أحلام يعرب (ليبية_منقولة)

الحلقة 7 الجزء الثاني

#أحلام_يعرُب ((بين الحب والحرب))
#الحلقة_7 الجزء الثاني (( الفصل الخامس رغماً عني))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
قربت منها.. وبصوت واطي : يانعليا شفتي الزعزعة اللي صارت في العيلة

رفعت حواجبها وتغسل في المواعين : ماتعرفيش كيف ياوخيتي... بسم الله شن جانا والله ماعرفت شن صار والحال انقلب هكي

راوية زمت فمها : انظر يعرب من يبي يتزوج ؟ ومن وين يعرفها ؟

هزت اكتافها : الله اعلم بس انحس بيه كدب ومجرد إشاعة ؟

رواية : يانعليا ماسمعتيش كيف قاللها نتزوج غصبا عليك.. وحق ربي كان قاصدها.. وحتى عمتي غير ساكتة وتحسيها خايفة.. معناها ولدها داير سريب لوحدة اخرى صاح؟

قلبت شفتها : والله أني مستغربة من يعرب الحق... قصدي انتي مازال ماليكش وقت عندهم وماتعرفيشي زيني... الشباب يعرب وسيف نعرفهم من لما كانوا مراهقين وكبروا قدام عيني... والله والله يعرب ماعنده في دوة النساوين ولا حتى مرة شفته قام عينه في اي بنت.. وحتى نجمة خداها على خاطر عمي الله يرحمه... وماعمري فكرت أن يعرب ممكن يفكر يتزوج عليها.. ولا بسرعة هادي اخرى

راوية : ماعاد تستغربي شي توا... الرجالة مافيهم خير.. وخاصةً بعد يكثروا فلوسهم

تنهدت بحزن : مش كلهم زي بعض الحق

راوية تنشف في المواعين.. وسرحت تفكر في روحها... زعما الدور الجاي علي.. حي عليا
.
.
.
************(( روايات أم ناصر))
.
.
.
تمشي وراءها ومتحشمة : مازال بكري.. ياريتكم قعدتوا حتى يومين بس.. والله ماتصح تجي وتمشي في نفس اليوم.. حتى تعب عليكم.. والطريق ماهي هينة

عتيقة تساوي في محرمتها : والله ياوختي تشبحي في والوضع بروحك.. الولد عصبي ومانقدرش نتكلم معاه حتى نص كليمة.. ومازال هادا بيدير في اخته يوم غير نروحوا لطرابلس.. الله يهديك يايعرب وخلاص

فطيمة متحشمة : ربي يهديهم الزوز... والله هادي عين وماصلت على النبي واضحة... البنت زي فلقت القمر جمال وحشمة... وهوا ماشالله عليه راجل ضابط باخلاقه وسمعته الطيبة سابقاته في كل مكان.. وماعمره حد جي يشكي منه والا يقول عليه حتى نص كلمة.. وكان مهنيها ومافي بينهم غير الخير

تنهدت بحزن : نصيبات الله غالب.. هادا حد النصيب بينهم

فطيمة شدتها ليها : غير ماتقوليش هكي.. أني مازلت نبيها نجمة لولدي وحتى يعرب غير ساعة شيطان الله يلعنه.. مايلقى خير منها... خليهم لعند الامور تهدأ بينهم والوضع يستقر.. وأني برجليا بنجيكم لطرابلس وبنردها لولدي

عتيقة : إن شالله خير.. إن شالله خير

فطيمة بحزن : مانبيكش تزعلي مني ياوخيتي... والله من يوم صار الطلاق واني مريضة ومانقيم حتى في راسي