أحلام يعرب (ليبية_منقولة)

الحلقة 83

#أحلام_يعرُب ((بين الحب والحرب))
#الحلقة_83 ((الفصل الثالث والاربعون قابض على جمرة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
« اللهم إنا نسألك أن تمسح عنا أوجاعنا، وتنور ظلمات ليالينا، اللهم اسقنا فرحا، وارزقنا من كل مداخل الخير، اللهم يا قوي من للضعيف غيرك، اللهم يا غني من للفقير غيرك، اللهم يا عزيز من للذليل غيرك، اللهم اغننا بحلالك عن حرامك، وأغننا بفضلك عمن سواك»
.
.
.
فتحت اعيونها وشافت لصورتها... وحست بألم من منظر وجهها كيف كانت مضروبة يومها

غمضت اعيونها وتفكرت يوم تكلمت مع يقين في سيارتها عند الجامعة عن موضوع جازية وتهجمها عليها ⬇️

قربت منها  :  باهي شن رايك انكلم يعرب ونخليه يحطلها حد ويخوفها معاش اتجيك

فتحت اعيونها بتفنيصة  :  رد بالك يقين والله نزعل منك ومعاش انكلمك بعدها راه... مانبيش منه شي... اندبر اموري بروحي ماعليك.. وبعدين عمي اجويدة معاي طول الوقت مايخليش فيا واجد بروحي
.
.
فتحت اعيونها وتنهدت بتعب... وقدرت تفهم ليش يعرب بعدها جاب عمال وغير قفل الباب ودار حماية لرواشن
.
.
.
والاخير كان واقف برا مع عبسي  وعبودة  :  وين القيته

عبسي  : جاني بروحه زي عادته... قعد شرب حليب وبعد بنصكر قلت خلي ناخذه على طريقي ونجيبه ليك

شالفه وابتسم  : صحيت... من امس قلبت عليها البيضاء كلها ومالقيته

عبودة ابتسم وشد في يد يعرب  :  وين اوبا

يعرب  :  قاعد في الداخل

عبودة شاف للحوش من برا... ويعرب لف يده على اكتافه  :  تعالى بنوريك شي

مشى بيه لسيارته  فتح الباب الخلفي  وكان في اكياس.. ابتسم وشافله  :  شوف هادم ليك

بحت عبودة للاكياس وشاف ليعرب مش فاهم

يعرب  :  اركب وشوفهم بروحك

قرب من السيارة وركب في الكرسي الخلفي وقعد يفتح في الاكياس ويطلع في الدبش وينقل في نظره بين الاكياس ويعرب

والاخير ابتسم وطبس يشوفله  :  الحوايج هادي كلها ليك

توسعت بسمة عبودة وفرح بالدبش وقعد يطلع فيه ويتفرج عليه بسعادة

استقام يعرب وصكر باب السيارة وعبسي قرب منه  :  الله يبارك فيك...إن شالله في ميزان حسناتك

يعرب  :   إن شالله.. تسلم

عبسي  :  نروح بيه والا شنو

يعرب  :  لا توا نروح بيه أنا... خش تعشى معانا هيا

رفع حواجبه وابتسم  :  تبقى طيب...والله خيك هالك ونبي نروح انتعشى ونطيح نرقد معاش فيها

يعرب مبتسم  :  يعطيك الصحة

رفع عبسي يده وتوجه لسيارته  :  امالا هيا تمسوا على خير