أحلام يعرب (ليبية_منقولة)

الحلقة 5

#أحلام_يعرُب ((بين الحب والحرب))
#الحلقة_5 الجزء الاول (( الفصل الرابع هجمة مرتدة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«إنك لان تدرك مدى خوفك ولا مدى شجاعتك الإ اذا واجهت خطراً حقيقياً، ولن تدرك مدى خيرك ومدى شرك الإ اذا وجهت إغراء حقيقي»
.
.
.
شافه من بعيد.. كيف وقف سيارته ونزل عند البوابة متاع المزرعة... صبا وخلى الشغل اللي في يده.. ومشى قرب من البوابة

فتح البوابة وخش  :  السلام عليكم

ابتسم  :  وعليكم السلام.. شن لاخبار؟ 

ضحك المهدي  وغمزله وقرب منه  :  اخباري نا والا اخبار اللي كنت عندهم؟

ابتسمته كبرت وطبس  :  مرات انحس بروحي أنا الشيباني وأنتا الشاب مش اني

قرب يبصر معاه.. شد يده وفصعها وراء ظهره وشده بقوة ليه  :  كيف يعني؟  قصدك نا شايب.. نا شايب.... ويزيد يضغط على يده

برغم الالم بيده بس كان يضحك ويحاول يفك روحه بالشويا ..

المهدي ضغط زين على يده وتكلم بصوت يبان كأنه اصغر من عمره  :  شنو رايك توا.. اها... شاب والا مش شاب.. منهو الشايب فينا توا.. تكلم

هز رأسه مبتسم  :  أني..والله أني الشايب

ضحك بصوت مرتفع ودفه بعيد عنه  :  ايوااا ياجبان ماتجيش غير بالعين الحمراء... هازي علي صار

ضحك ورجعله حط يده على ظهره ويمشي جنبه  :  عيب والله عيب.. أنتا الخير والبركة وفي مقام بوي.. نقدر نهزى عليك انا؟!

ابتسم المهدي بأمتنان وربت على كتفه  :  الله يعزك ويحفظك.. ويرحم بوك اللي رباك على القدر والاحترام.. ونشهد بالله انك راجل من صلب راجل.. والتريس بالفعل مش بالقول

هز راسه  :  الله يرحمه ويسامحه.. وربي يعطيك الصحة وطولة العمر

تنهد بصوت مرتفع.. ومشى قمعز على كرسيه المعتاد.. كان يعرف ومتاكد أن يعرب بحركة وحدة كان قادر يفك روحه منه ويجيبه على الارض بكل سهولة... بس أحترام يعرب لفرق العمر بينهم.. ولسنه ولوضعه الصحي.. خلوه يوقف مكتف ويكتفي بالضحك...وهذا كان أكبر سبب لغلاوة يعرب في قلب العم مهدي... طبعاً غير سبب الجيرة والصحبة بينهم في المزرعة

قرب يعرب وقمعز مقابله  :  ها قولي شن صار معاك.. تلاقيت معاه؟

مسح لحيته  :  سخن الشاهي و صب قبل

ابتسم ورجع البراد على النار.. يعرفه لما يبي يحرقله دمه

المهدي  مسك عود رقيق بجنب النار.. وقعد يلم في الجمر على البراد  :  هذا ياسيدي طلعت منك طول و ادردحت نازل من هنا.. ومشيت كيف ماقتلي بالضبط.. وعمك المهدي طلع ولد حلال مانوقف سيارتي الا في شارعهم.. لكن معاش ضبطت الحوش وين اكويس