أحلام يعرب (ليبية_منقولة)

الحلقة 34

#أحلام_يعرُب ((بين الحب والحرب))
#الحلقة_34((الفصل التاسع عشر كشف المستور))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللّهم إنّي أسألك أن لك الحمد، لا إله إلا أنت الحنان المنان بديع السماوات والأرض ذو الجلال والإكرام برحمتك يا أرحم الراحمين»
.
.
.
في حوش الحواتي مافيش حد تغدي اكويس... كل واحد خذا لقمتين بالنسبة لرجالة... أما احلام قعدت توكل وتشوف لاعيال خديجة

راوية تغدت عادي... وفطيمة قلبها نار ومقمعزة تدعي وخلاص وكل اشوي اتقول لسيف كلم خوك واساله شن صار معاكم
.
.
.
الجمعة وقت المغرب... خش يعرب للحوش بروحه وتوجه لغرفة المعيشة طول.. كانوا كلهم ماعادا صدام وسيف مش قاعدين

رفعت اعيونها بخوف فيه طول  :  ها شن صار معاها ياولدي

حول كندرته وقمعز جنب فطيمة وتنهد  :  إن شالله خير يام إن شالله خير

فطيمة  :  إن شالله ياولدي... لكن شن قاللكم الدكتور.. نجمة خيرها

زم فمه  :  مانعرفش خيرها.. لكن الدكتورة قالت عندها ولادة مبكرة مش عارف المشيمة نازلة والجنين نبضه ضعيف والا ابصر شني...وقالت لو استمر الحال هكي لعند غدوة بيضطروا يولدها وخلاص

فطيمة  :  وهيا شن صاير معاها... طايحة والا كيف

يعرب يهزب بيديه  :  مش عارف مش عارف... لمراة هادي مانعرفش كيف تفكر.. وعلاش ماتسمعش في الكلام... ستين الف مرة انقوللها ريحيلي روحك وخليك في مكانك لعند ربي يفرج عليك ومانبوش منك شي وخليك مستريحة... لكن شي شي اللي في دمغها بديره بديره وتعاند وخلاص

فطيمة بخوف  :  ماتخافش عليها... هيا في اي شهر توا

عقد حواجبه  :  مازال يام.. دوبها داخلة السابع

ربتت على كتفها  :  وسع بالك ياميمتي وإن شالله مهناك غير الخير

يعرب بتوتر  :  لكن يأم لمراة مازال في بداية السابع ومش عارف كيف بتجيب في الوقت هادا

ابتسمت اطمن فيه  :  عادي ياولدي.. اتصير ديما ونساوين هلبا جابوا في السابع وماشالله هما وصغارهم بخير وماصارلهم حتي شي... واهو عندك اختك خديجة اقرب شي..  ماهو جبتها في السابع وماشالله عليها مافيها حاجة قدامكم

مسح لحيته وتنهد وقف  :  إن شالله خير... أني بنتوضى للمغرب  ونطلع بنمر عليهم في المستشفى نطمن ونشوف احوالهم.. ماتبوش شي مني

فطيمة  :  لا سلامتك ياولدي... سلم عليها هلبا وقوللها قالتلك خالتك ماتخافيش بكل وباذن الله بتكون بخير هيا وصغيرها

هز راسه  :  إن شالله يأم... احلام تعالي نبيك

وقفت وطلعت وراه... وراوية مقمعزة تتفرج على التلفزيون... وفطيمة ناضت تتوضى للمغرب