أحلام يعرب (ليبية_منقولة)

الحلقة 50

#أحلام_يعرُب ((بين الحب والحرب))
#الحلقة_50 ((الفصل الرابع والعشرون خطوة للخلف))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهمّ يا صبور صبّرني على ما بليتني و امتحنتني يا أرحم الرّاحمين، اللهمّ إني أعوذ بك من زوال نعمتك وفجاءة نقمتك، وتحوّل عافيتك وجميع سخطك ربنا أفرغ علينا صبرًا وثبت أقدامنا وانصرنا على القوم الكافرين»
.
.
.
تباعد عنهم كلهم... طلع لابعد نقطة عشان ماحد يشوفه او يسمعه من باقي العيلة
كان يسمع في صوته.. والدموع تتجمع في اعيونه.. ومش قادر يرد غير بكلمة وحدة «باهي»

تكلم بصوت جدي اكثر بس بهدوء  :  خيري

بلع عبرته ورد بصوت يرجف  :  نعم

يعرب  :  خيرك عاد.. ماهو الحمدالله قاعد انكلم فيك ومافيا شي.. بالله عليك معادش نبيك تبكي بكل

يحكي ويمسح في دموعه  :  ماهو اني لاني خفت عليك هلبا ومعادش عرفت شي عنك

يعرب  :  باهي خلاص اني بخير واموري تمام توا والحمدالله.. علاش تبكي بس

خيري  :  اي الحمدالله... هادا وين استريحت الحق..اليومين اللي فاتوا مانعرفش كيف مشوا علينا.. الحوش ولى جوه اخيي ماتعرفش كيف وبكي وزحمة وكلنا حايسين هكي والجو يضيق الصدر

ابتسم  :  ماعليش ايام وفاتت وباذن الله كل شي بيرجع زي لاول.. بس اني نبيك راجل وقد حالك ونبيك تركز على دراستك وبس ومعادش تفكر في شي..ولو تبي اي شي كلم عمك جمال طول

خيري  :  إن شالله.. باهي انتا امتى بتروح.. عطلت هلبا راهو

مرر يده بشعره  :  مانعرفش الحق.. بس الباين مازال علاج  وهكي يعني بنقعد فترة غادي

خيري بحزن  :  قداش يوم يعني بالضبط

يعرب شاف لعبيدة والاخير ابتسم  :  والله مانعرفش كم يوم بالضبط على حسب العلاج.. بس خلاص هانت معادش نطول هلبا.. وبعدين انتا خيرك بديت تنق هكي اصبر سلم ولدي

خيري باحراج  :  تي باهي توا نصبر وخلاص.. اصلاً شن بندير غير الصبر.. هادا كله لاني مستاحشك هلبا راهو

يعرب مبتسم  :  واني مستاحشكم هلبا واكتر منكم... وباذن الله كم يوم تاني وانكون فسطكم من جديد

خيري  :  ياريت والله... اسمع راهو بنجيب العاب نارية وتنوير مادخلينش لما تروح بنقلب الشارع بيهم

عض فمه وابتسم  :  باهي ياسيدي زي ماتبي.. المهم توا خليك لاهي في قرايتك واسمع كلام امك ورد بالك تتباعد عن الحوش والشارع

خيري  :  ماعنديش وين نمشي اصلاً.. من المدرسة للحوش ومن للحوش للمدرسة ويالله كان طلعت لجامع صليت والا لعبت كورة بحدا الحوش وتمت

يعرب  :  الله يبارك عليك..نعرف مخلي ورايا تريس وماعليكش خوف ترفع الراس ديما

ابتسم بفخر  و وجه انحمر :  امالا طالع لجدي و اعمامي