#أحلام_يعرُب ((بين الحب والحرب))
#الحلقة_19((الفصل الثاني عشر تصادم))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شي قدير رحمن الدنيا والآخرة ورحيمهما تعطيهما من تشاء وتمنع منهما من تشاء ارحمني رحمة تغنيني بهاعن رحمة من سواك»
.
.
.
تبكي.. وتتلوى وتعيط من الالم... نزلت شورها بسرعة.. طبست عليها بترفعها : ماتخافيش... ماتخافيش ساهلة بأذن
فنصت فيها : باعدي عني.. باعدي ماتمسينيش
بلعت ريقها بخوف وخرت عنها بصدمة
طلعت من داخل الحوش على عياط نجمة : خيركم.. خيركم شن في؟
شافتها طايحة على الارض وتبكي.. عضت فمها وقربت منها بسرعة : شن صار... إن شالله طحتي حي عليك ؟
نجمة تلفتت عليها : ووووك عليا.. بنموت عروبة بنموت.. نادي يعرب بسرعة.. ناديه معادش نقدر نتحمل
عروبة بخوف تشوف لتليفونها : حاضر.. حاضر.. هيا بنكلمه... غير شن صار وكيف طحتي بس... يارب.. يارب سترك وعفوك
نجمة تتألم وتتأوه... وأحلام واقفة في حيرة لاقادرة تقرب منها ولا قادرة تخليها.. واقفة تبكي وخلاص
رفعت حواجبها : اه يعرب.. الو.. وينك؟
زم فمه : تي كيف طلعت من الحوش... خيرك؟
بحتت في نجمة وبلعت ريقها : يعرب تعالى بسرعة
عقد حواجبه بقلق : خيركم عروبة... شن صاير؟
عروبة : يعرب نجمة طايحة وتتوجع مش عارفة خيرها.. تعالى بسرعة تربح
يعرُب : طايحة من وين ؟ شن فيها؟
عروبة : مانعرفش شي.. شكلها طايحة من الدروج.. تعالى انتا بس المراة تتوجع وفي حالة
تنهد بعصبية.. ورفع اعيونه في مراية السيارة.. مافيش حد وراه... دور السيارة بسرعة ولف راجع : هيا جيت.. جيت
طلعت من داخل الحوش وقربت منهم : خيركم... شني الهرجة هادي
شافت نجمة على الارض وعروبة بجنبها تساند فيها.. حطت يدها على فمها : نهار احرف.. المراة خيرها؟
عروبة بقل صبر : خديجة بري كلمي أمي بسرعة.. بسرعة
خديجة : طاحت والا شني؟
تكلمت بعصبية : بري نادي أمك بسرعة مش وقتك بكل
رجعت خديجة بسرعة للحوش ومشت لدار المعيشة... كانت هناء وفطيمة مقمعزين جنب بعض.. وفطيمة تهدي في هناء وتتكلم معاها عن موضوع جمال
خديجة : يأم تعالي بسرعة نجمة طاحت وتبكي
فتحت اعيونها بفزع : نجمة طيحت.. منو قالها؟
YOU ARE READING
أحلام يعرب (ليبية_منقولة)
Action﮼أحلام،يعرب((بين الحب وااحرب)) للكاتبة: ﮼أم،ناصر🤎. 🔥قيد الكتابة🔥.
