أحلام يعرب (ليبية_منقولة)

الحلقة 93

#أحلام_يعرُب ((بين الحب والحرب))
#الحلقة_93((الفصل السابع والأربعون_أنت لي 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
اللهمَّ إنّي أنتظر فرجك، وأرقب لُطفك، فالطف بي، ولا تكلني إلى نفسي ولا إلى أحدٍ من خلقك طرفة عينٍ ولا أقلّ من ذلك، يا جبّار السماوات والأرض، لا إله إلّا أنت لا إله إلّا الله الحليم الكريم، لا إله إلّا الله الرحمن الرحيم، لا إله إلّا الله ربّ السماوات والأرض وربّ العرش العظيم، اللهمَّ إنّي أنزلت بك حاجاتي كلّها فأنت العالم بي وبحالي، فيسّر أموري"
.
.
.
يوم الاثنين  8 / 6 / 2015  الصبح

العيلة كلها كانت نايضة صغار وكبار... فطروا مع بعضهم... والرجالة في المربوعة

البنات اليوم كانوا متفقين يطلعوا للسوق عشان يشروا ملابس العرس... وخديجة قررت تستغل الفرصة وتطلع معاهم للحديقة زي ماطلب منها الطاهر

كانت خايفة وماتبيش ادير اي غلطة... بس فضولها ورغبتها في شوفة الطاهر بعد الغياب هذا كله وشن يبي منها... كانوا اقوى من خوفها

مشت مع جمال وهناء... نزلها هي والاطفال مع خيري في الحديقة... ومشت هناء والبنات مع الجمال للسوق

وفي سيارة ثانية كانت فطيمة مع يعرب... ومعاها عروبة واحلام.. متجهين للمحلات

أما امجاد وزهرة ماطلعوش معاهم... وقعدوا في الحوش مع بعضهم... وسيف وصدام في المربوعة.. وصلاح في خدمته

يعرب نزل احلام وعروبة مع هناء والبنات الصغار... وقعدوا يمشوا على رجليهم في خط المحلات ويشوفوا لبضاعة الاعراس وجمال معاهم من بعيد

اما يعرب وفطيمة... طلعوا مشوار ثاني ومشوا لسوق الذهب... وقف سيارته عند محل... وتلفت على امه

عاقدة حواجبها  :  صار باعت دهبها كله

يعرب  :  ذهبها يأم وهي حرة فيه

فطيمة  :  اي اي مادخلنيش بيها... بتساعد اوبيها مسكينة كان ماوقفت معاه توا امتى بتوقف معاه

يعرب  :  مانبيش اي نقاش في الموضوع هادا بالله عليك

فطيمة  :  واني شن دخلني... هادي حاجة خاصة بيكم وانتم ادرى بيها

تنهد وشاف للمحلات  :  اني مانعرفش هلبا في الدهب والجو هادا...نبيك انتي تختاريلها حاجة مقومة وباهية

فطيمة  :  ذهب كامل قصدك

يعرب  :  اي الذهب اللي بتلسبه المراة مع الردي والا شن تقولوا عليه... مانبيش حاجة تنقصها

فطيمة  :  إيجار والا

رفع حاجبه وشاف لامه  :  إيجار شني بالله عليك... توا اني بنلبس مرتي إيجار وربي فاتحها عليا من خيره والحمدالله... خيرك يما قبل تزبطي فيها على الطاير