أحلام يعرب (ليبية_منقولة)

الحلقة 104

#أحلام_يعرُب ((بين الحب والحرب))
#الحلقة_104 (( الفصل الخمسون_ بشائر خير 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهمَّ لك الحمد والشكر في الأولى، ولك الحمد والشكر في الآخرة، ولك الحمد والشكر من قبل، ولك الحمد والشكر من بعد، وآناء الليل وأطراف النهار، وفي كل حينٍ ودائماً وأبداً". "الحمد لله حبّاً، والحمد لله شكراً، والحمد لله يوماً وشهراً، والحمد لله عُمراً، والحمد لله في السرّاء والضراء، والحمد لله على ما قسمه الله لنا»
.
.
.
كانت تحمي في تنورها عشان تخبز فيه... وتحكي بالتليفون... بعد كملت مشت شور امها في السانية  :  مطيوح السعد روح من مصر

رفعت صالحة راسها ونفضت ايديها من التراب  :  من قالك

جازية رافعة حاجبها  :  كنت نكلم في جارتي... قالت اليوم من الصبح والحوش فيه حركة وامية اتصب من القراج... شورها الجالطة ام لسان جاية تسيق في الحوش عشان تستقبل بوها

صالحة  :  يعني روح والا مازال

جازية  :  روح ياحنة... قالت ريت خوته نازلين بيه من السيارة قبل الظهر

صالحة  :  انظر ايش حاله

مطت فمها للجنب وتحكي بأمتعاض  :  اجعنه مايروح... مرض بوي اللي مشى وماعاد روح

ولدها الكبير كان يساعد في حنه وسمعهم... قرب منها  :  باتي جاء من مصر يامي

شافتله  :  روح أااها

ولدها  :  بنروحوا للحوشنا خلاص

جازية بحدة  :  ماعندك وين ماشي... وبوكم انسوه خلاص.. اعتبروه ميت

صالحة فنصت فيها  :  جازية

سكتت ودورت وجهها... وامها شافت لحفيدها  :  تعالى سلم امي... خوذ السطل هذا وامشي اسقي البهيمات توا نلحقك

تنهد بضيق وخذا من جدته السطل ومشى في طريقه للحضيرة

وصالحة تلفتت عليها  :  كنك انكلبتي انتي... العيل يسمع فيك... معاش تحكي على بوه قدامه هكي

جازية  :  لا بوه شي... هذا سيبنا ومشى علق في بنته وانسينا بكل وماعاد سال علي حد منهم

صالحة  :  الراجل مريض وانتي عزقتيه على بنته

جازية  :  هاااا نقعد نعاني في واحد ميت ميت ومغير طياح سعد لي وخلاص وحتى بيش نصرف عليه ماعندي

صالحة  قربت منها  :  ماقتلك اعرفي كيف ادبري وحايلي مع بنته بالحيلة وتحملي شوي وخلي راجلها يعلاجه علي حسابه فلوسه واجد.. وانتي خليك معاه قدام العرب وقدام عويله

جازية  :  والله والله ماتحلم انديرها وننكسرلها بنت اوريدة الوسخة.. لو نبي نموت... مش تبي بوها وجت اتهجم علينا ومعاها راجلها... اهو عزقته عليها خليها تعانيه بروحها