أحلام يعرب (ليبية_منقولة)

الحلقة 74

#أحلام_يعرُب ((بين الحب والحرب))
#الحلقة_74((الفصل التاسع والثلاثون كوتشينة_خلط أوراق))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«أدعوك يا إلهي دعاء من اشتدت به فاقته وضعفت قوته وقلت حيلته، دعاء الغريق الملهوف المكروب المشغوف الذي لايجد كشف مانزل به إلا منك، لا إله إلا أنت فارحمنا ياأرحم الراحمين، واكشف عنا مانزل بنا من عدونا وعدوك الشيطان الرجيم»
.
.
.
تمسح على شعرها وتبوس فيها  :  الحمدالله ياربي... الحمدالله اللي فكك منه على خير واستريحتي من وجهه

مسحت عيونها وتشهق  :  الحمدالله غمة وانزحت من على قلبي

خشت من المطبخ وفي يدها طاسة امية اعطتها لاختها  :  شدي اشربي واهدي سلم اوخيتي

مدت يدها ترعش وخذت الطاسة.. وقربتها من شفافها اللي تجرف ورشفت منها

زمت هناء فمها بحزن  :  ترعش ياناري... البنت مفجوعة

شافتلها امها  :  بسم الله عليك ياميمتي... خيرك ترعشي... خلاص القصة انتهت ومشت في حالها

عروبة شادة الطاسة بين ايديها وتحكي بالعبرة  :  مش عارفة كيف كنت مخدوعة فيه وعايشة معاه... الراجل مش عارفة شن جاءه بدي زي الوحش يعيط ويسب وماعقب كلمة عافنة ماقالهالي ويتهجم علينا

هناء  :  من حرته وقهرته... بعد عرف روحه فات فيه الفوت وخسرك معادش استحمل واختش

خديجة بامتعاض  :  ودرة وحدرة... سيحقة تسحقه إن شالله هادا وين استاقض لروحه السفتول

عروبة  :  حقير خزي... فجعني وركبني الرعب... وخلاني تمنيت الموت والا الارض تنشق وتبلعني قدام الناس من حشمتي

فطيمة بحدة  :  بعيد الشر عليك بنيتي... هادا واحد عافن مايستهالش تبكي عليه ولا تحرقي دمك بسبته

عروبة بحزن  :  أني مش باكية عليه ولا حارقة دمي منه... اني بس وجعتني روحي وجعني الموقف والايامات اللي ضيعتهم من عمري مع انسان واطي وحقير زي عزالدين... وجعني الموقف والاحرجات اللي حطيت اخواتي فيهم قدام الناس وخليت اللي يسوى واللي مايسواش يفتحه فمه عليهم ويحقرهم قدام الناس

هناء  :  حشاءهم اخواتك من الحقرة... رجالة وتريس وينقام بيهم الراس... وقفوا في صفك لعند جابوا حقك وحطوا كل حد في مكانه وحجمه الطبيعي

تمسح في دموعها   :  اي نعرف وربي يخليهم لينا ولا يحرمني منهم واللي داروه معايا عمري ماننساه ليهم... لكن اني قصدي ياريتني عرفت نختار من الاول والا ماتزوجتش بالمرة وماخليتهمش يتعرضوا لكل هالمشاكل والمواقف البايخة

فطيمة  :  وسعي بالك سلم بنتي... انتي وين تعلمي بيه والا تعرفيه... هوا اللي شافك وجي بروحه عشان يطلبك واحني لما سالنا عليه الناس كلها بدت تشكر فيه وفي اماليه وفي الاخير كلنا انخدعنا فيه