أحلام يعرب (ليبية_منقولة)

الحلقة 24

#أحلام_يعرُب ((بين الحب والحرب))
#الحلقة_24 ((الفصل الرابع عشر انقلب السحر على الساحر))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«يا لطيف قد حرت في أمري فدبرني بخفي لطفك ولطيف صنعك في جميع أموري وما أعانيه ، أستعنت بك في كشف كل غمة ، فيسر لي بلطفك كل عسير إن تيسير العسير عليك يسير ، اللهم واجعل لي سوراً من لطفك يحول بيني وبين ما يؤذيني ومن يعتدي علي»
.
.
.
متضايقة في نومها ومتقلقة وكل مرة ترقد على جنب... انقلبت على ظهرها وشافت لسقف ونفخت بعصبية

دورت وجهها على الجنب... كان راقد بقربها... ضام مخدة تحته وشعره مبعثر بشكل فوضوي

شافتله ثواني.. ومدت يدها تمس في كتفه العاري باطراف اصابعها.. وتتأمل في ملامحه الهادية والخالية من اي انفعال او مشاعر.. غير النوم العميق

بلعت ريقها.. وقمعزت اتلم في شعرها لاسود... وقفت بالشويا.. وطلعت من غرفة النوم.. ومشت للحمام

طلعت وهيا شادة رأسها بيدها عندها صداع خفيف... زمت فمها ومشت للمطبخ.. فتحت درج فيه ادوية

خذت حبة بنادول.. وتبي تبلعها وبعدين شافت لدولاب... وتلفتت وراها بخوف.. وقربت فتحت صفة من الجنب وفي الداخل بكل كانت في كباية

سحبتها وطلعت منها شريط دواء... شافتله زين.. وضمت شفافها بحسرة.. هزت رأسها ورجعت الشريط في الكباية ورجعتها مكانها في الدولاب وصكرت

مشت لحوض خذت طاسة وصبت امية من الشيشة وبلعت البنادول وغمضت اعيونها اتكلم في روحها  :  مشي بهادا وخلاص توا... تحملي نجمة باش ماتخسريش ولدك وتخسري نفسك... تحملي غصباً عنك لعند يفرج عليك ربك وتفتكي من الحية هادي

طفت ضي الكوجينة.. ورجعت لغرفة النوم... خشت لسرير بالشويا.. ولكنه حس عليها

رفع وجهه اشوي وتكلم بصوت ناعس  :  خيرك.. وين كنتي؟

ابتسمت بتوتر  :  كنت في الحمام.. مافيا شي ولي ارقد

تنهد ورفع شعره عن وجهه.. وادور لجيهة الثانية رقد

اتشوف لظهره  وتكلم في نفسها  :  أنتا ليا وبس يعرب.. من حقي أني وبس.. درت كل شي باش اتكون ليا.. لا أحلام ولا غيرها تقدر تاخدك مني... والله لو خسرت عمري وكل شي.. مستحيل انفرط فيك لاخر نفس

تنهدت ونزلت في مرقدها... ورجعت اتعافر في النوم اللي جفاها بعد رقدت ثلاث او اربع ساعات من التعب... بس توا طار النوم ومش عارفة كيف ترقد من غير دواءها
.
.
.
***********(( روايات أم ناصر))
.
.
.
رفع ياقة الجلابية ساواها..عدل الزبون متاعه ويشوف لنفسه على المراية... هذب لحيته وشاف نظرة اخيرة لنفسه قبل مايلقط مفتاحه وتليفونه ويطلع من غرفة النوم

حط يده على باب المطبخ  :  طالع أني ماتبيش شي قبل نمشي

تلفتت عليه.. فركت اعيونها بتعب وقربت منه  :  لا سلامتك حبيبي