أحلام يعرب (ليبية_منقولة)

الحلقة 95

#أحلام_يعرُب ((بين الحب والحرب))
#الحلقة_95((الفصل السابع والأربعون_أنت لي 4))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«يا ربّ ها أنا ذا يا ربّي، مغلوب مبغيّ عليّ مظلوم، قد قلّ صبري وضاقت حيلتي، وانغلقت عليّ المذاهب إلا إليك
يا ربّ أغلقت الأبواب إلّا بابك، وانقطعت الأسباب إلا إليك، ولا حول ولا قوة إلّا بك»
.
.
.
فلاش باك ⬇️
.
.
«شن جو محمد... إن شالله بس ماتعبكش معاه»

فضيلة  :  لا ماشالله عليه... هادي ويسمع في الكلام بسلامته... وطول الوقت شاد في قفطاني ويلحق فيا من مكان لمكان

ابتسمت زهرة بحزن  :  ياحليلي ياحبيبي... أستحشته هلبا واقسم بالله

فضيلة  :  ماتغشيش روحك عليه.. غدوة باذن الله بنجيبهولك وتشبيعه بيه

زهرة  مبتسمة بحب :  إن شاءالله يارب.. خلاص نتلاقوا غدوة معناها

فضيلة  :  اي باذن الله... سلمي على خالتك عويشة هلبا وعلى اي حد يسأل علينا غادي

زهرة  :  يوصل سلامك إن شالله... هيا بالسلامة

صكرت وتنهدت براحة.. وبعدين حست بنظرات نجمة عليها... وهي من اول ماقمعزت في جنبها وهي حاسة بعدم الراحة.. وتفكر أن التقعميزة بحذاها ابداً ماكنتش بالصدفة او بشكل عفوي

وفعلاً شكوك زهرة تحققت لما نجمة تلفتت عليها مبتسمة بتكلف وتكلمت  :  كيف حالك

شافتلها زهرة  :  اهلين.. الحمدالله بخير

نجمة  :  قريبة خالتي عويشة والا

زهرة  :  اي.. خالتي عويشة تكون اخت أمي

نجمة  :  تشرفت بيك

زهرة  :  الشرف لينا

تكلمت ببراءة مصطنعة  :  سمعتك تتكلمي عن حد مستاحشاته... اكيد ولدك صح

زهرة  :  اي ولدي صغير.. مخلياته مع حناه

نجمة  :  ربي يحفظهولك... سمعت أنك مطلقة

حست بضيق  :  اي

شافتلها من فوق لتحت ورفعت حاجبها  :  غريبة والله... وحدة زيك في جمالك وأناقتك وتطلق في العمر هادا

ابتسمت مجاملة  :  نصيبات عاد...وبعدين علاش مستغربة... لو الجمال والانأقة مقياس لنجاح العلاقات الزوجية راهو مش حالك من حالي وطلقتي بسرعة هكي حتى انتي

حست كأن حد صفعها بقوة على وجهها... تبدلت ملامحها طول ولكن حاولت بقد ماتقدر تتمأسك.. رفعت حاجبها وابتسمت بتهكم  :  سبب طلاقي معروف... وتقريبا هوا هوا نفسه سبب طلاقك أنتي

عقدت حواجبها باستغراب  :  كيف يعني... شن دخل هادا في هادا

نجمة  :  العامل المشترك بيناتنا هوا يعرب... والسبب اللي خلاه طلقني لانه من الاول مايحبنيش ومازال يفكر في حبه الاول... وتقريباً هكي أن هوا سبب طلاقك لانك مش قادرة تنسيه وتتأقلمي مع حد غيره ومازال تحبيه والا لا