادي. بري ديري شي اشغلي بيه وقتك وعقلك...املي يومك بشي تستفادي بيه  وتفيدي... فوتي عنك الانتقام والكلام الفارغ اللي مش حينفعك ولا بيغير شي من اللي صار معاك... نجمة اني ناااا

قاطعتها بغضب ودخلت ايديها في شعرها   :  تي باهي باهي...بري.. نوضي من قدام وجهي وخليني في حالي وارحميني من دوتك الفاضية... نوضي واخطيني تربحي نوضي

شافت لاختها بأسف ولحالتها العصبية... هزت راسها وطلعت من حذاها  :  ربي يهديك وخلاص...  ماعندي مانقول